Mat 8
8
Yesu opozya munthu wa mambombo
1Yesu peciseluka pa lupili, winji wimukonkha. 2Munthu wa mambombo ewela kwa yeve nofukama pafupi nolaŵila kuti, “Asikulu, mukapangwa munganisuke.”
3Yesu etambulula kwanja kwake nomukumya, nolaŵila kuti, “Nupangwa, sukiwa!” Pamene apo mambombo ŵake esukiwa.
4Yesu emuwuzya kuti, “Cenjela, usawuzye aliyense va ici, ingoluta kwa wansembe akakuwone, nipo ukatwale vecilamula Mose. Yamene iyo iŵe mboni yosimikizya kuti wapola cendi.”
Yesu opozya nyanchito wa msilikali wa Ciroma
(Lk 7:1-10; Yh 4:43-54)
5Yesu penzoloŵa mu Kapilinamu, sentuliyo mkulu wa asilikali ŵa Ciroma, ewela kwa yeve nomudandaulila kuti, 6“Asikulu, nyanchito wangu ali ku ngʼanda ni wakufwa vizo, nipo akumvwa kuŵaŵa ngako.”
7Yesu emuwuzya kuti, “Niwele kuzomupozya.”
8Koma mkulu wala eyasuka kuti, “Asikulu, nine wosawamila kuti muwele ku ngʼanda kwangu. Koma laŵilani tyala malizu, nipo nyanchito wangu apole. 9Newo nane nine munthu nili pansi pa ulamulilo. Koma soti nili na asilikali ŵanulamulila. Nikuti nikawuzya muyakine kuti, ‘Nkhoya,’ akuya cendi. Nikawuzya soti muyakine kuti, ‘Wela,’ owela cendi. Nipo nikawuzya nyanchito wangu kuti, ‘Cita cakuti,’ ocicita cendi.”
10Yesu pecimvwa ivi, ekanganishiwa naye, nowuzya ŵanthu enzomukonsha kuti, “Nukuwuzyani vyendi, mu Isilayeli niliyofwanemo cicetekelo coteti. 11Nukuwuzyani kuti anyinji akafume ku mmawa na ku mcingulo nonkhala nawo pa malyelelo na Abulahamu, Isaki na Yakobo mu Ufumu wa Kululu, 12pamene ŵana ŵa pa calo akapozewe mu mfinzi ya kunja. Ku malo ŵala kukaŵe kulila nokukuta menu.”
13Yesu ewuzya mkulu wa asilikali kuti, “Nkhoya. Cicitike ngani mwawacetekela.” Nipo nyanchito wala epola pa nsita yamene iyo.
Yesu opozya ŵanthu anyinji
(Mk 1:29-34; Lk 4:38-41)
14Yesu peciloŵa mu ngʼanda mwa Petulo, ewona anyavyala ŵa Petulo enze lele, enzolwala malungo. 15Eŵakata kwanja, nipo malungo esila. Pamene apo eyima notatika kuŵawamyila cakulya.
16Mcingulo mwamene umo, ŵanthu ewela kwa Yesu na ayawo anyinji okatiwa na viŵanda. Yesu evifumya viŵanda na malizu tyala, nipo wonse enzolwala eŵapozya. 17#Ysa 53:4 Ecita ivi kuti vikwanilishiwe vecilaŵila Mneneli Yesaya kuti, “Etola volefuka vasu, notakula malwele ŵasu.”
Phindu yokonkha Yesu
(Lk 9:57-62)
18Yesu peciwona winji wimuzunguluka, elamulila asambili ŵake kuti alute ku silya iyakine ya cimmana. 19Nipo msambizyi wa Matetulo ewela kwa yeve nomuwuzya kuti, “Asambizyi, nikukonkheni kulikonse kwamutimulute.”
20Koma Yesu emuyasuka kuti, “Mimbulu zili na micembo, nato tunyoni tuli na vivumbo, koma Mwana wa Munthu aliye na polalika mutu kumo.”
21Yumo mwa asambili ŵake emuwuzya kuti, “Asikulu, niloleni potatika nikayike malilo ŵa atata.”
22Koma Yesu emuwuzya kuti, “Nikonkhe, akufwa ayikane ŵeka.”
Yesu osilizya cinkhuka
(Mk 4:35-41; Lk 8:22-25)
23Yesu peciloŵa mu wato, asambili ŵake emukonkha. 24Pamene apo kwetatika cinkhuka cikulu pa cimmana, tetyo wato wala wetatika kumbila na matambazi. Koma Yesu enze lele. 25Nipo eluta nakuyomuwusha kuti, “Tipulumusheni Asikulu, tumbila.”
26Yesu eŵawuzya kuti, “Mucitilanji wowa, mwewo ŵa cicetekelo citontho?” Tetyo ewuka nocimula cinkhuka na cimmana, nipo veleka.
27Ŵanthu ŵala ekanganishiwa nolaŵila kuti, “Ni munthu wanji, wakuti na cinkhuka na cimmana vumumvwila?”
Yesu opozya ŵanthu aŵili okatiwa na viŵanda
(Mk 5:1-20; Lk 8:26-39)
28Yesu pecifwika ku silya iyakine ya cimmana, ku calo ca Gadala, ekumana na ŵanthu aŵili okatiwa na viŵanda enzofuma mu vipilala. Enze okalipa mwakuti kuliye munthu angapitile yala njila. 29Koma elila moŵilikizya kuti, “Mupangwa vinji kwa sewo, mwewo Mwana wa Mulungu? Kansi mwawela kuzotitamanisha nsita ikaliyofwika?”
30Pamene apo penze nkhumba zenzokulya. 31Viŵanda vesenga Yesu kuti, “Mukatifumya muno, mutitume mu nkhumba.”
32Yesu eviwuzya kuti, “Nkhoyani.” Pamene apo vefuma nakuyoloŵa mu nkhumba, nipo nkhumba zewutuka zonse nakuyoloŵa mu cimmana nipo zemwela.
33Enzoŵetela nkhumba zala ewutuka, noloŵa mu munzi nipo elaŵila vonse vecitika, ngako–ngako vonse vecitika ku ŵanthu okatiwa na viŵanda. 34Munzi wonse wewela kuzokumana na Yesu, nipo pecimuwona emusenga kuti afumeko ku citwa cawo.
Currently Selected:
Mat 8: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.