Hechos 15

Ijãapataarã Jerusalende chipꞌedaidapꞌedaa

1Maapai eperãarã Judeadeepa chejida Antioquiadee. Mãgɨɨrãpa Jesude ijãapataarãmaa jarateemaa pꞌaneejida. Mãgajida:

—Pãchi ɨmɨkꞌĩraarã kꞌapꞌɨade tauchaa bɨda–e pɨrã Moisepa pꞌãdade jara bɨkꞌa, ɨtꞌaa wãda–e paitꞌeeda ajida.

2Mãpai Pablo Bernabé ome ijɨ̃atɨ pedeejida ãchi ome. Maapꞌeda Jesude ijãapataarãpa Pablo, Bernabé mãikꞌaapa awaraarã pëijida Jerusalendee mãgɨ́ jarateeda iidinadamerã Cristopa jɨrɨtꞌeradaarãmaa mãikꞌaapa Jerusalendepema ijãapataarã akꞌɨpataarãmaa.

3Antioquiadepema ijãapataarãpa ãchi pëidapꞌeda, Fenicia eujãde mãikꞌaapa Samaria eujãde wãyaajida. Nepɨrɨjida judio–eerãpa Cristode ijãa pꞌanadapꞌedaa. Mãga ũridakꞌãri, mãpema Cristode ijãapataarã o–ĩadachida.

4Pablo Bernabé ome Jerusalende pachedakꞌãri, awaraa ijãapataarãpa ãra auteebaijida Cristopa jɨrɨtꞌeradaarã ijãapataarã akꞌɨpataarã ome. Chipꞌedaidapꞌeda ãra ome, Pablo mãikꞌaapa Bernabé nepɨrɨjida jõma Tachi Akꞌõrepa ooda ãchi pari. 5Mamĩda ũkꞌuru fariseorã Cristode ijãapataarã, pꞌirabaijida mãikꞌaapa mãgajida:

—Judio–eerã ijãa pꞌanɨɨrãmaa tauchaa bɨpidaipia bɨ ãchi ɨmɨkꞌĩraarã kꞌapꞌɨade mãikꞌaapa oopidaipia bɨda ajida, Moisepa pꞌãdade jara bɨkꞌa.

6Mãpai seedachida Cristopa jɨrɨtꞌeradaarã mãikꞌaapa ijãapataarã akꞌɨpataarã kꞌĩsiadaitꞌee ma pedee jaradade. 7Taarã aupedee jõnɨde, Pedro pꞌirabaiji mãikꞌaapa mãgaji:

—Ɨ̃pemaarã Cristo kꞌaurepa, parãpa kꞌawa pꞌanɨda aji, taarãru Tachi Akꞌõrepa mɨ jɨrɨtꞌeraji Jesucristopa ooda eperãarã kꞌaripaitꞌee jaranamerã judio–eerãmaa, ãchia aukꞌa Jesude ijãadamerã. 8Tachi Akꞌõrepa ãchi tꞌãride iru pꞌanadapꞌedaa kꞌawa bada perã, akꞌɨpiji ichia ãchi jida kꞌinia iru bɨ, tachi kꞌinia iru bɨkꞌa. Mãga akꞌɨpiji ãchimaa pëikꞌãri ichi Jaure, tachimaa pëidakꞌa. 9Tachi Akꞌõrepa ãchi aukꞌa akꞌɨpari tachikꞌa. Mãga kꞌawa pꞌanɨ ãchia pꞌekꞌau kꞌachia oopata aukꞌa wẽpapikꞌooda perã Cristode ijãadakꞌãri, tachi ome oodakꞌa. 10Ɨ̃rá, ¿tachia sãga oodaima? ¿Oodaipia bɨkꞌã Tachi Akꞌõrepa jara–e padata? ¿Jõma ijãapataarãmaa oopidaikꞌã mãgee ne–inaa chaaree Moisepa pꞌãdade jara bɨkꞌa? Tachia mãikꞌaapa tachi chonaarãpa mãgee ne–inaa jõmaweda pꞌoyaa ooda–e paji. 11Maperã mãga oodaikꞌaraa bɨ. Tachia ijãa pꞌanɨ Tachi Waibɨa Jesucristo tachi ome tꞌãri pia bairã, tachi o kꞌachiadeepa kꞌaripa ataitꞌee ɨtꞌaa wãdamerã. Ãchia aukꞌa mãga ijãa pꞌanɨda aji.

