2 Kurintu 10

Is Ketezengan ni Pablo Mehitenged te Ketengdanan Din

1Duen egkag̵i he siak, si Pablo, telawen a emun diyan a te keniyu, iyan, memeg̵arang kun is menge lalag ku keniyu emun edlelag̵an ku sikiyu pinaag̵i te surat. Iyan, guntaan, kenà meg̵arang is menge lalag ku, kekenà, edhangyù a keniyu pinaag̵i te menayù he menge lalag iring te menayù wey velig̵eg̵awen si Kristu. 2Idhangyù ku keniyu he purungi niw is ulaula niw su wey kenà kinahanglan he mebmeg̵arang is menge lalag ku emun diyan a te keniyu. Duen duma keniyu he egkag̵i he iring a te etew zà duen he kenà dekelà diyà te g̵ehinawa zin is egkesuatan te Megbevayà. Ne hanu man su kayi te kedhendiyan ku te keniyu emun kenè dan ebpurungan is menge ulaula zan, ne egkeehè dan ke sengemenu keg̵arang is menge lalag ku. 3Tutuu iyan he etew key zà duen, iyan, is paag̵i te kedsukuli zey te mezaat, ne kenà ebpuun te isip te etew zà duen. 4Su is menge ketezengan, he ke và dà gumaan, he idsukul zey te mezaat, ne kenà ebpuun te etew, kekenà, mekeg̵eg̵ehem utew su ziyà ebpuun te Megbevayà. Ne heini is menge ketezengan, kenà egkesukulan te minsan hengkey he tarù he ketezengan he igkuntada te Megbavayà minsan ke utew melig-en. 5Ne iyan heini egemiten dey te kedeeg̵a te menge tarù he ketezengan te menge mepedelig̵en he etew he kenà egkesuat he edtuu te ibpesavut te Megbevayà. Ne minsan is ked-isipa zan te tarù, egkehimu he ed-ilisan dey su wey zan human meisip is tutuu ne pinaag̵i kayi ebpemineg̵en dan is menge sug̵ù ni Kristu. 6Ne emun ibpeehè niw en he metinumanen kew te menge sug̵ù ni Kristu, ne zutun edsilutan dey is minsan hentei pa he tumutuu ziyan he kenè pa egkesuat he ebpemineg te menge sug̵ù din.

7Purungi niw isipa is nesavut niw en su zuen menge zuma niw he kunaan dan ke iyan dan dà menge hustu he sulug̵uen ni Kristu. Kinahanglan he mesavut dan he sikami, hustu key zaan he menge sulug̵uen ni Kristu. 8Kenè en buwa kinahanglan he egkeg̵iyen ku keniyu he zuen kebayàbayà ku keniyu he imbeg̵ey kedì te Megbevayà. Iyan, ke henduen be te utew subra is idantal ku, kenè ku igkeeled heini su wazè din iyan iveg̵aya kayi te kebayàbayà dini te kediey su wey ku mezezeeti is kedtuu niw, kekenà, imbeg̵ey zin kediey su wey ku melig-eni is kedtuu niw. 9Kenè ku egkesuatan he ibpelihandek ku keniyu is menge surat ku, 10iyan, duen egkag̵i he siak si Pablo, utew a mevurut he edawey keniyu emun ebpekidlalag a keniyu pinaag̵i te surat, iyan, emun diyan a te keniyu, telawen e kun ne kenè e kun metau he egkag̵i. 11Is etew he egkag̵i te iring kayi, kinahanglan he sevuta zin he is egkeg̵iyen dey pinaag̵i te surat emun kenè key ziyan te keniyu, ne iyan ded ed-ul-ulahan dey emun ebpekeuma key ziyan.

12Telawen key iyan te ked-iring te menge ulaula te menge zuma he etew ziyan he menge mepedelig̵en. Kunaan dan ke iyan sikandan metau egkag̵i ke hengkey is meupiya he ulaula. Utew zan tulebung! Su emun ed-iringan te menge etew is kandan he ulaula egkeg̵iyen dan he utew meupiya. Iyan, ke kenà sikandan ed-iringan te menge etew egkeg̵iyen dan he sayep haazà is kenà ed-iring. 13Ne sikami, kenà subra is kedantal zey su iyan dey zà idantal haazà is nehimu zey te edtuman he insug̵ù kenami te Megbevayà. Ne ragkes kayi is menge vaal zey hein diyan key te keniyu. 14Kenà egkehimu he subra is kegemita zey te keg̵ehem dey emun edsembag̵an dey sikiyu. Kenè dey sikiyu pezem egkeveyveyaan ke wazè dey sikiyu mepenudtuli zengan, iyan, iyan key nehuna he nekeuma ziyan he ebpenudtul te Meupiya he Tudtulanen mehitenged ki Kristu. 15Kenè dey idantal is menge vaal te zuma he etew ziyà te menge inged he zutun wazè key sug̵ua te Megbevayà. Iyan, geina te neragkes kew kayi te mibpeveelan kenami te Megbevayà, egkesuatan dey he emun ed-iseg en is kedtuu niw ne edtevangan key keniyu zutun te menge vaal zey ziyan te inged niw. 16Ne pinaag̵i kayi egkehimu he idsangyew zey is Meupiya he Tudtulanen ziyà te menge meziyù he inged he ziyan dapit te keniyu. Su kenè dey egkesuatan he idantal zey is mibeelan te zuma he etew zutun te menge inged he wazè key zutun sug̵ua te Megbevayà.

17Duen insurat he Lalag te Megbevayà he edhenduen te, “Ke zuen etew he egkesuat he edantal, kinahanglan he iyan dà idantal zin is nengehimu te Nengazen.” 18Su emun edelig̵en ta is kenita he menge vaal, kenà heini egkesuatan te Megbevayà, iyan, emun duen igkezelig̵i kenita te Megbevayà iyan heini egkesuatan te Megbevayà.

Currently Selected:

2 Kurintu 10: mbbNT

Highlight

Copy

Compare