Pilipus 2

Is Kineiya ni Jesu Kristu

1Menge suled, netuenan ku he ingkeheg̵et te kedtuu niw is kebpekidsevaha niw ki Kristu, ne netuenan ku zaan he naawà is menge keseengan niw mehitenged te hizu zin keniyu. Ne netuenan ku zaan he neupakat kew pinaag̵i te Wag̵as he Mulin-ulin, ne ebpekedhihizuwè kew wey ebpelimlimuey kew is menge tumutuu. 2Ne tenged kayi te langun edhengyuan ku sikiyu he tug̵uti niw he mepurung mesevaha is isip niw wey g̵ehinawa niw, ne heg̵eta niw is kebmahala niw ziyà te g̵ehinawa niw te menge zuma niw. Ne emun ed-ul-ulahan niw heini human egkeheg̵et is kelipey ku tenged keniyu. 3Kinahanglan he kenà kew mebpekidlawan ne kenè kew mebpelavew, kekenà, isipa te minsan hentei keniyu he minus is pid-etawan din kenà te zuma zin. 4Kenè niw iyan dà isipa is keniyu he egkinehenglanen, kekenà, isipa niw zaan is egkinehenglanen te menge zuma niw. 5Kinahanglan he iring is isip niw te isip ni Jesu Kristu.

6Su minsan ke kenà egkeawà diyà te kandin is kegkemegbevayè din wazè din

isipa he kenè din ed-ewaan is kebpekesavuk din te zekelà is keg̵ehem din he Megbevayà,

7kekenà, mid-ewaan din ne mibpaanak te etew, ne nehimu he sulug̵uen te Megbevayà.

8Ne zutun te etew en sikandin wazà sikandin mebpelavew,

kekenà, mibpezumazuma sikandin te menge sug̵ù kandin te Amey zin

he Megbevayà minsan pa te pinaag̵i kayi inransang sikandin te krus ne zutun mibpatey.

9Ne tenged kayi midhimu en sikandin te Megbevayà he utew lavew,

ne migeraran din sikandin te g̵erar he lavew pa te minsan hengkey he g̵erar te minsan hentei.

10Ne umba mid-ulaula heini te Megbevayà su ke egkezineg is gerar ni Jesus,

ed-ezapen si Jesus te minsan hentei he linimbag he ziyà te langit wey zini te tanà,

wey minsan diyà te Iveyaan. Ebpekeluhud dan kandin,

11ne ebpekekag̵i zan he iyan si Jesu Kristu Nengazen te minsan hengkey.

Ne pinaag̵i kayi egkevantug dan daan is Amey tew he Megbevayà.

Is Sulù Dini te Kelibutan

12Ne umba, menge suled, iring te layun kew ebpememineg te menge sug̵ù ku, ne kenà dutun dà te kebpekiduma ku keniyu, kekenà, minsan te wazà a ziyan te keniyu, ne iring din ded daan guntaan kinahanglan is uman sevaha keniyu, ne himuwa zin is taman te egkehimu zin he edumahan te kegkehandek te Megbevayà su wey mepasad haazà is nepuunan en te Megbevayà te kedlibriya zin keniyu te silut. 13Su layun edtavang keniyu is Megbevayà wey niw mesuati ne wey niw mehimu is kedtumana te tuyù din diyan te keniyu.

14Is langun he ebpeveelan din keniyu, tumana niw te wazà kebpeneremudtemud wey kebelivad. 15Ne zutun, wazà mezaat diyan te keniyu su meupiya is ulaula niw su menge anak kew te Megbevayà he wazà igkesewayi zin keniyu, minsan te zini kew pa mekeubpà te kelibutan te teliwazà te lalung he menge etew he kenà memetazeng is menge ulaula. Iring kew te menge sulù 16he edtayew kandan su ibpesavut niw kandan is lalag he ebpekeveg̵ey kandan te untung he wazà pidtemanan. Ne emun iyan heini ed-ul-ulahan niw, utew ebmeupiya is g̵ehinawa ku keuzemà dutun te andew te kedlikù ni Kristu su egketuenan ku zutun he zekelà is pulus te kedhag̵ù ku ziyan te keniyu.

17Is kedtuu niw te Megbevayà, ne iring te pemuhat he edewaten din. Ne emun egkesuatan din pa he id-uman is kebpatey ku kayi te pemuhat, igkelipey ku pa. Ne igkelipey ku zaan is kedtuu niw iring te nelipey kew. 18Ne iring din ded daan, kinahanglan he igkelipey niw zaan is kebpatey ku emun egkehitavù kediey.

Si Timoteo wey si Ipepruditu

19Dekelà is kedsarig ku te Nengazen tew he si Jesus he meg̵aan ku en egkesug̵ù diyan te keniyu si Timoteo. Ne emun ebpekelikù en dini, egketuenan ku ke hengkey is kebpekesavuk niw. Ne utew heini ibmeupiya te g̵ehinawa ku. 20Iyan dà sikandin duma ku kayi he utew zekelà is gehinawa zin keniyu. 21Is duma, ne iyan dà egkeisip dan is kandan dà he egkesuatan, ne kenà iyan is egkesuatan ni Jesu Kristu. 22Si Timoteo, netuenan niw he hustu is menge ulaula zin. Iring sikandin te tutuu he anak ku te kedtevangi zin kedì te kedsengyawa kayi te Meupiya he Tudtulanen. 23Umba, emun egketuenan ku en ke hengkey is egkehitavù kedì kayi, egkesuatan ku he segugunè ku sikandin mesug̵ù diyan. 24Ne zekelà daan is kedsarig ku te Megbevayà he meg̵aan a zaan ebpeketelukun kandin.

25Ne elin daan kayi te isip ku he kinahanglan he ibpehendiyan ku is suled tew he si Ipepruditu, kes midsug̵ù niw pehendini wey e zin metevangi. Iyan sikandin duma ku wey timbang ku kayi te ebpeveelan kedì te Megbevayà. 26Umba ibpehendiyan ku su utew sikandin ebulunga keniyu ne utew inmezaat te g̵ehinawa zin is nezineg niw he tudtul he nezeruwan sikandin. 27Netigbak iyan sikandin is midaru umba kunaan ku ke ibpatey zin en, iyan, nehizuwan sikandin te Megbevayà. Ne nehizuwan a zaan te Megbevayà su ke mibpatey sikandin, neumanan en geina is menge seeng ku. 28Umba utew ku egkesuati heini is ked-ulì din diyan su wey kew melipey te kebpekeuma zin ne pinaag̵i kayi egkeawà daan is kedì he kegkeseeng. 29Umba, kinahanglan he meg̵alew kew te kebpekeuma zin su suled tew sikandin tenged te kedtuu zin te Nengazen. Is langun he iring kayi he etew, tehuza niw 30su hapit sikandin ebpatey wey zin metuman is ebpeveelan kandin ni Kristu. Inserakan din is untung din wey e zin metevangi su zutun he timpu kenà a keniyu egketevangan.

Currently Selected:

Pilipus 2: mbbNT

Highlight

Copy

Compare