Hechos 2

Tachi Akꞌõre Jaure cheda

1Jerusalén pꞌuurude Pentecostés fiesta ewate pakꞌãri, jõmaweda Cristode ijãapataarã abaamaa see nɨ̃baji. 2Mãga nɨde nãumia pururua jĩwaaparikꞌa ũrijida ɨtꞌariipa cheru ãchimaa. 3Mãpai unujida tꞌɨpɨtaukꞌa jẽrajẽraa cheru ãchi ɨ̃rɨ. Maapꞌeda ãchi chaachaa ɨ̃rɨ urua jẽrajẽraa nɨ̃beeji. 4Jõmaweda Akꞌõre Jaure ome pꞌaneejida mãikꞌaapa Akꞌõre Jaurepa pedeepiji ichia kꞌinia badakꞌa. Pedeepachida ãchia aɨ naaweda kꞌawada–e pꞌanadapꞌedaa pedeede.

5Maapai Jerusalende pꞌanajida judiorã Tachi Akꞌõrede ijãapataarã fiesta–itꞌee chedapꞌedaarã awara ãiipa. 6Ãchia mãgɨ́ nãu pururua jĩwaaparikꞌa ũridakꞌãri, jõmaweda seedachida ma ciento veinte ijãapataarã pꞌanadapꞌedaamãi. Kꞌawadakꞌaa paji kꞌãata kꞌĩsiadai, ũripachida perã ãchi tꞌodapꞌedaa pedeede. 7Mapa ãchi akꞌɨtrua para beeji mãikꞌaapa mãgapachida:

—¿Jõmaweda na eperãarã pedee para bɨ Galileadepemaarã–ekꞌã? 8¿Sãgapɨ kꞌĩra tꞌãdoo pedee para bɨma ajida, eperãarã nama para bɨ pedee chaa? 9Nama eperãarã pꞌanɨ Partia, Media, Elam, Mesopotamia, Judea, Capadocia, Ponto mãikꞌaapa Ásia eujãdepemaarã. 10Ma awara chejida Frigiadepemaarã, Panfiliadepemaarã, Egiptodepemaarã, ichiaba Libiadepemaarã Cirene pꞌuuru kꞌaitꞌa pꞌanapataarã. Ichiaba Roma pꞌuurudepemaarã ũkꞌuru chejida. 11Judiorã ũkꞌuru mãga tꞌodapꞌedaa perã mãikꞌaapa ũkꞌuru judiorã pakꞌoodaidaarã, judiorã ũraade ijãadapꞌedaa perã. Ichiaba chejida Creta isladepemaarã mãikꞌaapa Arabia eujãdepemaarã. Nãgɨɨrã Galilea eujãdepemaarã mĩda, tachi chaachaa tꞌodapꞌedaa pedeede tachia ũri pꞌanɨda ajida. Ãchia pedee para bɨda ajida, jaradaitꞌee Tachi Akꞌõrepa ne–inaa pia ooda.

12Mãgá ãchi tꞌodapꞌedaa pedeede ũridapꞌedaa perã, jõmaarãta akꞌɨtrua para beeji mãikꞌaapa kꞌawadakꞌaa paji kꞌãata kꞌĩsiadai. Ãchi pitapai mãgapachida:

—Na ¿kꞌãata jara kꞌinia bɨma? apachida.

13Mamĩda ũkꞌuru, chĩara oo kꞌiniapa, mãgapachida:

—¡Vinopata piu para bɨ! ¡Mapa pariatua pedee pꞌanɨda! apachida.

Pedropa jarada Jerusalende pꞌanadapꞌedaarãmaa

14Mãpai Pedro, ɨtꞌa akꞌɨnɨ̃ beepꞌeda chi kꞌõpꞌãyoorã once ome, golpe pedeeji:

—Tachi aukꞌaarã mãikꞌaapa jõmaweda nama Jerusalende pꞌanɨɨrã, mɨa jararu pia ũrítɨ. 15Atꞌãri tapꞌeda nɨ̃bairã tai vinopa piuda–e pꞌanɨda aji, parãpa kꞌĩsia pꞌanɨkꞌa. Parãpa pia kꞌawa pꞌanɨ tai judiorã tapꞌeda weda todakꞌaa. 16Parãpa nama unu pꞌanɨ chonaarãwedapema Akꞌõre pedee jarapari Joelpa nãga jaradakꞌa:

