Hibriyuhanen 6

1Ne tenged dutun, menge suled, netengkaan en is ked-istudyuwi tew zuen te menge nehuna he melemu he tuluuwen he impenurù kenitew mehitenged ki Kristu. Kinahanglan he edlaus kiw en dutun te ked-istudyu te menge penurù he zait te menge etew he mezesen en is kedtuu zan. Kenè tew ed-ul-ulitan te ed-istudyu is menge nehuna he impenurù kenitew iring te ked-engkezi te kedsarig te menge ulaula he wazà pulus, wey is kedtuu te Megbevayà. 2Kenè tew ed-ul-ulitan is ked-istudyu te kebpemewtismu, wey is kedewata te Wag̵as he Mulin-ulin, is kegkevenhawa kenita keuzemà, wey is kedsusiya te Megbevayà keuzemà te tivuuk he menusiyà, 3kekenà, emun idtug̵ut te Megbevayà, edlaus kiw en te ked-istudyu te menge penurù he zait te menge etew he mezesen en is kedtuu zan.

4-6Su penenglitan duen menge etew he neteyawan te Megbevayà is isip dan. Nesavut dan en ke hengkey is ibeg̵ey kenitew ziyà te langit, ne nekeambit dan en te g̵ehem te Wag̵as he Mulin-ulin, ne netuenan dan en is meupiya he impesavut te Megbevayà, ne neehè dan daan is egkehimu te g̵ehem he ibpaahà te Megbevayà keuzemà te ketepusan he timpu. Ne emun ed-iniyug̵an dan heini kenè en egkehimu he ibpelikù dan ibpeuman wey zan meiniyug̵i is mezaat he menge ulaula zan. Henduen be te in-uman dan iransang diyà te krus is Anak te Megbevayà ne edhimuwen dan he sumpelita sikandin te menge etew.

7Su sikitew is menusiyà, ne iring kiw te tanà. Ne is tanà he layun ed-uzani ne memelambeg is menge pinemula zuen, ne zekelà is pulus kayi ziyà te teg̵itanà. Ne is etew he iring dutun te tanà, edtuvazan sikandin te Megbevayà. 8Iyan, ke zuen tanà he iyan dà ebpeketuvù duen is menge zug̵iyen he sagbet wey menge hilemunen, ne wazè din pulus, ne ed-engkezan, ne ebinsulan te teg̵itanà. Ne iring din ded daan is etew he iring kayi te tanà su edsilutan te Megbevayà.

9Na, menge minahal ku he menge suled, minsan pa te iring kayi is menge lalag ku keniyu, netuenan ku he meupiya pa mulà is egkezungguan niw su netuenan ku he zekelà is pulus te kedlibriya keniyu te Megbevayà. 10Su kenà egkehimu he kenà metazeng is kedsusiya keniyu te Megbevayà; su kenà egkehimu he egkelipatan din is langun he meupiya he mid-ulaula niw tenged te mahal sikandin diyà te g̵ehinawa niw su midtevangan niw is menge zuma tew he tumutuu ne minsan guntaan wazè niw engkezi is kedtevangi niw kandan. 11Ne is kada sevaha keniyu, egkesuatan dey he kenè niw zaan engkezi is kedhag̵ù niw taman te kedlikù ni Jesus dutun te ketepusan he timpu keuzemà su wey zutun metuman diyan te keniyu is langun he meupiya he ebpeebuten tew. 12Kinahanglan he kenè kew mebpetetapul, kekenà, iringi niw is menge etew he meinentusen he edtuu te Megbevayà su tenged kayi egkezawat dan is impenaad te Megbevayà.

Is Penaad te Megbevayà wey is Kedlig-eni Zin te Penaad Din

13Isipa niw si Abraham. Dutun te kebpenaazi kandin te Megbevayà, is Megbevayà, ne wazà duma he ngazan he neg̵amit din te kedlig-eni zin te penaad din, kekenà, migamit din is kandin he keugelingen he ngazan su wazà lavew kandin. 14Ne pinaag̵i te kandin he ngazan migkag̵i sikandin diyà te ki Abraham te, “Kenè en ebperis he edtuvazan ku sikew te meupiya ne ebmezakel utew is menge kevuwazan nu.” 15Ne si Abraham, utew sikandin meinentusen he edsarig te Megbevayà taman te netuman te Megbevayà is penaad din kandin. 16Ne emun duen penaad te etew zà duen, iyan idlig-en din te penaad din is: duen lavew kandin he ibpepirma zin zutun te penaad din. Ne emun iyan heini ed-ul-ulahan din dutun te husayen, ebpeketuu te lalag din is ebpemineg dutun te penaad din. 17Ne egkesuatan dengan te Megbevayà he mesavut te menge etew he mibpenaazan din he kenà duwazuwa he edtumanen din is penaad din kandan, ne tenged kayi midlig-enan din is penaad din. 18Ne zuen dezuwa he ulaula te Megbevayà he kenà egkehalin te minsan hentei. Is sevaha, ne iyan is penaad din, ne is sevaha, ne iyan is kedlig-eni zin te penaad din. Ne pinaag̵i kayi te zezuwa egkesavut ta he kenà egkehimu he kenè din edtumanen is penaad din. Ne tenged kayi, sikitew is nemekeaput diyà te kandin, utew meheg̵et is kedsarig tew kandin ne tenged kayi edhemenan tew is kebpeebuta tew te langun he meupiya he impenaad din kenitew. 19,20Ne utew mezesen wey nelig-enan heini is kebpeebuta tew he edtumanen te Megbevayà is penaad din su iyan edserig̵an tew is Megbevayà. Ne si Jesus, ne nehimu en sikandin he zatù tew ne ziyè en sikandin te etuvangan te Megbevayà. Ne nehimu en si Jesus he lavew he memumuhat tew he wazè din pidtemanan he iring te memumuhat dengan he si Milkisidik.

Currently Selected:

Hibriyuhanen 6: mbbNT

Highlight

Copy

Compare