Azã 8
8
Pɔka n ẽŋɛ yalsɩ
1La Azezi sẽŋɛ la Oliivi tãŋa zuo. 2Tɩ beere wiige bulika yʋ'ʋŋɔ yʋ'ʋŋɔ, tɩ a le lebe Wẽnde-kãtʋm na, tɩ nẽrba wuu daan sẽŋɛ a zẽ'am, tɩ a zẽa zãsna ba. 3Tɩ lɔɔ karẽnsãandõma, la Farisi dõma tarɩ pɔka tɩ ba kuke tɩ a boe mĩ ɩta yalsɩ wa'am wa botɩ a ze'ele nẽrba la tẽŋasʋka, 4dee yele Azezi yetɩ: «Karẽnsãama, tõma kuke la pɔka wã tɩ a boe mĩ ɩta yalsɩ. 5Amoyisi bɔ tõma nõorɛ lɔɔ gõŋɔ la pʋam yetɩ, pɔka sãn ẽŋɛ wãna, tɩ lobe ẽ na kuga kʋ. La fõn yetɩ bo?»
6Ba yele bɛla tɩ ba di la a yɛm bɩsɛ, tã'agɛ dõrɛ ẽ. Tɩ Azezi suure tara a nu'ubiire gʋlsra tẽŋa. 7Tɩ ba ken sɔkra ẽ, tɩ a dɔ'ɔgɛ yele ba yetɩ: «Sɛka n boe yãma tẽŋasʋka ka tõm tõon-be'ego, a dẽŋɛ dɩkɛ kugre lobe ẽ.» 8Dee le suure gʋlsra tẽŋa. 9La ban wõm bɛla la, bõnkɛgsɩ n dẽŋɛ yese ayɩla ayɩla, tɩ ba wuu yese, dee basɛ Azezi mã'a la pɔka la, tɩ a zɛ a nẽŋam.
10Tɩ Azezi dɔ'ɔgɛ soke ẽ yetɩ: «Pɔka, sɛba n yõkɛ fʋ wa'am na bɛɛ? Nẽra nẽra ka di fʋ sarɩya sɩbgɛ fɔ?» 11Tɩ pɔka la lerge Azezi yetɩ: «Ayɛɩ, Zuudãana.» Tɩ Azezi yele ẽ yetɩ: «Mam mẽ kãn di fʋ sarɩya. Sẽŋɛ, la da le tõm tõon-be'ero.»]
Azezi de la dũnia peelem
12Tɩ Azezi le tɔgɛ la nẽrba la yetɩ: «Mam de la dũnia peelem. Nẽr-sɛka n dolɩ mam, a kãn malɩn sẽnna lika pʋam, a wʋn yẽ peelem n bɔ'ɔrɩ vɔm.»
13Tɩ Farisi dõma yele ẽ yetɩ: «Fõn mẽŋa n bɔ'ɔrɩ fʋ mẽŋa kaseto, la dagɩ kaseto asɩra.» 14Tɩ Azezi lerge ba yetɩ: «Baa mam sãn bɔ'ɔra m mẽŋa kaseto, mam kaseto de la sɩra. Se'ere n soe la, mam mi mam n ze'ele zẽ'a wa'am, la mam n we'esɩ zẽ'a. La yãma ka mi mam n ze'ele zẽ'a, la mam n we'esɩ zẽ'a. 15Yãma diti sarɩya la nẽrsaala n boorɩ se'em. La mam ka diti nẽra nẽra sarɩya. 16La baa mam sãn dita sarɩya, mam sarɩyadia de la sɩra, se'ere n soe la, mam ka de m yɩla. La de la mam, la mam Sɔ n tõm mam na. 17La yãma lɔɔ la pʋam la gʋlsɛ yetɩ: ‹Nẽrba bayi kaseto de la sɩra.› 18Mam mẽŋa n bɔ'ɔrɩ m mẽŋa kaseto, la mam Sɔ la n tõm mam na mẽ bɔ'ɔrɩ mam kaseto mɛ.» 19Tɩ ba soke ẽ yetɩ: «Fõn Sɔ la boe la bɛ?» Tɩ Azezi lerge ba yetɩ: «Yãma ka mi mam, la ya ka mi mam Sɔ la. Ya sãn mi ni mam, ya wʋn mi ni mam Sɔ la mẽ.»
20Azezi n daan zãsnɩ nẽrba Wẽnde-kãtʋm na ligri lagsgɔ dagsɩ zẽ'am na, tɩ a tɔgɛ yetɔg-bãna. La nẽra nẽra ka yõkɛ ẽ, a wakatɛ n nãn ka paagɛ la ĩyã.