17‘Tachi Akꞌõrepa jara bɨ: Na ewari na eujã jõi naaweda, eperãarã chokꞌaraarãmaa mɨ Jaure pëiitꞌeeda aji. Parã warrarã mãikꞌaapa parã kꞌaurãpa jaradaitꞌee mɨa jarapirukꞌa. Kꞌũtrãarãpa kꞌãimokꞌaraa pɨkꞌa bɨde mɨa ooru unudaitꞌee mãikꞌaapa chonaarã kꞌãimokꞌaraadaitꞌee mɨ ome. 18Wãara, maapai mɨa oopi bɨkꞌa oopataarãmaa mɨ Jaure pëiitꞌee; ɨmɨkꞌĩraarãmaa, wẽraarãmaa aukꞌa. Mɨa ooru ãrapa jarapataadaitꞌee. 19Pajãde mãikꞌaapa eujãde ne–inaa eperãarãpa waide unudakꞌaa unupiitꞌee: waa, tꞌɨpɨtau mãikꞌaapa nari jɨ̃rakꞌawaa nɨ̃bɨ. 20Akꞌõrejĩru kꞌĩidariitꞌee mãikꞌaapa atane kꞌĩra pꞌoree waakꞌa padariitꞌee. Mãgá paitꞌee Akꞌõre ewari waibɨa ewate, na eujã jõi naaweda. 21Mamĩda aɨ naaweda Tachi Akꞌõrepa ichimaa chupɨria iidirutaarã kꞌaripa ataitꞌeeda aji, atuanaadamerã.’ (Joel 2.28-32)

22Mãpai Pedropa mãgaji:

—Kꞌawa pꞌanɨda aji, Joelpa jaradakꞌa wãara uchiaru idi, Tachi Akꞌõrepa ichi Jaure taimaa pëida perã. Israel pidaarã, ũrítɨ mɨa jararu. Tachi Akꞌõrepa Jesús Nazaretdepema pëiji tachi tꞌãide. Mãga kꞌawa pꞌanɨ Tachi Akꞌõrepa irumaa oopipachi perã ne–inaa eperãarãpa pꞌoyaa oodakꞌaa. 23Mamĩda Tachi Akꞌõrepa kꞌĩsia iru badakꞌa, parãpa iru jita atadachida, maapꞌeda ijãadakꞌaa beerãmaa peepijida. Mãɨrãpa kurusode baijira bɨjida mama piumerã. 24Mamĩda Tachi Akꞌõrepa chokꞌai pꞌirabai ataji. Mãgá chokꞌai pꞌirabai atada perã, waa piu–e; ichita chokꞌai baitꞌee. 25Chonaarãweda Tachi Akꞌõrepa Jesús ome ooitꞌee bada jaraji Rey David itꞌaideepa:

‘Ichita mɨ Akꞌõre Waibɨa unupachida aji, mɨ kꞌĩrapite. Ichi mɨ ome bairã, maarepida mɨ waawee–e. 26Mapa mɨ tꞌãri o–ĩa nɨ̃bɨ, mãikꞌaapa kꞌari kꞌinia bɨ, kꞌawa bairã Tachi Akꞌõrepa mɨ kꞌaripapari. 27Akꞌõre, pɨa mɨ kꞌapꞌɨa beraupi–e paitꞌee mɨ ɨarutamãi, mɨa oopari perã pɨa oopi bɨkꞌa. 28Akꞌõre eujãdee wãpari o mɨmaa akꞌɨpiji. Mapa mɨ o–ĩa baitꞌeeda aji, pɨ kꞌĩrapite.’ (Salmos 16.8-11)

29Maapꞌeda Pedropa mãgaji:

—Tachi aukꞌaarã nama see nɨ̃bɨ, ũrítɨ. Tachi chonaarãwedapema Rey David jai–idaaji mãikꞌaapa ɨajida. Iru kꞌapꞌɨa atꞌãri jãɨrade bɨ tachi tꞌãide. 30Kꞌawa pꞌanɨ David chokꞌai bakꞌãri, Akꞌõre pedee jarapari paji. Mapa irua kꞌawa baji Tachi Akꞌõrepa jarada irumaa, irudeepa rey uchiapiitꞌee.#2.30 Salmos 132.11-12. 31Mãgá, wãara Davidpa unu pɨkꞌaji mãikꞌaapa jaraji sãga Cristo pꞌirabaiitꞌee iru ɨadapꞌedaamãiipa mãikꞌaapa iru kꞌapꞌɨa berau–e paitꞌee.#2.31 Salmos 16.10. 32Kꞌawa pꞌanɨ na pedee Jesudeta jara bɨ, Tachi Akꞌõrepa iru pꞌirabai atada perã mãikꞌaapa taipa unudapꞌedaa perã. 33Tachi Akꞌõrepa iru ɨtꞌaa ateeji ichi juaraare akꞌɨ banamerã. Maapꞌeda ichia jaradakꞌa ichi Jaure teeji Jesumaa, irua pëimerã irude ijãapataarãmaa. Mãgɨta parãpa etꞌewa unujida mãikꞌaapa ũrijida. 34Tachi Akꞌõrepa Rey David kꞌapꞌɨa piuda chokꞌai pꞌirabaipi–e paji ɨtꞌaa ateeitꞌee. Mamĩda Davidpa jaraji:

