Apocalipsis 10

Dxus angel kusete libru ji'phsa

1Txajũ' Dxus angel vxite uythu seena' çxhãçxhasa cieluju tãaph pxãhte kĩjaçte, sa' dxikthete yu' kxthũusku ji'phu'. Txajx dxi'pa' sek na'wẽk kweethe', sa' txajx çxida yu' ipx na'wẽçxaçxáatx yu'. 2Kusete yu' libru le'çxkwesa'sku phadeçxa ji'phu', sa' paçu çxidaju yu' martek yuju, sa' jebu çxidaju' kiwetek yuju. 3Txã'wẽ yũuçxak sus we'we león pebeeçxa ma'wẽ sus seena' pebeekx txã'wẽ. Sa' txã'wẽ seena' pebeeçpkaçxha', siete kpi'sx we'wenik pthũuse. 4Txã'wẽ siete kpi'sx we'weni's jiyuçxa', fxi'jya'wath yu'. Nawa cielujũ na'jĩna we'weni'sthu wẽse'j:

—Txãa siete kpi'sx we'wenitx jiyug txãatxi's kim yuhtxwa pta'sxna fxi'jnu jĩ'k.

5Txãjũ' txãa Dxus angel marte vxite' kiwete yujuçxa ũssa' paçu kuse's cielute kiisçxa 6jurãyku bagaçxte yuhwa uumée ĩtxĩ fxi'zewa'jsa na'wẽ kĩjkĩhtxwa jxuka vxitku txajx yase's kxsusçxa na'jĩna:

—Ãçxha' jwee yu' jxthẽeyuumeena. 7Dxus angel sietetewe'sx txajx trompeta's tujkaya' takheçpkaçxha', nmeh ente ma'wẽ yũuwa'ja's ne' Dxusa' pheu'jçxa ji'phu' txã' jxuka kxtey yuuna. Sa' Dxus yuwe's pta'sxna selpisaawe'sxtxi ma'wẽne' pta'sx txãa yu' jxuka kxtey yuuna jĩk.

8Cielujũ we'weçxa' eçte kuçx fxi'jnu jĩk txã' ki' we'wek adx yakh na'jĩna:

—Dxus angel na'wẽ paçu çxida's marte txahçxa vxite çxida's kiwete txahçxa ũssa' kusete libru ji'pha' txãa libru's jxpa'gaya' me'j jĩte', 9Dxus angel tasxte utxaaçxa txãa libru's pẽjxthu. Aça' na'jĩnak pta'sx:

—Jxpa'gaçxa mẽ'. Nawa iidx yuwete yu' mil na'wẽ nxusxa pẽethejena, naapkaçxha' iidx tutxhte yu', wala seena' yajana jĩ'k.

10Txajũ' Dxus angel kuseju jxpa'gaçxa libru's ũ'th, aça' adx yuwete yu' mil na'wẽk nxusxa pẽetheeh, nawa adx tutxhte yu' seena' wala yaak. 11Txajũ' na'jĩnak jxkaah adxa's:

—Na'wẽ Dxus kaajiyu'kh txã'sa' pta'sxya' ki' u'jwene'ga, çxhaab iisa, nasa msuuwe'sxwa, fxiyfxiy we'wesa, jxkaahsawe'sx txã'wẽsatx jĩ'k.

Currently Selected:

Apocalipsis 10: pbbNNT

Highlight

Copy

Compare