Tõoma 22

1A yele ba yetɩ: «M sɔdõma la m sɔbiisi, selse-ya mam n yetɩ m tɔgɛ se'em to'oge m mẽŋa ya nẽŋam.»

2Ban wõm tɩ a tɔgrɩ la Ebre yetɔga bɔ'ɔra ba la, tɩ ba go'oge malɩn sɛlsra ẽ. Tɩ a yetɩ: 3«Mam de la Zifu, ba dɔgɛ mam na Tarsɩ n boe Silisi so'olʋm pʋam na, uge mam Zerizalɛm kalam. Tɩ Agamalɩyɛlɩ zãsʋm mam tɩ yaabdõma lɔɔ la sõŋa sõŋa. Mam daan wɩsgɛ m mẽŋa mɛ la Nawẽnnɛ tõonɛ, wʋ yãma n wɩsgɛ ya mẽŋa se'em zĩna wã. 4La mam daan nãmsɛ sɛba n dolɩ Azezi sore la mɛ zozo'e, yõgɛ bʋraasɩ la pɔgsɩ botɩ ba kẽ'esɛ ba yʋ'a deem, dee kʋ basɛba. 5Nawẽnnɛ kãabgɔ kẽma nẽŋadãana, la kẽma la wuu n tã wʋn yetɩ, mam n tɔgɛ se'em na de la sɩra. Mam daan to'oge gõnnɔ mɛ ba zẽ'am wɛ'ɛsa tɩ m ka bɔ Zifdõma sɛba n boe Damaasɩ la, dee yõgɛ so-ẽŋa karẽnbiisi la n boe mĩ na, tarɩ ba sẽŋɛ Zerizalɛm ka nãmsɛ ba.

6La mam daan boe la sore wɛ'ɛsa ka lɛm Damaasɩ, la daan masɛ wʋ wʋntɛɛŋa wẽnnɛ zuu-tẽŋasʋka, tɩ peelem daan ze'ele saazuum darɛ wa nẽegɛ zozo'e gilge mam. 7Tɩ mam lui tẽŋa, wõm kõa n yele mam yetɩ: ‹Asolɩ, Asolɩ, bẽm tɩ fʋ nãmsra mam?› 8Tɩ mam lerge yetɩ: ‹Zuudãana, fõn de la ãne?› Tɩ a lerge mam yetɩ: ‹Mam de la Azezi n de Nazarɛtɩ nẽra la tɩ fʋ nãmsrɩ.› 9Tɩ nẽr-sɛba n daan dolɩ mam na yẽ peelem na, dee ka wõm kõa la n tɔgrɩ la mam na. 10Tɩ mam soke yetɩ: ‹Zuudãana, fõn yetɩ m ẽŋɛ la wãne?› Tɩ Zuudãana la yele mam yetɩ: ‹Isge sẽŋɛ Damaasɩ, tɩ ba wʋn ka yele fo sɛla wuu tɩ Nawẽnnɛ bɔ nõorɛ yetɩ fʋ ẽŋɛ.› 11La peelem na yãlgɛ mam nini mɛ tɩ mam ka yẽta. Tɩ sɛba n daan dolɩ mam na ve'ege mam tɩ tõma sẽŋɛ Damaasɩ.

12La bʋraa n daan boe mĩ tɩ a yʋ'ʋrɛ dɛna Ananiyasɩ. A daan sakrɩ la Nawẽnnɛ lɔɔ sõŋa sõŋa, tɩ Zifdõma sɛba n boe Damaasɩ la wuu tɔgra a yelle sõŋa. 13Tɩ a wa'am wa ze'ele lɛm mam zẽ'a yele mam yetɩ: ‹M sɔbia Asolɩ, le yẽta.› Tɩ mam nini le yẽta wakat-ẽŋa mẽŋa, tɩ mam yẽ ẽ. 14Tɩ a yele mam yetɩ: ‹Nawẽnnɛ tɩ tõma yaabdõma yʋʋn pʋ'ʋsrɩ la n looge fo tɩ fʋ bãŋɛ ẽn boorɩ se'em, la fʋ yẽ sɩra dãana la, dee tɩ a tɔgɛ la a mẽŋa nõorɛ bɔ fɔ, 15tɩ fʋ wʋn dɛna a kaset-dãana yele nẽrba wuu, fõn yẽ dee wõm se'em na. 16La lɛɛlɛ wã, bẽm tɩ fõn gʋ'ʋna? Isge pʋ'ʋsɛ la Azezi yʋ'ʋrɛ, botɩ ba mise fʋ ko'om pʋam tɩ Nawẽnnɛ basɛ fʋ tõon-be'ero taalɛ.›

