Jonas 1
1
Nan Adi Mangtongpalan Jonas Isnan apo
1:1-17
1Isnan esay agew et nakikali nan apo isnan esay lalaki ay si Jonas ay potot Amittai. 2Kinwanina en, “Omeyka isnan dakkel ay ili ay Nineve#1:2 Nan iNineve et boson di Israelita dapay si Jonas et Israelita isonga adina layden ay omey mang-ibaga. ta ibagam en awnitko bakasen nan deey ay ili tay getkek nan kangawin nan ipogaw isdi.” 3Dat menlobwat si Jonas ngem teken nan ninpaeyana ta itagtagana koma nan apo. Inmey id Joppe et das-ana nan bapol ay menpaey id Tarso ay ili id Espania. Binayadana nan pilitina daet makilogan issan bapol ay omey id Espania tapno omaddawi isnan apo.
4Ngem dat ipaey nan apo nan napigsa ay dagem issan baybay et menlemlem is napinapigsa et kanega madadael nan bapol. 5Inmegyat nan men-ob-obla issan bapol et wasdin menpabadang isnan diosna dadapay itep-a nan kalgada isnan baybay tapno yomap-ew nan bapol. Dapay si Jonas et wada isnan baban di bapol ay nangipopodan ay naimayeng isnan seyepna. 6Dat omey nan kapitan di bapol ken siya et kanana, “Dakan aped maseseyep? Bomangonka adi ta menpabadangka gedan isnan diosmo ta baleng pay seg-angana datako ta adi tako matey.”
7Dat kanan san men-ob-obla isnan bapol en, “Menbinonot tako ta ilan tako mo sino nan mapabasol isnan naay mapaligatan tako.” Dadat ikkan et nabonot nan ngadan Jonas. 8Dadat kanan ken siya en, “Id wani, ibagam no sino nan mapabasol isnan naay. Dakan od wada isna? Into nan ilim? Ay ngan nan kaipogawmo?” 9Dat kanan Jonas, “Esaak ay Hebreo.#1:9 Nan Hebreo et siya nan esay ngadan di Israelita. Mendaydayawak isnan apo ay Dios id daya ay nangboliw isnan daga ya nan baybay.” 10Danat itoloy ay mang-ibaga en itagtagtagana nan apo.
Isnan nangdengan nan mentetee isnan bapol isnan kinwanin Jonas dadat inmegyat dadapay kanan, “Ay inayan, kaeegyat nan inikkam.” 11Dapay dat omam-amed pomigsa nan lemlem isonga dadat sooten en, “Ngan pay ngalod di ikkanmi ken sik-a ta somaldeng nan naay lemlem?” 12Dat kanan Jonas, “Mang-itep-a kayo ngalod isnan baybay ta somaldeng na tay getkek ay sak-en nan nakagapo isonga nalemlem kayo.” 13Ngem dat kayet ipapatin san wada isnan bapol nan kabaelanda ay mang-ipaigid issan bapol ngem adida mabaelan tay dat pomigsa da pomigsa nan dagem. 14Dadat men-adawag isnan apo ay mangwani en, “O Apo, adim koma dosdosaen dakami is tetey gapo isnan mangpateyanmi isnan naay ipogaw. Sik-a apo nan kigad isnan naay om-ommat tay sik-a nan mang-ipagtek isnan osto ay ikkanmi.” 15Dadat lak-eyen si Jonas et itep-ada isnan baybay dat dagos ay sinmaldeng nan lemlem. 16Gapo isnan naay et nan wada isnan bapol et inmegyaegyatda isnan apo dadat men-ibon-ong ken siya dadapay isapata ay mensilbi ken siya.
17Dat isnan bilin nan apo et inoklong di dakedake ay ikan si Jonas et nintetee isnan eges san ikan is tolo ay agew ya labi.
Currently Selected:
Jonas 1: xnn
Highlight
Copy
Compare
Share
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
