Azã 16
16
1Mam tɔgɛ bɛla bɔ ya tɩ sɛla da wa botɩ ya basɛ ka le dɔla mam. 2Ba wʋn wa dige ya ba wẽndeto pʋam, la wakatɛ sẽna tɩ nẽrba wʋn kʋ ya, dee tẽ'esɛ tɩ bãma tõm na Nawẽnnɛ tõonɛ. 3Ba wʋn ẽŋɛ la bɛla, se'ere n soe la, ba ka mi mam Sɔ la, la mam mẽŋa. 4La mam yele ya bɛla tɩ wakat-ẽŋa sãn wa paagɛ, ya tẽegɛ tɩ mam põn yele ya.»
Nawẽnnɛ Sɩa tõoma
«Mam ka yele ya bɛla pɔspɔsɩ, se'ere n soe la, mam daan boe la ya lɛ mɛ. 5La nãnannɛ wã mam we'esɩ la sɛka n tõm mam na zẽ'am, la ya nẽra baa ayɩla ka sokrɩ mam yetɩ, mam we'esɩ la bɛ? 6La mam n yele ya bõn-ẽna wã ĩyã, sũ-sã'aŋɔ n tarɩ ya zozo'e. 7La mam yetɩ ya la sɩra, tɩ la ãn sõŋa bɔ ya tɩ mam sẽŋɛ. Se'ere n soe la, mam sãn ka sẽŋɛ, Sõŋra la kãn wa'am ya zẽ'am, la mam sãn sẽŋɛ, mam wʋn tõm ẽ bɔ ya. 8La a sãn wa'am, a wʋn botɩ dũnia nẽrba bãŋɛ tɩ ba tuuge mɛ tõon-be'ero yelle, la sɛla n masɛ yelle, la sarɩyadia yelle. 9A wʋn botɩ ba bãŋɛ tɩ ba tõon-be'ero la de la ban ka bɔ mam sɩra la. 10A wʋn botɩ ba bãŋɛ sɛla n masɛ, se'ere n soe la, mam we'esɩ la m Sɔ zẽ'am, la ya kãn le yẽ mam. 11A wʋn botɩ ba bãŋɛ sarɩyadia yelle, se'ere n soe la, Nawẽnnɛ di dũnia wã naba sarɩya mɛ, tɩ a koŋe bʋʋrɔ.
12Mam ken tara la yɛla zozo'e tɩ m tɔgɛ bɔ ya, la ya kãn tã'agɛ to'oge ba nãnannɛ wã. 13La Nawẽnnɛ Sɩa n de sɩra dãana la sãn wa'am, a wʋn pa'alɛ ya sɩra wuu, se'ere n soe la, a yetɔga la ka ze'etɩ a mẽŋa zẽ'am, a wʋn tɔgɛ la sɛla tɩ a wõm na wuu bɔ ya, dee yele ya sɛla n boe nẽŋa sẽna. 14A wʋn nã'asɛ mam, se'ere n soe la, a wʋn dɩkɛ la sɛla n boe mam zẽ'am na tɔgɛ bɔ ya. 15Mam Sɔ la n tarɩ sɛla wuu la de la mam bõnɔ. Bɛla ĩyã tɩ mam yetɩ, a wʋn dɩkɛ la sɛla n boe mam zẽ'am na tɔgɛ bɔ ya.»
