1 Kurintu 15
15
Is Ketudluanan Mehitenged te Kegkevanhew ni Jesu Kristu
1Ne g̵untaan, menge suled ku te kedtuu, ed-umanan ku sikiyu te ebpenurù mehitenged te Meupiya he Tudtulanen he impesavut ku zengan keniyu, ne midtuuwan niw ne midhemenan niw. 2Ne pinaag̵i kayi te Meupiya he Tudtulanen he impenurù ku keniyu, egkelibri kew te silut te Megbevayà emun kenè niw ed-engkezan. Su emun ed-engkezan niw kenè bes hustu is kedtuu niw.
3Ne lavew kayi te langun he impesavut ku keniyu, haazà is impenurù daan kediey. Ne iyan is: si Kristu, mibpehimatey su wey kiw melibri te silut mehitenged te menge salè tew sumalà is impesavut dengan te insurat he Lalag te Megbevayà. 4Impesavut ku zaan he inleveng sikandin ne seled te tetelu he andew zutun nevanhew sikandin. Impesavut daan heini zengan te insurat he Lalag te Megbevayà. 5Ne mibpaahà sikandin ki Pedro ne zutun mibpaahà daan te menge epustul zin. 6Ne zutun mibpaahà daan sikandin te subra he lelima he g̵atus he nengetig̵um he menge sumusundan din. Ne kemulu pa uuyag guntaan is kezekelan kayi ne is duma nemematey en. 7Ne netapus heini is kebpaahaa kandan, mibpaahà sikandin ki Santiago ne zutun mibpaahà med-uman te langun he menge epustul.
8Ne siak daan, iyan a ketepusan en he mibpaahaan din. Ne zutun te kebpeketuu ku iring a te vatà he neteg̵el is ked-enaka kandin su minsan te kenà a pezem edtuu zutun, neketuu a g̵ihapun. 9Nelevawan a te langun he menge zuma ku he menge epustul su te wazè e pa meketuu midlupiglupig ku te pesipala is menge tumutuu ki Jesus, ne tenged kayi kenà a pezem dait he egeraran he epustul. 10Iyan, utew zekelà is hizu kediey te Megbevayà. Umba nehimu a he epustul su zuen pulus te kegkehizuwi zin kediey. Tenged kayi, dekelà is nehimu ku kenà te nehimu te langun he menge zuma ku he epustul, asal, kenà a iyan is nekehimu kayi, kekenà, nehimu heini is langun pinaag̵i te tavang te Megbevayà. 11Ne heini is tuluuwen he ibpesavut dey, wazà utew dipirinsya ke minsan hentei kenami te menge epustul is ebpenurù kayi ziyan te keniyu, su iyan ded tuluuwen he ibpesavut dey te langun ne iyan ded daan midtuuwan niw.
Is Kegkevanhew te Menge Tumutuu
12Ne iyan impenurù dey keniyu is: nevanhew si Kristu. Ne tenged kayi, maan is egkeg̵iyen te zuma keniyu he kenà egkengevanhew keuzemà is menge minatey? 13Su emun kenà egkehimu he egkengevanhew is menge minatey wazà daan mevanhew si Kristu. 14Ne emun wazà mevanhew si Kristu ne wazè en tuluuwen he igkepesavut dey ne wazè niw zaan egketuuwan. 15Ne kenà duen dà taman su emun iyan haazà, ne egkehimu key he menge teruen he sulug̵uen te Megbevayà su impenurù dey he is Megbevayà, mibanhew zin si Kristu, iyan, emun tutuu he kenè din ebenhawen is menge minatey, wazè din en benhawa si Kristu. 16Su emun kenà egkehimu he egkengevanhew is menge minatey, ne wazè en daan mevanhew si Kristu. 17Ne ke wazà mevanhew si Kristu neketuu kew te tarù, ne kenè en egkehimu he egkelibri kew te silut tenged te menge salè niw. 18Ne haazà is menge zuma tew he tumutuu he nemematey en, wazè en daan paag̵i he melibri pa sikandan, kekenà, egkesilutan sikandan gihapun. 19Sikitew is tumutuu he uuyag pa, ne zuen egkeperateng tew keuzemà diyà te langit he meupiya pinaag̵i ki Kristu, iyan, ke tarù heini ne iyan kiw mekehizuhizu he menge etew zini te tivuuk he kelibutan su neketuu kiw te tarù.
