Impezayag 15
15
Is Menge Velinsug̵uen he Ed-uwit te Pitu he Kelasi te Kemeresayan
1Ne zutun neehè ku ziyà te langit is selakew pa he utew zekelà he egkein-inuwan he iyan kebpeelunga te egkeulaula. Duen pitu he velinsug̵uen ne is kada sevaha kandan, ne egkulangan te idrasey zin te menusiyà. Ne emun egkeulaula en heini ne egketapus en is idsilut kandan te Megbevayà dini te kelibutan.
2Ne neehè ku zutun is henduen be te zag̵at he ispihu he nesahug te hapuy. Ne neehè ku zaan is menge etew he nemekezaag te mekehandekhandek he langgam su wazè dan sikandin ezapa. Wazè dan med-azap dutun te ledawan din ne wazè dan daan mebpemarka te lumiru te ngazan din. Dutun dan ebpemenhithitindeg te uvey te zag̵at he ispihu. Ne zuen egewezan dan he menge arpa he imbeg̵ey kandan te Megbevayà. 3Ne egkentahan dan is kentahan duen te sulug̵uen te Megbevayà he si Moises he iyan sikan is kentahan he idalig dutun te nati he kerehidu. Ke sikandan te,
“Sikew is Megbevayà,
mekeg̵eg̵ehem ka he Nengazen te langun.
Utew zekelà wey utew egkein-inuwi is langun he menge vaal nu!
Hadì ka te langun he menge g̵inhedian.
Metazeng wey tutuu is menge ulaula nu!
4Ne edtehuzen ka te langun he menge etew
ne ebentug̵en dan is ngazan nu te Nengazen.
Su iyan ke zà wag̵as he Megbevayà.
Edhendiyà te kenikew is langun he menge etew te minsan hendei he g̵inhedian ne ed-ezapen ke zan su nevantug en is menge vaal nu he memetazeng.”
5Ne neipus haazà, neehè ku he nepuwasan is simbahan diyà te langit ne ziyà te seled din, neehè ku is rug̵u he zutun is tuus te g̵ehem te Megbevayà. 6Ne zutun te simbahan migawas sikan is pitu he velinsug̵uen he egkulangan te pitu he menge ibpenrasey te menusiyà. Midsun-uzan sikandan te manggad he utew meputì ne vevakes sikandan te vulawan. 7Ne is sevaha zutun te heepat he linimbag he kedesenan, imbeg̵ey zin dutun te pitu he velinsug̵uen is pitu he menge vulawan he lediyà he nepenù te pauk te wazè din pidtemanan he Megbevayà. 8Ne zutun nepenù is simbahan te evel he ebpuun te anlag wey g̵ehem te Megbevayà. Ne zutun wazà ebpekeseled dutun te simbahan taman te kenè pa egketapus haazà is kepipitu he kedresaya te menusiyà he ibpaag̵i te pitu he velinsug̵uen.
Currently Selected:
Impezayag 15: mbbNT
Highlight
Copy
Compare
Share
Want to have your highlights saved across all your devices? Sign up or sign in
© 2001, Wycliffe Bible Translators, Inc., All rights reserved.