Sũ-sã'aŋɔ wʋn lebge sũ-yẽlga
16«La sãn ẽŋɛ fẽe, ya kãn le yẽ mam, la, la sãn le ẽŋɛ fẽe, ya wʋn le yẽ mam.» 17Tɩ karẽnbiisi basɛba sɔkra taaba yetɩ: «Ẽŋa n yetɩ, la sãn ẽŋɛ fẽe, tɩ kãn le yẽ ẽŋa, la, la sãn le ẽŋɛ fẽe, tɩ wʋn le yẽ ẽŋa, dee le yetɩ, ẽŋa we'esɩ la a Sɔ zẽ'am na, a võorɛ de la bẽm?» 18Bɛla tɩ ba daan yɛta tɩ: «Ẽn yetɩ la sãn ẽŋɛ fẽe la, a võorɛ de la bẽm? Tõma ka mi bõn-sɛka yelle tɩ a tɔgrɩ la.» 19La Azezi n daan mi tɩ ba boorɩ tɩ ba soke ẽ mɛ na, tɩ a yele ba yetɩ: «Mam n yetɩ, la sãn ẽŋɛ fẽe, ya kãn le yẽ mam, la, la sãn le ẽŋɛ fẽe, ya wʋn le yẽ mam na yelle tɩ yãma sɔkra taaba? 20Mam yetɩ ya la sɩra sɩra, tɩ ya wʋn kaasɛ fablɛ, la dũnia dõma sũure wʋn ãna yẽlʋm. Ya sũure wʋn sã'am, la ya sũ-sã'aŋɔ la wʋn wa lebge sũ-yẽlga. 21Pɔka sãn bɔna mĩ virgra, sũ-sã'aŋɔ n tarɩ ẽ, a nãmsgɔ wakatɛ n paagɛ la ĩyã. La a sãn dɔgɛ bia la kɩ'ɩlɩm, a ka le tẽra a nãmsgɔ la yelle, a sũure ãn yẽlʋm mɛ, ẽn dɔgɛ bia la ĩyã. 22Bɛla nãnannɛ wã yãma mẽ tarɩ la sũ-sã'aŋɔ, la mam wʋn le wa yẽ ya, la ya sũure wʋn ẽŋɛ yẽlʋm. La nẽra baa ayɩla kãn tã'agɛ sã'am ya sũ-yẽlga la. 23La daar-ẽŋa daarɛ, ya kãn le soke mam sɛla baa ayɩla yelle.
Mam yetɩ ya la sɩra sɩra, tɩ bõn-sɛka tɩ ya wʋn sose mam Sɔ la mam yʋ'ʋrɛ, a wʋn bɔ ya. 24Ya nãn ka sose sɛla la mam yʋ'ʋrɛ. Sose-ya tɩ ya wʋn to'oge tɩ ya sũ-yẽlga zo'oge pãɩ.
25Mam makɛ la makrɛ tɔgɛ bɔ ya. La wakatɛ sẽm mɛ tɩ mam wʋn tɔgɛ m Sɔ la yelle vẽelga vẽelga bɔ ya, kãn le makɛ makrɛ tɔgɛ. 26Daar-ẽŋa daarɛ ya wʋn sose mam Sɔ Nawẽnnɛ la mam yʋ'ʋrɛ, mam ka yetɩ mam wʋn sose ẽ bɔ ya. 27Mam Sɔ la mẽŋa nõŋɛ yãma mɛ, se'ere n soe la, yãma nõŋɛ mam mɛ, dee bɔ mam sɩra tɩ mam ze'ele la Nawẽnnɛ zẽ'am wa'am. 28Mam ze'ele la m Sɔ Nawẽnnɛ zẽ'am wa'am dũnia zuo, la mam fõrgrɩ dũnia zuo wɛ'ɛsa la m Sɔ la zẽ'am.»
29Tɩ a karẽnbiisi la yele ẽ yetɩ: «Nãnannɛ wã, fõn yãŋa tɔgrɩ la vẽelga vẽelga, dee ka le makra makrɛ. 30Tõma yãŋa mi tɩ fõn mi sɛla woo mɛ, fõn ka le ɛɛra tɩ nẽra soke fo. Bɛla tõma sakɛ tɩ fõn ze'ele la Nawẽnnɛ zẽ'am wa'am.» 31Tɩ Azezi lerge ba yetɩ: «Ya yãŋa sakɛ ya? 32Tɔ. Wakatɛ sẽna, la a põn paam mɛ, tɩ ya wuu wʋn wɩrgɛ tɩ ya nẽra woo bɔna a yire dee basɛ mam m yɩla. La mam ka de m yɩla, se'ere n soe la, mam Sɔ la boe la mam mɛ. 33Mam yele ya bɛla tɩ ya tara la sũ-mã'asʋm mam yetɔga la ĩyã. Dũnia wã pʋam ya tarɩ la nãmsgɔ, la keŋe ya sũure, tɩ mam yãŋɛ dũnia mɛ.»
Currently Selected:
Azã 16: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.