20Iyan, tutuu is egkeg̵iyen ku he nevanhew iyan si Kristu. Ne tenged kayi egketuenan tew he tutuu iyan he egkengevanhew zaan keuzemà is menge minatey su nehuna man mevanhew si Kristu. 21Umba ebpematey is langun he menge etew su tenged te mid-ulaula te nehuna he etew he si Adan. Ne iring din ded daan, iyan igkengevanhew keuzemà te menge etew he tumutuu su tenged te mid-ulaula te etew zed daan he iyan si Kristu. 22Ebpematey is tivuuk he menusiyà su g̵eina te nepengevilin tew te kepuun tew he si Adan is kemetayen. Ne iring din ded daan sikitew is langun he nesakup ki Kristu, egkengevanhew kiw keuzemà su iyan daan nesunud tew puun te egalen tew he si Kristu. 23Iyan nehuna he nevanhew, si Kristu. Ne sikitew is menge sakup din, iyan kiw huziyan kandin he egkevanhew zutun te kebpekelikù din keuzemà. 24Ne zutun te egkeuma is ketepusan he andew he zutun id-awà ni Kristu is minsan hengkey he kuntada zin he edhadì wey ebayàbayà wey zuen din gehem. Ne zutun ibeg̵ey zin diyà te Amey zin he Megbevayà is keg̵ehem din te kedhadì. 25Ne te kenè pa haazà egkeulaula, kinahanglan he edhadì dè pa si Kristu taman te timpu he ed-eminen din edaag̵a is menge kuntada zin. 26Haazà is ketepusan he kuntada he id-awà ni Kristu ne iyan is kemetayen te menusiyà. 27Su zuen insurat he Lalag te Megbevayà he edhenduen te, “Is Megbevayà, ebpehedian din ki Kristu is minsan hengkey.” Ne egketuenan ta he haazà is egkeg̵iyen he “minsan hengkey,” ne wazà iragkes is Megbevayà dutun te minsan hengkey he edhedian ni Kristu. 28Su emun egkesakup en keuzemà ni Kristu is langun, ne zutun ebpesakup daan si Kristu te Megbevayà he iyan kes mibeg̵ey kandin te keg̵ehem te kedhadì te langun. Ne zutun iyan edhadì te minsan hengkey is Megbevayà.
29Ne heini pa zaan su emun kenà egkengevanhew is menge minatey, hengkey is pulus dutun te ulaula te menge etew he ebpebewtismu he elili te menge zuma zan he minatey en? Maan is ebpebewtismu zan ke kenà ebenhawen te Megbevayà is menge minatey? 30Ne sikami zaan, hengkey is pulus din dini te kenami ke kenè kiw egkengevanhew keuzemà? Su maan is ed-entusen dey pa is utew piligru. 31Su andew-andew, menge suled, egkeisip ku he kela ke edhimetayan a te menge kuntada te Megbevayà. Utew tutuu heini, menge suled; tutuu zaan he utew ku sikiyu igkelipey tenged te kedtuu niw te Nengazen tew he si Jesu Kristu.
32Utew mezakel is kemeresayen ku zini te Ipisu su iring is menge kuntada ku te menge ebpekekaid he langgam he egkesuatan e zan te edaas. Ne maan is ed-entusen ku pa is iring kayi ke kenà a keuzemà egkevanhew. Su emun iyan haazà ne meupiya pa ke edtumanen ku haazà is erubasa he edhenduen te, “Edlipey kiw en; ed-inum kiw ne egkaan kiw su kela ke meg̵aan kiw en ebpatey ne egkehanew heini is langun.”