Azezi pa'alɛ ẽŋa n de sɛka
21Tɩ Azezi le yele ba yetɩ: «Mam wʋn fõrgɛ mɛ, la ya wʋn ɛ mam koŋe, la ya wʋn ki la ya tõon-be'ero la pʋam. Mam n we'esɩ zẽ'a na, ya kãn tã'agɛ wa'am bilam.» 22Tɩ Zifdõma sɔkra taaba yetɩ: «Ẽn yetɩ: ‹Mam n we'esɩ zẽ'a na, ya kãn tã'agɛ wa'am bilam› na, a yetɩ a kʋ la a mẽŋa bɩɩ?» 23Tɩ Azezi yele ba yetɩ: «Yãma ze'ele la tẽŋa, la mam ze'ele la saazuum wa'am. Yãma de la dũnia wã nẽrba, la mam dagɩ dũnia wã nẽra. 24Bɛla ĩyã tɩ mam yetɩ, ya wʋn ki la ya tõon-be'ero la pʋam. Se'ere n soe la, ya sãn ka bɔ sɩra tɩ mam de la sɛka tɩ mam de la, ya wʋn ki la ya tõon-be'ero la pʋam.» 25Tɩ ba soke ẽ yetɩ: «Fõn de la ãne?» Tɩ a lerge ba yetɩ: «Mam de la sɛka tɩ mam yetɩ ya halɩ pɔspɔsɩ la. 26Mam tarɩ nɩ yɛla zozo'e mɛ n wʋn tɔgɛ yãma yelle, dee di ya sarɩya. La sɛka n tõm mam na de la sɩra dãana, la sɛla tɩ mam wõm a zẽ'am n bɛla tɩ mam tɔgrɩ bɔ'ɔra dũnia dõma.» 27La ba ka bãŋɛ tɩ a tɔgrɩ ba la a Sɔ Nawẽnnɛ yelle. 28Bɛla tɩ Azezi yele ba yetɩ: «Ya sãn wa zẽkɛ Nẽrsaala Dayʋa la, ya wʋn bãŋɛ tɩ mam de la sɛka tɩ mam de la. La ya wʋn bãŋɛ tɩ mam ka ɩtɩ sɛla sɛla la m mẽŋa nõorɛ, mam Sɔ Nawẽnnɛ n pa'alɛ mam se'em na mã'a tɩ mam tɔgrɩ. 29La sɛka n tõm mam na boe la mam mɛ, a ka basɛ mam m yɩla, se'ere n soe la, mam ɩtɩ la sɛla n ãn a sũure yẽlʋm daarɛ woo.» 30Ẽn tɔgɛ bɛla la, tɩ nẽrba zozo'e bɔ ẽ sɩra.
Sɩra wʋn to'oge ya basɛ
31Tɩ Azezi yele Zifdõma sɛba n daan bɔ ẽ sɩra la yetɩ: «Ya sãn sakra mam yetɔga la ka basɛ, ya sɩrɩ de la mam karẽnbiisi. 32La ya wʋn bãŋɛ sɩra, la sɩra la wʋn to'oge ya basɛ.» 33Tɩ nẽrba la lerge ẽ yetɩ: «Tõma de la Abraham yɩɩsɩ, tõma ka de nẽra nẽra yamsɩ. La wãne tɩ fõn yetɩ, tɩ wʋn to'oge tɩ mẽŋa?» 34Tɩ Azezi lerge ba yetɩ: «Mam yetɩ ya la sɩra sɩra, tɩ nẽr-sɛka woo n tõnnɩ tõon-be'ero de la tõon-be'ero yamŋa. 35Yamŋa dagɩ yire la nẽra wakatɛ wuu, la yire la dayʋa de la yire la nẽra wakatɛ wuu. 36Bɛla ĩyã, Nawẽnnɛ Dayʋa la sãn to'oge ya basɛ, ya sɩrɩ to'oge ya mẽŋa. 37Mam mi tɩ ya de la Abraham yɩɩsɩ. La yãma eerɩ mam mɛ tɩ ya kʋ, yãma n ka to'orɩ mam yetɔga la ĩyã. 38Mam tɔgrɩ la sɛla tɩ mam yẽ m Sɔ zẽ'am na. La yãma mẽ ɩtɩ la sɛla tɩ ya wõm ya sɔ zẽ'am na.» 39Tɩ ba lerge ẽ yetɩ: «Abraham n de tõma sɔ.» Tɩ Azezi yele ba yetɩ: «Ya sãn de nɩ na Abraham kɔma, ya wʋn tõm nɩ wʋ Abraham n tõm se'em na. 40La yãma eerɩ mam mɛ lɛɛlɛ wã tɩ ya kʋ, mam n tɔgɛ yãma sɩra la tɩ mam wõm Nawẽnnɛ zẽ'am na ĩyã. Abraham ka ẽŋɛ bɛla. 41Ya tõnnɩ na ya sɔ n tõnnɩ se'em na.» Tɩ ba yele ẽ yetɩ: «Tõma dagɩ tãmpĩiba. Tõma tarɩ la sɔ ayɩla, n de Nawẽnnɛ.» 