Tõoma 19

Apolɩ boe Efɛɛzɩ

1La Apolɔsɩ n daan nãn boe Korẽntɩ la, Apolɩ doose la tãnsɩ zuo tẽnsɩ la wuu pʋam tole, sẽŋɛ ka paagɛ Efɛɛzɩ yẽ karẽnbiisi basɛba bilam, 2soke ba yetɩ: «Yãma n bɔ Azezi sɩra la, yãma to'oge Nawẽnnɛ Sɩa mɛ bɩɩ?» Tɩ ba lerge yetɩ: «Ayɛɩ, tõma nãn ka wõm tɩ Nawẽnnɛ Sɩa boe.» 3Tɩ Apolɩ soke ba yetɩ: «Ko'om misga kãna tɩ yãma to'oge?» Tɩ ba lerge yetɩ: «Tõma to'oge la Azã ko'om misga.» 4Tɩ Apolɩ yele ba yetɩ: «Azã daan misri nẽrba ko'om pʋam pa'ala tɩ ba teege la yɛm basɛ tõon-be'ero. A daan yetɩ nẽrba la, tɩ nẽra n weege ẽŋa poorʋm sẽna, ba doose ẽŋa. Nẽr-ẽŋa de la Azezi.» 5La ban wõm bɛla la, ba botɩ ba mise ba ko'om pʋam mɛ Zuudãana Azezi yʋ'ʋrɛ ĩyã. 6Tɩ Apolɩ dɩkɛ a nu'usi paglɛ ba zuto, tɩ Nawẽnnɛ Sɩa wa'am ba zuo, tɩ ba tɔgra yetɔg-zãŋsɩ dee to'oge Nawẽnnɛ yetɔga tɔgɛ bɔ nẽrba. 7Ba daan de wʋ nẽrba pia la ayi.

8Apolɩ daan kẽ Efɛɛzɩ la wõr-sɩtã, daan kẽ'era Zifdõma wẽndeem mõola Nawẽnnɛ yetɔga la bʋraanɛ bɔ'ɔra nẽrba, dee mõrgɛ pa'alɛ ba Nawẽnnɛ so'olʋm yɛla tɩ ba sakɛ. 9Tɩ basɛba daan kɛ'ɛm ba sũure ka sakɛ, dee tɔgra Zuudãana sore la tɔg-be'ero nẽrba nẽŋam. Tɩ Apolɩ basɛ ba dee welge karẽnbiisi la fõrgɛ. Tɩ daarɛ woo tɩ a zãsna ba Atiranusi karẽndeego pʋam. 10A ẽŋɛ bɛla la yʋʋma ayi. La nẽr-sɛba wuu n boe Azi tẽnsʋm na wõm Zuudãana yetɔga mɛ, Zifdõma, la bu-zãŋsɩ wuu.

Aseeva dayɔɔsɩ yelle

11La Nawẽnnɛ daan basɛ tɩ Apolɩ tõm na tõon-yãlm-kãra. 12La ba daan sãn ẽn dɩkɛ ãnkɩra bɩɩ futo n kalʋm a ĩyã tarɩ sẽŋɛ ka kalʋm bã'adõma, ba yẽtɩ ĩmã'asʋm mɛ, tɩ kʋlkã'arsɩ yɛsra dee basra ba.

13Tɩ Zifdõma basɛba n daan gilgri digra kʋlkã'arsɩ nẽrba zẽ'am, daan makɛ tɩ ba dige kʋlkã'arsɩ la Zuudãana Azezi yʋ'ʋrɛ, yele ba yetɩ: «Mam yetɩ ya la Azezi sɛka tɩ Apolɩ mõolɩ la yʋ'ʋrɛ tɩ ya yese.» 14Ba daan de la Aseeva n de Zifdõma kãabgɔ kẽma nẽŋadãana dayɔɔsɩ bayopɔɩ n ɩtɩ bɛla. 15Tɩ kʋlkã'arga lerge ba yetɩ: «Mam mi Azezi mɛ, dee mina Apolɩ n de sɛka, la yãma de la ãndõma?» 16Tɩ kʋlkã'arga la n tarɩ sɛka la isge zɛbɛ ba la pãŋa yãŋɛ ba wuu, tɩ ba ze'ele yire la zoe yese bɛɛla la pɔglʋŋɔ.

17Tɩ Zifdõma, la bu-zãŋsɩ la wuu n boe Efɛɛzɩ la wõm yel-ẽna wã. Tɩ dabeem kẽ ba wuu, tɩ ba pẽgra Zuudãana Azezi yʋ'ʋrɛ. 18Tɩ nẽrba zozo'e bɔ Azezi sɩra wa'am wa pelge ba pʋa tɔgɛ ba tõon-be'ero nẽrba nẽŋam. 19Tɩ ba zozo'e n tarɩ ba gõnnɔ tõnna tɩɩm tõoma la, lagsɛ ba yõ la bugum nẽrba la wuu nifum. Tɩ ba geele gõnnɔ na wuu ligri, tɩ ba de la lig-kõba tʋspinuu. 20La Zuudãana n pa'alɛ a pãŋa bɛla la, tɩ a yetɔga la saara zẽ'a wuu dee yẽta pãŋa.

Efɛɛzɩ dõma dãmŋɔ yelle

21Bɛla poorʋm tɩ Apolɩ tẽ'esɛ a sũurum yetɩ, ẽŋa wʋn sẽŋɛ la Masedʋanɩ, la Akayi ka ze'ele bilam sẽŋɛ Zerizalɛm, dee yetɩ: «Mam sãn paagɛ bɔna Zerizalɛm, dẽnɩ tɩ mam paagɛ Rom.» 22La a tõm na Atimõtɩ, la A'erastɩ n de a sõŋrɩba tɩ ba sẽŋɛ Masedʋanɩ, dee weege a mẽŋa Azi yuuge fẽe.

23La wakat-ẽŋa dãmŋɔ zozo'e n isge Efɛɛzɩ Zuudãana Azezi sore la doosgo yelle. 24La bʋraa n daan de kuta, tɩ a yʋ'ʋrɛ dɛna Ademetrisi. A daan tarɩ la zũuro kuta bõndõma tɩ ba wõna la ba wẽnnɛ Artemisi deego la. Tɩ zũuro tõntõnɩba la daan yẽ yõorɔ zozo'e tõon-ẽŋa pʋam. 25Tɩ Ademetrisi lagsɛ ba, la sɛba wuu n tõnnɩ tõon-ẽŋa buuri, yele ba yetɩ: «Bʋraasɩ wã, ya mi tɩ tõon-ẽna wã pʋam tɩ tɩ yẽtɩ bõntarsõm. 26Ya mẽŋa wõm dee yẽ Apolɩ n ɩtɩ se'em. A pa'alɩ nẽrba tɩ wẽn-sɛba tɩ nẽrsaalba ẽŋɛ la ba mẽŋa nu'usi la dagɩ wẽna sɩra sɩra. A ẽŋɛ bɛla mõrgɛ teege nẽrba zozo'e pʋtẽ'era mɛ Efɛɛzɩ kalam, la, la dee la fẽe tɩ a paagɛ Azi tẽnsɩ wã wuu pʋam. 27Bõn-ẽna wʋn botɩ tõma tõonɛ na sã'am mɛ. La sɛla n pa'asɛ, wẽn-kãtɛ Artemisi deego la wʋn lebge la zãŋa, la Artemisi mẽŋa tɩ Azi nẽrba, la dũnia nẽrba wuu nã'asrɩ la, pãŋa wʋn sã'am mɛ.»

28La ban wõm yetɔg-bãna la, ba sũa yĩige mɛ tɩ ba tĩi tɔgɛ yetɩ: «Efɛɛzɩ dõma wẽnnɛ Artemisi n tarɩ pãŋa.» 29Tɩ tẽŋa la wuu dãmɛ. Tɩ nẽrba la yõkɛ Agayusi la Aristarkɩ tarɩ ba zoe sẽŋɛ lagsgɔ zẽ'am, bãma bayi de la Masedʋanɩ nẽrba n dolɩ Apolɩ. 30Tɩ Apolɩ bɔɔra tɩ a kẽ nẽr-kʋʋŋɔ la zẽ'am, tɩ karẽnbiisi la ka sakɛ. 31Tɩ Azi tẽŋa nẽŋadõma basɛba n de a sɩrdõma tõm nẽrba yetɩ, ba wa'am a zẽ'am wa belem ẽ yetɩ, a da sẽŋɛ lagsgɔ zẽ'am na. 32Tɩ nẽr-kʋʋŋɔ la lagɩm vɔɔla zozo'e, tɩ nẽra woo tɔgra ẽŋa n tẽ'esɛ se'em, tɩ ba zozo'e ka mina bõn-sɛka n botɩ ba lagsɛ. 33Tɩ Zifdõma looge Alɛgsãndrɩ tɩ a sẽŋɛ nẽrba la nẽŋam ka tɔgɛ, tɩ nẽrba la basɛba pa'alɛ ẽ yelle la võorɛ. Tɩ Alɛgsãndrɩ yɩbsɛ la nu'usi tɩ a tɔgɛ yelle la pa'alɛ nẽrba la. 34La ban bãŋɛ tɩ a de la Zifu la, tɩ ba wuu lagɩm taaba tĩi kaasɛ yetɩ: «Efɛɛzɩ dõma wẽnnɛ Artemisi n tarɩ pãŋa.» Ba kaasɛ bɛla paagɛ karf-ayi.

35Tɩ tẽŋa la gõn-gʋlsa botɩ ba go'oge, tɩ a yele ba yetɩ: «Efɛɛzɩ nẽrba, dũnia nẽrba wuu mi mɛ tɩ wẽn-kãtɛ Artemisi pʋ'ʋsgɔ deego la boe la Efɛɛzɩ kalam, la tõma n de a pʋ'ʋsgɔ deego la gu'urba, la kugre la n wõn na Artemisi ze'ele saazuum lui la gu'urba. 36Nẽra nẽra kãn yãŋɛ sɩ'ɩsɛ yel-ẽna. Bɛla ĩyã, go'oge-ya voole, da lɔgɛ-ya ẽŋɛ sɛla n ka masɛ. 37Yan tarɩ nẽr-bãna wa'am kalam wã, ba ka yele tɩ wẽnnɛ na yel-be'ego, la ba ka kẽ a pʋ'ʋsgɔ deem na ẽŋɛ sɛla n de be'em. 38La Ademetrisi la a tõntõnɩba la sãn tara yelle la nẽr-sɛka, sarɩyadia daarɛ boe mɛ, la sarɩyaditba mẽ boe mɛ. A sãn bɔɔra, a tarɩ ba sẽŋɛ bilam ka sãm. 39La ya sãn yẽ la yel-sɛka tɩ ya bɔɔra tɩ ya malgɛ, tẽŋa la nẽrba lagsgɔ daarɛ, tɩ wʋn malgɛ. 40Yãma n ẽŋɛ sɛla zĩna wã wʋn wa'am na yelle, tɩ ba wʋn dõrɛ tɩ yetɩ, tɩ gire la tẽŋa. La tɩ kãn yãŋɛ pa'alɛ sɛla n botɩ tɩ lagsɛ gire girga la. La tɩ kãn yãŋɛ tɔgɛ la võorɛ sõŋa.» 41Ẽŋa n yele bɛla kɩ'ɩlɩm na, dee yele ba tɩ ba wɩrgɛ.

Currently Selected:

Tõoma 19: gurDBL

Highlight

Copy