33Iyan, kenè niw itug̵ut he meketuu kew te iring kayi su tarù. Tutuu iyan is erubasa he egkag̵i te, “Emun ebpekiduma ka te etew he mezaat is ulaula zin ne egkeiringan nu is ulaula zin wey ked-isip din.” 34Likui niw is hustu he ked-isip ne engkezi niw is mezaat he ulaula. Netuenan ku he zuen duma niw ziyan he kemulu pa wazà mesayud ke hengkey is tutuu he tuluuwen mehitenged te Megbevayà. Igkeeled niw pezem heini.
Is Lawa he Ilengiten
35Ne ke penenglitan duen etew he ed-insà ke ebmenmenuwen te Megbevayà is kebenhawa zin te menge minatey wey ke hengkey is lawa zan dutun, 36ne iyan tavak ku is: kenè bes metau he ed-isip-isip haazà is etew. Su emun ibpemula ta is benì diyà te tanà, ne kinahanglan he egkehalin is lawa zutun te venì. Su egkezeetan haazà is benì ne human edtuvù. 37Ne haazà is ibpemula ta, ne venì dà duen. Egkehimu he parey is ibpemula ta, ne emun kenà, ne zuma pa he ibpemula. Iyan, haazà is benì he impemula, ne kenè en iyan sikan is lawa zin dutun te kedtuvù din. 38Ne zaan he midhimu te Megbevayà ke hengkey is lawa he egkehimu te kada kelasi te venì he ibpemula. Is kada venì, ne zuen kandin he lawa he egkehimu ke edtuvù en.
39Ne iring din ded daan is lawa te minsan hengkey he linimbag he zuen din gehinawa su kenà ebpeked-iiring. Emun etew ne sengekelasi is lawa zin, emun langgam ne sengekelasi zaan, ne iring din ded daan is tagbis wey pait su selakew zaan.
40Ne mezakel is linimbag te Megbevayà dini te tanà wey ziyà te langit. Ne pudu mekempet is menge linimbag din, iyan, kenà ebpeked-iiring-iring is kekempet te kada sevaha. Selakew is kekempet te menge linimbag din diyà te langit ne selakew zaan is kekempet te langun dini te tanà. 41Sengekelasi is kekempet te kedsilà te andew, selakew is kekempet te ked-anlag te vulan, ne selakew zaan is kekempet te menge vituen. Ne minsan is menge vituen, ne kenà ebpeked-iiring-iring is kekempet dan te kada sevaha.
42Ne keuzemà ke egkengevanhew is menge minatey, egkengehalin daan is menge lawa zan. Su umba idleveng is lawa te etew su egkezeetan, iyan, ke egkevanhew keuzemà kenè en maan egkezeetan te wazà pidtemanan. 43Ne haazà is lawa tew, dutun te kedlevenga kayi, ne kenà meupiya he ed-ahaan ne wazè din en pulus, iyan, ke egkevanhew ne utew mekempet ne utew mezesen. 44Dutun te kedlevenga kayi te lawa ne kelibutanen dà heini, iyan, ke egkevanhew, ne veg̵u en maan he lawa he zait he ed-ubpà diyà te langit su midtulus en. Ke zuen lawa he kelibutanen, kinahanglan daan he zuen lawa he zait he ebpekeubpà diyà te langit. 45Su zuen insurat he Lalag te Megbevayà he edhenduen te, “Haazà is nehuna he etew he si Adan, ne mibeg̵ayan te Megbevayà is lawa zin te g̵ehinawa su wey mekeubpà dini te tanà.” Iyan, si Kristu mulà, haazà is migeraran te huziyan he Adan, iyan sikandin ebeg̵ey te untung he wazà pidtemanan su wey kiw mekeubpà diyà te langit. 46Kenà iyan edhuna is untung he wazà pidtemanan diyà te langit, kekenà, iyan edhuna is untung ta zini te kelibutan ne human egkehimu is untung diyà te langit. 47Ne haazà is nehuna he etew he si Adan, linimbag sikandin ne is limbag̵an din ne iyan is tanà, iyan, haazà is etew he ed-ilis kandin he iyan si Kristu, ne ebpuun sikandin mulà diyà te langit. 48Ne sikitew is menge kevuwazan ni Adan, ne tanà daan is limbag̵an tew su tanà is limbag̵an te kandin he lawa. Iyan, sikitew zaan is menge sakup te etew he ebpuun te langit, ne ebpekeiring is lawa tew keuzemà te kandin he lawa. 49Su g̵eina te nekeiring is lawa tew te lawa te nehuna he etew he tanà is limbag̵an din, kinahanglan he ebpekeiring is lawa tew zaan te lawa ni Kristu he iyan sikan is etew he ebpuun diyà te langit.
