Silib 2
2
1Daida ay makedse et mangangawngawda isonga baken osto nan nemnemnemenda ay nan biyag ay aptik ya kaseseg-ang dapay no domateng et nan patenggana et maid makaitagtag. Maid pay laeng nagtekan is sinmagsagong is nagapo isnan kad-an di tetey. 2Nemnemnemenda pay en aped tako naiyanak et kedeng. No makwas et nan matatagowan tako et kaneg tako egay polos naiyanak. Nan anges tako et kaneg nan sinkasip-oy ay asok et kedeng. Nan nemnem tako et kaneg nawada isnan menkebkebkeban nan poso tako. 3Dat no somaldeng nan kebkebna et madonot abes nan awak tako et somagong isnan lota dapay menbalin nan anges tako ay dagem. 4Adi mabayag dat maid et mangnemnemnem isnan olay esay inik-ikkan tako ya olay pay nan ngadan tako et makalingkingan. Nan biyag tako et malmallos ay kaneg nan malmallosan nan liboo dat mamaid. Owen, kaneg nan mamaidan di liboo no pomigsa nan agew. 5Nan mentetean tako isnan batawa et kaneg alin-ew. Maiwed makaitagtag isnan tetey tay epdas nabeddengan et maid makaipaaw-awni.
6Isonga kanan nan makedse en, “Ganasen tako et ngalod nan gawis isnan biyag datakopay mentee isnan batawa ay kaneg din inik-ikkan tako isdin kaonga tako ay nawaya tako ay mang-ikkan is kaykayten tako. 7Inomen tako nan ninkangingina ay alak datakopay osalen nan kagawisan ay bangbanglo. Adi tako pallosen nan timpo ay mensabongan di bayaya isnan pinagtotobon di esek. 8Esapay malaylay nan bayaya et epdas tako inala nan sabongna ta iyapang tako. 9Maaam-in tako ay menlagsak datakopay tomaynan is sinyal isnan menlaglagsakan tako isnan am-in ay tean. Keg todi nan biyag tako et wada nan kalintegan tako isnan naay.
10Aamisen tako nan kodokdo ay olay no nalintegda datakopay adi lispitowen nan balo ya nan naeteng. 11Nenemnemen tako en nalinteg tako ya napigsa tako ay mang-ik-ikkan isnan kaykayat tako tay maid ganaben di nakapsot. 12Nan nalinteg ay ipogaw nan mangtaktak ken datako isonga paegyaten tako daida ta komaanda isnan tean tako. Iyadida nan ikkan tako dadapay pabasolen datako ay adi tako kano tongpalen nan linteg Moses ya adi tako soloten ay osto nan inik-ikkan din kap-owan tako. 13Kananda en getkenda si Apo Dios ya kananda pay en daida kano nan an-ak Apo Dios. 14Adyan tako nan nalinteg ay ipogaw tay aposenda nan nemnemnemen tako ya nan ik-ikkan tako. 15Bakenda kaneg nan tap-in di ipogaw tay teken nan ogalida. 16Isnan nemnemda et pilmi nan kangawi tako isonga iyadida am-in nan ik-ikkan tako. Men-etekda tay si Apo Dios nan amada kano ya patiyenda ay no nakwas et nan am-in et kedeng nan nalinteg is men-gasing. 17Ngem ilaen tako kadya no nan kankananda et tet-ewa. Ilaen tako nan ommat no omdan nan mateyanda. 18No tet-ewa ay nan nalinteg nan an-ak Apo Dios et ilan tako kadya no isalakan Apo Dios daida isnan mang-aamis ken daida. 19Isonga padasen tako kadya daida. Sokilen tako daida datakopay paligaten daida ta ilan tako kadya nan patenggan nan anos ya makaitpeanda. 20Ibaga tako en kababain nan ikateyda olay ya kananda en isalakan met laeng Apo Dios daida.”
21Siya di nan panagnemnemnem di makedse ay ipogaw ngem baken osto. Nakowapda gapo isnan kinangawida. 22Egayda polos naawatan nan inik-ikkan Apo Dios. Egayda polos ninamnama nan maganab ay kaneg nan ganaben di gawis ya nalinteg ay ipogaw. 23Isdin nangboliwan Apo Dios ken datako et egayna binoliw datako ta matey tako nodi binoliwna datako ay kanegna ay maid patenggana. 24Nan apal Diablo#2:24 Diablo nan esay kakwaniyan Satanas. nan nang-iyali is tetey isnan batawa et nan makikadwa ken siya nan awnit matey ay eng-enggana.
Nan Maipanggep Nan Nalinteg
3:1-9
Currently Selected:
Silib 2: xnn
Highlight
Copy
Compare
Share
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.