1 Pedro 5

Is Menge Tumutuu te Megbevayà

1Sikiyu is ebmeg̵urangen te menge tumutuu, duen idhangyù ku keniyu su ebmeg̵urangen a zaan. Nekevantey a te kedresaya zengan ki Kristu ne iring keniyu, ebpekeseled a zaan te vulawan he ed-ulian he ibpeg̵awag̵awa keuzemà. 2Ne iyan idhangyù ku keniyu is: purungi niw elimahi is menge tumutuu he insarig keniyu te Megbevayà. Iring sikandan te menge kerehidu zin. Iyan kew edumala kandan, kenà iring te ebpeg̵esen kew, kekenà, kinahanglan he ebpuun te meliwanag he g̵ehinawa niw su iyan haazà egkesuatan te Megbevayà. Kinahanglan he kenà iyan dà id-elimahi niw kandan is tenged te edsuhulan kew zan, kekenà, tenged te egkesuat kew he edtavang kandan. 3Kenè kew medhadìhadì kandan te insarig keniyu, kekenà, eg̵aka niw sikandan su wey iyan kew zan edsunuzen te menge meupiya he ulaula. 4Ne emun edlikù si Jesus, sikan is lavew he ed-elima te menge kerehidu te Megbevayà, duen idsuhul zin keniyu he iyan is kebpekeambit niw te utew zin kegkelavew he kenà egkehanew.

5Sikiyu menge menguhed, edhengyuan ku sikiyu he pevayàbayè kew te menge ebmeg̵urangen. Kinahanglan he kenè kew mepelevawen, kekenà, mebpetebtevangè kew su zuen insurat he Lalag te Megbevayà he edhenduen te, “Kuntada te Megbevayà is mepelevawen, iyan, igkehizu zin is kenà ebpelavew.” 6Ne tenged dutun kinahanglan he kenè kew mepelevawen, kekenà, pevayàbayè kew te Megbevayà he mekeg̵eg̵ehem ne edhimuwen kew zin he utew lavew keuzemà te hustu he timpu. 7Isarig niw ziyà te kandin is minsan hengkey he seeng niw su iyan sikandin ed-elima keniyu.

8Med-andam kew, mebantey kew su is kuntada tew he si Setanas, edrig̵urig̵u en he iring te erimaung he edhinig̵er su ebpen-ahà te edewiyen din. 9Sukuli niw sikandin, ne hamen kew sarig te Megbevayà su netuenan niw he is menge zuma niw he tumutuu zini te tivuuk he kelibutan, ebpekeantus dan daan te merasey he iring te egkeantus niw. 10Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin. 11Berakat he zelig̵a sikandin te wazà pidtemanan su iyan sikandin mekeg̵eg̵ehem.

Is Pengemusta

12Mid-ug̵upan a ni Silvanu te edsurat kayi. Suled tew sikandin he utew egkeserig̵i. Iyan insurati ku keniyu kayi su wey ku meheg̵et is kedtuu niw. Ibpesavut ku keniyu he impenurù ku en keniyu he tutuu is gag̵ew te Megbevayà keniyu. Ne kenè niw heini lipati.

13Ebpengemusta keniyu is menge tumutuu zini te inged he Bebilunya. Pinilì sikandan te Megbevayà iring te pinilì kew zin daan. Ebpengemusta zaan keniyu si Marcos he iyan iring te tutuu he anak ku. 14Mebpelimlimuey kew.

Mebmelinawen is gehinawa te uman sevaha keniyu he nekidsevaha ki Kristu.

Currently Selected:

1 Pedro 5: mbbNT

Highlight

Copy

Compare