50Iyan ibpesavut ku, menge suled, is: heini is menge lawa tew he zuen kemetayen, ne kenà egkehimu he egkeragkes keuzemà te langun he edhedian te Megbevayà su haazà is lawa he zuen din kemetayen, kenà egkehimu he ebeg̵ayan te untung he wazà pidtemanan.
51Pemineg̵a niw heini is daan he in-eles he impesavut kediey te Megbevayà. Duen duma kenitew te menge tumutuu he kenà ebpatey, asal, sikitew is langun, segugunà egkehalin is lawa tew. 52Su utew meg̵aan heini; iring dà te sengeperà te mata is kegkeulaula kayi keuzemà ke ibpezag̵ing te Megbevayà is budyung he tuus he iyan en ketepusan he andew tew zini te kelibutan. Su ibpezag̵ing haazà is budyung ne egkengevanhew is menge minatey. Egkengehalin is menge lawa zan ne kenè dan en ebpematey. Ne sikitew is uuyag pa, egkengehalin daan is menge lawa tew. 53Ne emun egkehitavù en heini, sikitew is duen din lawa he egkezeetan, ebeg̵ayan kiw te lawa he kenè en egkezeetan. Ne heini is lawa tew he zuen din kemetayen, ne egkeilisan te lawa he wazè din en kemetayen. 54Ne zutun, sikitew is duen din kemetayen, ne kenè kiw en human ebpatey ne egketuman en haazà is insurat he Lalag te Megbevayà he edhenduen te, “Nepurung en maawà is gehem te kemetayen.”
55“Wazè en kegkehandek tew te kemetayen su wazè en ebpatey.
Wazè en kegkeseeng tew
tenged te kemetayen
su neilisan en te untung
he wazà pidtemanan.”
56Umba egkehandek is menge etew te kemetayen su netuenan dan he emun ebpatey zan edsilutan sikandan tenged te mekesesalà sikandan. Ne maan is mekesesalà sikandan? Su g̵eina te nekesupak dan te kesug̵uan te Megbevayà. 57Ne minsan pa zutun egkehimu he edelig̵en tew is Megbevayà su tenged te mid-ulaula zin, nezaag tew en is kemetayen pinaag̵i te Nengazen tew he si Jesu Kristu!
58Na, menge mahal ku he menge suled, geina te iyan heini, heg̵eta niw is kedsarig niw te Megbevayà su wey wazà ebpekezezaat te kedtuu niw. Peniguduwi niw tumana is ebpeveelan keniyu te Nengazen; hag̵ù kew te taman te egkehimu niw su netuenan niw he emun iyan edtumanen niw is ebpeveelan te Nengazen, kenà egkehimu he wazà pulus te vaal niw.
Currently Selected:
1 Kurintu 15: mbbNT
Highlight
Copy
Compare
Share
Want to have your highlights saved across all your devices? Sign up or sign in
© 2001, Wycliffe Bible Translators, Inc., All rights reserved.