12Maapꞌeda jõma kꞌĩupꞌee para beeji Bernabé Pablo ome nepɨrɨmaa pꞌaneedakꞌãri Tachi Akꞌõrepa oopida ãchimaa judio–eerã tꞌãide, eperãarãpa pꞌoyaa oodakꞌaa ãchi juadoopa. 13Pedee aupadakꞌãri, Santiagopa mãgaji:

—Ɨ̃pemaarã, mɨ pedee ũrítɨ. 14Simón Pedropa etꞌewa nepɨrɨjida aji, Tachi Akꞌõrepa judio–eerã kꞌaripada. Tachi Akꞌõrepa ãchi jida jɨrɨpari ichideerã pꞌaneedamerã. 15Mãga bɨ iru pedee jarapataarãpa pꞌãdapꞌedaade jara bɨkꞌa:

16‘Nãga bapꞌeda, mɨa Rey David trua waya papiitꞌee irudeepa uchiada jua ekꞌari. Mɨa ooitꞌee Israel pidaarã tꞌãidepema te kꞌarawapataarãpa oopatakꞌa. Te tꞌeedaikꞌãri, ãrapa tꞌeedeechoo jẽra bada araa pꞌepata te chiwidikꞌa bainɨ̃ bɨdaitꞌee. 17Mãga pɨkꞌa Rey Daviddeepa uchiadapꞌedaarã mɨde ijãa pꞌanɨ mɨa araa pꞌeitꞌee apemaarã mɨde ijãa pꞌanɨɨrã ome. Maapꞌeda ma jõmaweda mɨchideerã papiitꞌee mɨ Warra kꞌaurepa. Mãga ooitꞌee chi mɨde ijãa pꞌanɨɨrã, Daviddeepa uchiada–e paji mĩda. 18Chonaarãweda mɨa kꞌawapidakꞌa eperãarãmaa, mãga ooitꞌee. Mɨ, Tachi Akꞌõre Waibɨapa mãga jara bɨ.’ (Amós 9.11-12)

19Mãpai Santiagopa mãgaji:

—Tachi Akꞌõrepa mãga jara bairã, mɨa nãga kꞌĩsia bɨda aji. Tachia Moisepa pꞌãdade jara bɨkꞌa oopidaikꞌaraa bɨ judio–eerãmaa, mãgɨɨrã Tachi Akꞌõrede ijãadakꞌãri. 20Ma kꞌãyaara kꞌartꞌa pꞌã pëidáma jaradaitꞌee kꞌonaadamerã nechiara ata bɨdapꞌedaa ne–inaa juapa ooda kꞌĩrapite, aɨ kꞌĩrapite ɨtꞌaa tꞌɨ̃pata; wẽra apai ome pꞌanadamerã; ne–animal ɨ̃yapa jɨ̃a piuda chiara kꞌonaadamerã, aɨde waa paraa perã mãikꞌaapa ne–animal waa kꞌonaadamerã. 21Mãgɨ́ ũraa aupai pëidaipia bɨ. Awaraa ũraa kꞌawa kꞌinia pꞌanɨ pɨrã, ɨ̃ipata ewari chaa ũridai Tachi Akꞌõre Ũraa jarateepata tede. Chonaarãweda Moisepa pꞌãda jarateepachidada aji, mãgee tede mãikꞌaapa ɨ̃rá atꞌãri mãga oopata.

Judio–eerãmaa kꞌartꞌa pꞌãdapꞌedaa

22Mãpai Cristopa jɨrɨtꞌeradaarã, ijãapataarã akꞌɨpataarã mãikꞌaapa jõmaweda Jerusalendepema ijãapataarãpa pedeeteejida ũkꞌuru jɨrɨtꞌeradaitꞌee mãikꞌaapa pëidaitꞌee Antioquiadee Pablo ome mãikꞌaapa Bernabé ome. Nãgɨ́ eperãarã jɨrɨtꞌerajida: Judas, ichiaba tꞌɨ̃patapꞌedaa Barsabás mãikꞌaapa Silas.#15.22 Ichiaba tꞌɨ̃jarapachida Silvano. Apemaarã ijãapataarãpa mãgɨ́ omé pia akꞌɨ pꞌanapachida ãchi poroorãkꞌa. 23Kꞌartꞌa pꞌãdapꞌedaade nãga jara pëijida:

Tai, Cristopa jɨrɨtꞌeradaarãpa, ijãapataarã akꞌɨpataarã ome na kꞌartꞌade salude pëiruta parã judio–eerãmaa Cristode ijãa pꞌanɨɨrã Antioquía pꞌuurudepema, Siria eujãdepema mãikꞌaapa Cilicia eujãdepemaarã–itꞌee.