‘Tachi Akꞌõrepa jaraji Tachi Waibɨamaa: “Pɨ mɨ ome aukꞌa waibɨa bairã, su–akꞌɨ beepáde aji, mɨ juaraare, 35mɨa pɨ kꞌĩra unuamaa iru pꞌanapataarã pꞌoyaaru misa.” ’ (Salmos 110.1)

36ʼIsrael pidaarã, pia kꞌawáatɨ mãgɨ́ Jesús parãpa kurusode peepidapꞌedaa Tachi Akꞌõrepa Tachi Waibɨa papiji. Iruta Tachi Akꞌõrepa pëijida aji, tachi rey pamerã.

37Mãga ũridakꞌãri, arii pꞌanadapꞌedaarã kꞌĩsia pꞌuadachida. Mapa iidijida Pedromaa mãikꞌaapa chi kꞌõpꞌãyoorãmaa:

—¿Kꞌãata oodayama ajida, taipa?

38Pedropa pꞌanauji:

—Pꞌekꞌau kꞌachia oo amáatɨ, Tachi Akꞌõrepa parã pꞌekꞌau kꞌachia wẽpapikꞌoomerã mãikꞌaapa Jesucristo tꞌɨ̃de poro choopítɨ. Mãga ooruta pɨrã, Akꞌõrepa ichi Jaure pëiitꞌee parã ome bapariimerã. 39Mãgɨ́ jarada parã–itꞌee aupai–eda aji; ichiaba pãchi warrarã–itꞌee mãikꞌaapa tꞌɨmɨ́ pꞌanɨɨrã–itꞌee; pia jaraitꞌeera, Tachi Akꞌõre Waibɨapa ichi odee atee kꞌinia bɨɨrã–itꞌee.

40Mãgɨ́ pedee jõma jarapꞌeda, Pedropa ũraaji:

—Pꞌananáatɨ Jesús peedapꞌedaarãkꞌa; jĩpꞌa ijã́atɨ mãikꞌaapa óotɨ Tachi Akꞌõrepa oopi bɨkꞌa.

41Ma ewate weda Pedro pedee ijãadapꞌedaarãpa poro choopijida mãikꞌaapa apemaarã Cristode ijãapataarã ome tꞌĩujida. Ma ijãadapꞌedaarã Pedro kꞌaurepa eperãarã tres mil paji. 42Mamãikꞌaapa ãchia ũri kꞌinia pꞌanapachida Cristopa jɨrɨtꞌeradaarãpa jarateepata mãikꞌaapa jedepachida ãchia ne–inaa iru bee. Ichiaba jõmaweda cheepurupachida ɨtꞌaa tꞌɨ̃daitꞌee mãikꞌaapa ne–inaa jedekꞌodaitꞌee, mãgá kꞌirãpadaitꞌee Cristo piuda ãchi pari.

Chi naa ijãadapꞌedaarã

43Maapai eperãarã pꞌera pɨkꞌa para bapachi, Tachi Akꞌõrepa oopipachi perã Cristopa jɨrɨtꞌeradaarãmaa ne–inaa eperãarãpa pꞌoyaa oodakꞌaa. 44Ma awara Cristode ijãapataarã chikꞌinia para bapachi mãikꞌaapa chi wẽe beerãmaa ãchi ne–inaa jedepachida. 45Pia jaraitꞌeera, netopachida ãchi netꞌaa iru pꞌanɨ mãikꞌaapa ma pꞌaratꞌa tꞌoopachida teedaitꞌee chi wẽe beerãmaa. 46Ewari chaa cheepurupachida Akꞌõre te waibɨade ɨtꞌaa tꞌɨ̃daitꞌee mãikꞌaapa tꞌãri o–ĩapa ne–inaa jedekꞌopachida ãchi tede. 47Akꞌõremaa ɨtꞌaa tꞌɨ̃pachida jaradaitꞌee iru tꞌãri pia bɨ. Jerusalén pidaarãpa pia pedeepachida ãra ãpɨte. Maperã ewari chaa chokꞌaraara o kꞌachiadeepa uchiapachida ãchi kꞌaurepa.

Currently Selected:

Hechos 2: sjaB

Highlight

Copy