San Mateo 4
4
Jesús kaa türikuy jíöbilahuak
(Mr. 1:12-13; Lc. 4:1-13)
1Chúkula jü Espíritu Santo Jesústa núk siika, mékka ánia see päriau bíchaa. Ímïri jü diablo kaa türikuy ä jíöbila báarey.
2Cuarenta taahuarim entok tukaarimmak náuhui kaa jïbuäk; huanäi tébäurek. 3Huanäi jü yore jioptua báreme áu yepsaka ínel áu jiaahua:
—Empo Diosta Üusitukätek, ímëi tétammechë nésahue, am páanimtunakë béchïbo.
4Huanäi Áapo ä yómmiak, ínel jíaka:
—Diosta nooki jïojteri ínel jiaahua: “Kaa buähuamtay jíba jiápsa, jü yoreme, ál‑la sïme nokta Diosta bétana huémtayi.”
5Chúkula jü diablo buere joära Jerusaléniu bíchaa ä núk siika. Huanäi tiöpot chë mejikat ä jämutuak. 6Huanäi ínel áu jiaahua:
—Empo Diosta Üusitukätek, kömë emo tójja. Bueïtuk jïojteri:
Ángelesim emou bíttuanake;
bem mámammea enchi tóboktianake,
em guókim kaa tétat tëitinakë béchïbo.
7Jesús ínel áu jiaahua:
—Két ínel jïojteri: “Katë juka em Dios Átchay jíöbila báare.”
8Huanäi jü diablo júchi ä núk siika, jum káhuit mejikachikun bíchaa. Huanäi sïme huaka ániapo réyim jípureu ä bíttuak, entok juka musäla ujyória áusülik. 9Huanäi ínel áu jiaahuak:
—Íkäine sïmeta enchi máknake, inou tónommia kíkteka enchi nee yöreko.
10Të Jesús ínel áu jiaahua:
—¡Simëe, Satanás! Bueïtuk Diosta jïojteri ínel jiaahua: “Em Dios Áchaytë yörinake, éntoke ä nésahui jíba jonake.”
11Huanäi jü diablo ä tö siika. Sep éntok jume ángelesim áu yájaka ä aniay.
Jesús Galiléapo ä ministerio tékil naatek
(Mr. 1:14-15; Lc. 4:14-15)
12Jesús, Juanta pereesotukäu jíkkajaka, Galiléau buiaräu nóttek. 13Nazaret pueblopo yeu sika, Capernáum pueblou yepsak. Huanäi ímï jóatek, bahue mayoachi, Zabulón entok Neftalí buiärapo. 14Bueïtuk áhuä chúpanakë béchïbo, juka profeeta Isaíasta nokakähui, ínel ä jiäpo:
15Zabulón entok Neftalíta buíya,
bahuéu bíchaa böo, Jordán bathue huáytana,
Galiléa buiärapo kaa judíom jóakaïpo.
16Jü pueblo kaa machikuu aneïhui, buere machiriata bitchak;
entok jume mukia jékka kaa machikuu rejteka kókkolatukaïhui,
machiria ámeu yuumak.
17Júnaköi naateka Jesús ámeu nok táytek, ínel jíaka:
—Emóem jíapsi kúaktia, bueïtuk Diosta réytaka nésahueu béja äbo jëla ansime.
Jesús naiki kuchulerom núnnuk
(Mr. 1:16-20; Lc. 5:1-11)
18Huanäi Jesús Galiléa bahue mayoat hueramaka, guoyim bitchak emo sailakame: Simmom, Peero ti téhuakäme, entok Andrés ä sailahua. Bahuepom jítërim jímmay, bueïtukim kuchuleromtukay. 19Huanäi ínel ámeu jiaahuak:
—Ino sáukem kaate; ínapone kuchuleromsi enchim yáanake, yorememmehui.
20Huanäi bempo sep bem jítërim tójaka, áa sáu sájjak.
21Chë huam jëla huéeka, júchi guoyim bitchak, emo saylakame: Jacobo Zebedeota üusi, entok Juanta ä saylahua. Barcopom bem áchay Zebedeotamak aaney, jítërim chäbuaka. Huanäi am núnnuk. 22Bempo éntok barcota entok bem áchayhua tójaka, sep áa sáu sájjak.
Jesús juebena gententa majtiay
(Lc. 6:17-19)
23Huanäi Jesús sïme Galiléapo naa siika, bem sinagogampo am majtiaka, juka tü nokta Diosta réytaka nésahue bétana huémta, entok sïme kökoata entok kökosi éehuamta am úhuay, jum pueblompo. 24Türi nooki áa bétana nokhuame sïmekut jüneriahuak, Siria buiärapo. Huanärim áu nüpahuak sïme jume ják huanteme, kaa al‑leaka sirokame bem kökoa bétana, kaa pappeame, lemooniom jípureme, táij múkëram, entok káraktilame. Ímëi sïmem bem kökohua am úhuak. 25Huanärim yuun áa sáu sájjak, Galiléa buiärapo joomem, entok Decápolis buiära bétana, Jerusalén pueblo bétana, Judea buiära bétana, entok bathue Jordán huáytana bétana.
Currently Selected:
San Mateo 4: mfy
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved