Impezayag 20

Is Nengkelibu he Tuig

1Ne zutun, neehè ku is belinsug̵uen he ebpenaug he ebpuun te langit ne igkulang din is utew zekelà he pusas wey is yawi zuen te vitu he wazà pidtemanan is kezalem din. 2Ne midakep din sikan is dekelà he uled he deragun he iyan ded sikan is uled dengan he iyan daan kes mezaat he mulin-ulin he si Setanas ne mibpusasan din. Ne kenà ibpaawà haazà seled te nengkelibu he tuig. 3Ne intimbag din si Setanas diyà te vitu he wazà pidtemanan te kezalem din. Ne migkendeduwan din ne midtuusan din su wey kenà mepuwasi. Umba mibeelan haazà su wey kenà meekali ni Setanas is menge etew te menge g̵inhedian dini te lumpad taman te kenè pa egketapus is nengkelibu he tuig. Ne emun egketapus haazà is nengkelibu he tuig, ibpaawè dè pa si Setanas te meg̵aan dà utew he timpu.

4Ne zutun neehè ku is menge pinuuwà te edhadì. Ne is ebpememinuu zutun, mibeg̵ayan sikandan te keg̵ehem te kedhukum wey kebeg̵ey te kukuman. Neehè ku zaan is menge g̵imukud te menge etew he midhimetayan tenged te insangyew zan is Lalag te Megbevayà wey is impenurù ni Jesus. Wazè dan med-azap duen te langgam wey te ledawan te langgam, ne wazè dan daan mebpetiyap te tiyap te langgam diyà te vuked dan wey ke ziyè be te velad dan. Nengevanhew sikandan ne impehadì sikandan duma ki Kristu seled te nengkelibu he tuig. 5Ne haazà is kegkevenhawa kandan ne iyan sikan is egkehuna he kegkevanhew te menge minatey. (Ne haazà is samà te menge etew he minatey, kenè dan pa egkevanhew taman te kenè pa egketapus is nengkelibu he tuig.) 6Utew egkengelipey wey edtuvazan te Megbevayà haazà is egkengevanhew zutun te egkehuna he kegkevanhew. Kenè dan en ebpekeragkes duen te ikezuwa he kemetayen he iyan sikan is ranew he regreg. Menge memumuhat sikandan he ed-azap te Megbevayà wey ki Kristu. Ne ebpekehadì dan duma ki Kristu seled te nengkelibu he tuig.

Is Kegkezaag̵a ki Setanas

7Ne emun egketapus haazà is nengkelibu he tuig ne ibpaawè dè pa si Setanas dutun te pirisuwan din. 8Ne egawas sikandin dutun wey zin meekali is menge etew ziyà te langun he menge g̵inhedian dini te tivuuk he kelibutan. Iyan haazà sikan is migngezanan te Gug wey Magug. Edtig̵umen sikandan ni Setanas wey zan mekepekidtebek te Megbevayà. Utew zan mezakel su henduen dan te pantad diyà te veyvey te zag̵at. 9Mid-eneb dan is tivuuk he lumpad te kelibutan ne midlingutan dan is inged he utew ingkesuat te Megbevayà he zutun is menge sundaru te Megbevayà he iyan is menge tumutuu kandin. Iyan, mid-ulug̵an sikandan te hapuy he ebpuun te langit ne naamin dan nengeg̵erà. 10Ne zutun, is mid-akal kandan he si Setanas, intimbag sikandin diyà te ranew he egkeregreg te esupri he zutun itimbag sikan is langgam wey kes ebpeneuven ni Setanas ne zutun edresayen sikandan te maandew wey mezukilem te wazà pidtemanan.

Is Ketepusan he Kedhukum

11Ne zutun neehè ku is dekelà he meputì he pinuuwà te edhadì ne neehè ku zaan is ebpimpinuu zutun. Naawà is langit wey tanà diyà te etuvangan din ne nahanew ne kenè en maan sikandan egkeahà. 12Ne neehè ku is langun he menge minatey, deisey is pid-etawan din se zekelà is pid-etawan din he ziyà ebpemenhithitindeg te etuvangan te pinuuwà te edhadì. Ne mibekar is menge libru ne mibekar zaan is libru he zutun ilista is egkengeveg̵ayan te untung. Ne mibpemekar zaan is menge zuma he menge libru he zutun isurat is mid-ulaula te menge etew hein uuyag dan pa su edhukuman sikandan tenged te mid-ulaula zan su nekesurat dutun te menge libru. 13Nekelepew is menge minatey he ziyà ebpuun te zag̵at wey ziyà te tanà he ziyà is menge g̵imukud dan te Iveyaan. Ne midhukuman sikandan langun tenged te mid-ulaula zan. 14Ne zutun, is langun he ebpuun te ed-ubpaan te menge minatey, in-agbur is lawa zan wey g̵imukud dan diyà te ranew he egkeregreg. (Ne haazà is ranew ne iyan kes ikezuwa he kemetayan.) 15Is minsan hentei zutun he wazà ilista is ngazan din diyà te libru te untung, in-agbur zaan sikandin diyà te ranew he egkeregreg.

Currently Selected:

Impezayag 20: mbbNT

Highlight

Copy

Compare