Hebreos 1
1
Dxusa' kwe'sxtxi we'wek txajx Nçxi'ka's kaahçxa
1Dxusa' txãniitey kwe'sx yaçgawe'sxtxi maazkuẽe uswa we'wek fxiyfxiyçxah txajx yuwee pta'sxsawe'sxtxi jxkaahçxa. 2Sa' ãçxh naa nmeh ensu' Dxusa' kwe'sxtxik we'we txajx Nçxi'ka's kaahçxa. Dxusa' txajx Nçxi'ka's jxkaahçxak naa kiwe kĩjkĩhnawa jxuka vxit. Txã'wẽ yũuçxak Dxusa' txãatxi's jxuka Nçxi'k kuseteçxaçxáa nvxiht. 3Txãa Nçxi'k íik Ney zhiçxkwe zmeena' kweethnisa yu', sa' Dxus ma'wẽsate' le'çxkweçxáa yuhwa fxiysamée txãa íiçxáak yu'. Sa' txãa íiçxáa naa kiwe ma'k yuu nawa kĩjkĩhnawa jxuka ewçxáa kaafxi'ze'jna ũsa' txajx we'weni yakhçxáa. Sa' txãa íiçxáa kwe'sx pkaltxi yaateçxa Dxus pukate kaçxku cielute.
Dxus Nçxi'ka' angeleswe'sxte thaakwe walasa'
4Dxus Nçxi'ka' angeleswe'sxte thaakwek walasa yu', txãasak Ney ũsni yase jxpa'ga maa angeleswe'sxtewa thaakwe walasa. 5Txã'wẽte íiçxáak Dxusa' bagaçxte yuhwa angeleswe'sxtxi' maa yuhtxwa na'jĩna we'wemée:
Idxa' adx Nçxi'kgu,
Txãa pa'gath ĩtxi yuuwa'ja's ãçxha' vxit jĩme'.
Sa' txã'wẽy maa angel yuhnawa na'wẽ we'weme':
Adxa' txajx Ney yu'nja,
Aça' txã' adx Nçxi'k yuuna jĩme'.
6Nawa Dxusa' txajx Nçxi'ka's nyafxçxah naa kiwete nuykĩhçxa', na'wẽk we'we:
Dxus angeleswe'sx jxukaysa txã'sçxáana nwẽese'jwa'j ji'phta' jĩnak jxkaah.
7Sa' angeleswe'sx fxi'zewa'ja's yu' na'wẽçxáak we'we:
Angeleswe'sxa' wejxa na'wẽ vxyaawa'jsa vxitnisata',
Sa' Dxus jxkaahnitx selpiina ipx beesa na'wẽ vxyaana yuuwa'jsa vxitnisata' jĩ'k.
8Nawa Nçxi'k fxi'zewa'ja's we'weçxa yu' na'jĩ'k:
Dxus, iidx jxkaahna ũswa'ja' bagaçxtewa nes yuuna,
Idxa' ew yuuçxáa jxkaahna ũswa'jsag.
9Sa' ewmeesa yu'sa' jxpa'gamée, ewsa yuuçxá'sgu pakwe.
Txãa pa'gak iidx Dxusa' iidx wẽt fxi'zewa'ja's iiméh wala pees,
Naa kiwete iidx nwe'sxte jxthaakwe jĩ'k.
10Vxite ajkhẽ' na'jĩ'k Dxus Nçxi'ka's we'weçxa':
Idxgu kiwe's pheu'j nyafxte,
Sa' cieluwa iidx kuseju vxitnisata'.
11Nawa txã'wẽsa' pçuutxna, naapkaçxha' idxa' bagaçxtewa nes yuune'ga.
Kĩjkĩhwa jxuka ropa na'wẽçxáa ĩisxitxna.
12Aça' jxuka yu'pthehni yuutxna.
Nawa idx yu' bagaçxtewa txã'wẽesa nes yuune'ga.
Iidx ĩtxi fxi'zeni' bagaçxte yuhwa pçumeena jĩ'k.
13Nawa Dxusa' maa angeleswe'sx yuhtxwa txã'wẽ yu' na'jĩna we'weme' bagaçxteçxáa yuhwa:
Adx pukate paçu ju'gte mkaaçx,
Idxna açesa maatxwa jxuka idxçxaçxáana nwẽese'jwa'ja's vxitna jxã'phkaçx jĩme'.
14Jxukay angeleswe'sxa' kwe'sx na'wẽ kakwe ji'phmeesa naa kiwete maaçxah ewte neeyũuwa'jsa ũstxna txãawe'sxtxi pu'çxya' kaahnisaçxáata'.
Currently Selected:
Hebreos 1: pbbNNT
Highlight
Copy
Compare
Share
Want to have your highlights saved across all your devices? Sign up or sign in
© 1984, Wycliffe Bible Translators, Inc. All rights reserved.