24Taipa ũrijida nãpemaarã ũkꞌuru parãmaa wãdapꞌedaa, mamĩda taipa pëida–eeta. Mãgɨɨrãpa pariatua ãchi kꞌĩradoopa jaratee nipajida. Maperã parãpa kꞌawada–e paji ijãadaitꞌee Moisepa pꞌãdade wa Pablopa jarateedade. 25Mapa taipa pedeeteejida taidepemaarã ũkꞌuru jɨrɨtꞌeradaitꞌee mãikꞌaapa pëidaitꞌee parãmaa tai kꞌõpꞌãyoorã kꞌiniarã Bernabé Pablo ome. 26Taipa kꞌawa pꞌanɨ Pablo Bernabé ome waaweedakꞌaa piudaitꞌee Tachi Waibɨa Jesucristode ijãa pꞌanɨ kꞌaurepa. 27Mapa ãchi ome parãmaa pëiruta Judas Silas ome. Ãchia parãmaa jõma taipa kꞌĩsiadapꞌedaa na pꞌãdade jara bɨkꞌa nepɨrɨdaitꞌee. 28Tachi Akꞌõre Jaurepa tai kꞌaripaji parãmaa ne–inaa audú chaaree oopinaadamerã. Nãgapai jara kꞌinia pꞌanɨ parãpa oodamerã. 29Kꞌonáatɨ nechiara ata bɨdapꞌedaa ne–inaa juapa ooda kꞌĩrapite, aɨ kꞌĩrapite ɨtꞌaa tꞌɨ̃pata. Ne–animal ɨ̃yapa jɨ̃a piuda chiara kꞌonáatɨ mãikꞌaapa ne–animal waa kꞌonáatɨ. Ma awara pꞌekꞌau oonáatɨ. Taipa jara pꞌanɨkꞌa ooruta pɨrã, pia oodaitꞌee.

Mãgapai paji.

30Mãpai ma kꞌartꞌa pꞌãdapꞌeda, pëijida Antioquiadee wãdapꞌedaarã ome. Mama panadapꞌeda, ijãapataarã jõmaweda tꞌɨ̃ pꞌejida mãikꞌaapa ma kꞌartꞌa ãchimaa teejida. 31Ijãapataarãpa ma kꞌartꞌa leedakꞌãri, o–ĩadachida, ãchi–itꞌee ũraa pia bada perã. 32Judas Silas ome Tachi Akꞌõre Jaurepa jarapiru jarapataarã pada perã, ichiaba ma ijãapataarãmaa ũraajida tꞌãri o–ĩa pꞌaneedamerã. 33Mama pꞌanadapꞌeda, ijãapataarãpa ãchi despediijida kꞌãiwee wãdamerã. 34[Mamĩda Silas arii beeji.] 35Pablo Bernabé ome ichiaba pꞌaneejida awaraa ijãapataarã ome Antioquiade, Tachi Akꞌõrepa pedee pia jara pëida Cristode jarateedaitꞌee.

Pablo waya wãda ichi naaweda wãda ode

36Mãga pꞌanadapꞌeda, ewari aba Pablopa mãgaji Bernabemaa:

—Waya wãdáma aji, ijãapataarã akꞌɨde, Tachi Akꞌõrepa jara pëida Cristode jaratee nipadapꞌedaa pꞌuuru chaa. Akꞌɨdaitꞌeeda aji, atꞌãri ijãa pꞌanɨ wa mãga–e.

37Bernabepa ichiaba atee kꞌinia baji Juan; mãgɨ́ Juan ichiaba tꞌɨ̃jarapatapꞌedaa Marcos. 38Mamĩda Pablopa atee kꞌinia–e paji, ãchi ikꞌaawaapa uchiada perã Panfilia eujãde, ãchi mimia atꞌãri aupada–eeta. 39Ijɨ̃atɨ pedeedapꞌeda, ãchi o chaachaa jitakꞌoodachida. Bernabé wãji Chipre isladee Marcos ome. 40Jõdee Pablopa jɨrɨtꞌeraji Silas ichi kꞌõpꞌãyo pamerã. Ijãapataarãpa ãchi omé Akꞌõre juade bɨjida irua ãchi pia akꞌɨ bapariimerã. Mãpai Pablo ichi kꞌõpꞌãyo ome wãji. 41Wãyaajida Siria eujãde mãikꞌaapa Cilicia eujãde. Ijãapataarã ũraa wãjida ãchi para bee chaa.

Currently Selected:

Hechos 15: sjaB

Highlight

Copy