17La bɛla poorʋm mam daan lebe la Zerizalɛm ka bɔna Wẽnde-kãtɛ la pʋam pʋ'ʋsra, yẽ Zuudãana wʋ zãasŋɔ la, 18tɩ a yele mam yetɩ: ‹Ẽŋɛ tɔtɔ yese Zerizalɛm, se'ere n soe la, tẽŋa la nẽrba kãn sakɛ fõn wʋn tɔgɛ mam yelle bɔ ba la.› 19Tɩ mam lerge ẽ yetɩ: ‹M Zuudãana, nẽrba wã mi mɛ tɩ mam n daan sẽnnɩ ba wẽndeto pʋam yõgra nẽr-sɛba n bɔ fõn sɩra la, botɩ ba wẽ'era ba, dee kẽ'esra ba yʋ'a deto pʋam. 20La wakat-sɛka tɩ ba daan kʋ A'etɩɛnɩ n tɔgɛ fõn yɛla bɔ nẽrba la, mam daan boe mĩ mɛ sakɛ tɩ a kũm na masɛ mɛ, dee daan gu'ura sɛba n kʋ ẽ na futo.› 21Tɩ Zuudãana la yele mam yetɩ: ‹Sẽŋɛ, mam yetɩ m tõm fʋ la bu-zãŋsɩ zẽ'am zãazãarɛ.› »

22La nẽrba la daan selsrɩ Apolɩ yetɔga la mɛ, la ẽn wa tɔgɛ bu-zãŋsɩ yelle la, tɩ ba tɔgra ke'enke'em yetɩ: «Kʋ-ya ẽ, nẽr-ẽna ka narɩ a bɔna dũnia zuo.» 23Tɩ ba kaasra tagursi yɛɛsra ba futo lɔbra, dee vaara tẽntõnnɔ lɔbra saazuum.

24Tɩ sʋdaasɩ kɛ'ɛndõma kɛ'ɛma la bɔ sʋdaasɩ la nõorɛ yetɩ, ba botɩ Apolɩ kẽ bãma yi-kãtɛ la pʋam tɩ ba wẽ ẽ na ka'asa, dee soke ẽ bãŋɛ, bẽm n soe tɩ ba tĩi kaasra ẽŋa ĩyã bɛla. 25Tɩ ba lʋ ẽ yetɩ ba wẽ ẽ na ka'asa, tɩ a soke sʋda-kɛ'ɛma la n ze mĩ na yetɩ: «Sore boe tɩ ba wẽ Rom tẽŋa nu'ugo nẽra dee nãn ka di a sarɩya?» 26La sʋda-kɛ'ɛma la n wõm bɛla la, tɩ a sẽŋɛ sʋdaasɩ kɛ'ɛndõma kɛ'ɛma la zẽ'am ka soke ẽ yetɩ: «Fʋ wʋn ẽŋɛ la wãne? Bʋraa wã de la Rom tẽŋa nu'ugo nẽra.»

27Tɩ sʋdaasɩ la kɛ'ɛndõma kɛ'ɛma la sẽŋɛ Apolɩ zẽ'am ka soke ẽ yetɩ: «Yele ma: Fõn sɩrɩ de la Rom tẽŋa nu'ugo nẽra?» Tɩ a lerge yetɩ: «Ẽe!» 28Tɩ sʋdaasɩ kɛ'ɛndõma kɛ'ɛma la yetɩ: «Mam mẽŋa yɔ la ligri zozo'e dee lebge Rom tẽŋa nu'ugo nẽra.» Tɩ Apolɩ yetɩ: «Ba kɔ'ɔn dɔgɛ mam tɩ mam dɛna la Rom tẽŋa nu'ugo nẽra.» 29Tɩ sɛba n yetɩ ba wẽ ẽ na ka'asa la vuta lɛbra poorʋm. Tɩ dabeem yõkɛ sʋdaasɩ kɛ'ɛndõma kɛ'ɛma la, ẽŋa n bãŋɛ tɩ Apolɩ de la Rom tẽŋa nu'ugo nẽra dee tɩ ẽŋa botɩ ba ba ẽ na bãnsɩ la ĩyã.

Apolɩ ze Zifdõma kẽma nẽŋam

30La sʋdaasɩ kɛ'ɛndõma kɛ'ɛma la daan boorɩ tɩ a bãŋɛ la sɩra sɩra yel-sɛka n botɩ Zifdõma la dõrɛ ẽ. Tɩ beere wiige, tɩ a ba'agɛ Apolɩ basɛ. Dee bɔ nõorɛ yetɩ, Nawẽnnɛ kãabgɔ kẽma nẽŋadõma, la kẽma n po dita sarɩya la wuu lagsɛ. Tɩ ba lagsɛ. Tɩ a tarɩ ẽ sẽŋɛ ka ze'ele ba nẽŋam.

Currently Selected:

Tõoma 22: gurDBL

Highlight

Copy

Want to have your highlights saved across all your devices? Sign up or sign in

Learn More About Farefare, Ninkaré