42Tɩ Azezi yele ba yetɩ: «Nawẽnnɛ sãn de nɩ ya sɔ, ya wʋn nõŋɛ nɩ mam, se'ere n soe la, mam ze'ele la Nawẽnnɛ zẽ'am wa'am. Mam ka wa'am m mẽŋa, ẽŋa n tõm mam. 43Bẽm tɩ yãma ka wõnna mam yetɔga la võorɛ? La de la yãma n ka boorɩ tɩ ya sakɛ mam yetɔga la ĩyã. 44Ya sɔ de la Asũtãana, la ya boorɩ tɩ ya ẽŋɛ la ya sɔ la n boorɩ se'em na. A de la nẽr-kʋʋra halɩ pĩ'iluŋo. A ka boe sɩra pʋam, sɩra n ka boe a pʋam na ĩyã. A sãn parna, ẽn ãn se'em n bɛla, se'ere n soe la, a de la põmpɔrma, la põmpɔrŋɔ wuu sɔ. 45La, mam n tɔgrɩ sɩra la ĩyã tɩ ya ka bɔ'ɔra mam sɩra. 46Yãma nẽr-kãna n tã wʋn pa'alɛ tɩ mam tõm tõon-be'ego? La mam n tɔgrɩ sɩra la, bẽm tɩ ya ka bɔ'ɔra mam sɩra? 47Sɛka n de Nawẽnnɛ nẽra selsrɩ la Nawẽnnɛ yetɔga. La yãma n dagɩ Nawẽnnɛ nẽrba la ĩyã, bɛla tɩ ya ka sɛlsra.»
48Tɩ Zifdõma la yele ẽ yetɩ: «Tõma tarɩ bʋʋrɔ tɩ tõma yetɩ, fʋ de la Samaari nẽra, kʋlkã'arga n dolɩ fo.» 49Tɩ Azezi lerge ba yetɩ: «Kʋlkã'arga ka dolɩ mam, mam nã'asrɩ la m Sɔ, la yãma ka sakɛ tɩ ya nã'asra mam. 50Mam ka eerɩ m mẽŋa nã'asgɔ. Nẽra ayɩla n boe n eerɩ mam nã'asgɔ, dee dita sarɩya. 51Mam yetɩ ya la sɩra sɩra, tɩ nẽra sãn sakɛ mam yetɔga, a kãn malɩn ki.» 52Tɩ Zifdõma yele ẽ yetɩ: «Nãnannɛ wã tõma bãŋɛ mɛ tɩ kʋlkã'arga n sɩrɩ dolɩ fo. Abraham la Nawẽnnɛ nõtɔ'ɔsrɩba la ki mɛ. Tɩ fõn yetɩ, nẽra sãn sakɛ fõn yetɔga, a kãn malɩn ki. 53Fõn gãnnɩ tõma yaaba Abraham n ki la mɛ bɩɩ? Nawẽnnɛ nõtɔ'ɔsrɩba la mẽ ki mɛ. Fõn tẽ'esɛ tɩ fõn de la ãne?» 54Tɩ Azezi lerge ba yetɩ: «Mam sãn nã'asra m mẽŋa, mam nã'asgɔ la de la zãŋa. La de la mam Sɔ la n nã'asrɩ mam, sɛka tɩ ya wi'iri ya Nawẽnnɛ na. 55La yãma ka mi ẽ. La mam nõo mi ẽ. Mam sãn yetɩ, mam ka mi ẽ, mam wʋn dɛna la põmpɔrma wʋ yãma la. La mam mi ẽ mɛ, dee sakra a yetɔga. 56Ya sɔ Abraham yʋʋn ẽŋɛ la sũ-yẽlga sɩrʋm tɩ a wʋn wa yẽ mam daarɛ la, la a yẽ mɛ, ẽŋɛ sũ-yẽlga.» 57Tɩ Zifdõma la yele Azezi yetɩ: «Fõn nãn ka paagɛ yʋʋma pinuu mẽŋa dee yẽ Abraham?» 58Tɩ Azezi yele ba yetɩ: «Mam yetɩ ya la sɩra sɩra, tɩ Abraham n yʋʋn nãn ka boe la, mam boe mɛ.» 59Tɩ ba pĩ'ise kuga tɩ ba lobe ẽ. Tɩ Azezi li'ise Wẽnde-kãtʋm na yese.
Currently Selected:
Azã 8: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.