KO ‘ĒSELA 9
9
Ko Hono ‘Ilo ‘e ‘Ēsela ‘a e Femali‘aki mo e Kakai Muli
1PEA kuo ‘osi ‘a e ngaahi me‘a ko ia na‘e ‘unu‘unu mai kiate au ‘a e hou‘eiki, ‘o nau pehē, Tā ko e kakai ‘Isileli, mo e kau taula‘eiki, mo e kau Līvai, ‘oku ‘ikai te nau nofo mavahe mei he ngaahi kakai ‘o e ngaahi fonua ‘i honau tō‘onga fakalielia–‘a e Kēnani, ‘a e Heti, ‘a e Pēlisi, ‘a e Siepusi, ‘a e ‘Āmoni, ‘a e Moape, ‘a e ‘Isipite, pea mo e ‘Āmoli. 2He kuo nau to‘o honau ngaahi ‘ōfefine mo‘onau ‘unoho, pea ke ‘unoho mo ‘enau fānau; pea kuo fefiofi ‘a e hako tapu pea mo e ngaahi kakai ‘o e ngaahi fonua: pea ‘oku takimu‘a ‘a e hou‘eiki mo e kau pule ‘i he angahala ko ē. 3Pea ‘i he‘eku fanongo ki he ngaahi lea ko ia, ne u hae hifo hoku kofu, mo hoku pulupulu, pea u ta‘aki ‘ani fulufulu ‘o hoku ‘ulu mo hoku fakapau, pea u nofo hifo kuo u mo‘utāfu‘ua.
4Pea na‘e fakataha mai kiate au ‘a kinautolu fua pē na‘e tailiili ‘i he ngaahi folofola ‘a e ‘Otua ‘o ‘Isileli, koe‘uhi ko e angahala ‘a e kau fakapōpula: ka ko au na‘a ku nofo mo‘o tāfu‘ua, ‘o a‘u ki he feitu‘ula‘ā feilaulau efiafi.
5Pea ‘i he fai ‘o e feilaulau efiafi na‘a ku tu‘u hake mei he‘eku fakavaivai, pea kuo mahae hoku kofu mo hoku pulupulu; pea u tū‘ulutui, ‘o fola hoku nima kia Sihova ko hoku ‘Otua. 6Pea u pehē, ‘E hoku ‘Otua, ‘oku ou mā: ‘io, ‘oku ou laea ke hanga hake ki he ‘Afiona ko hoku ‘Otua: he kuo fokotu‘u ‘emau kovi, ‘o fakafale mai, pea kuo hakehake ‘emau hia ‘o a‘u ki langi. 7Talutalu ‘emau ngaahi kui ko e koto hia pē kimautolu, ‘o a‘u ki he ‘aho ni: pea ko e me‘a ‘i he‘emau ngaahi kovi ne tuku kimautolu, ‘a homau ngaahi tu‘i mo homau kau taula‘eiki ki he nima ‘o e ngaahi tu‘i ‘o e fonua kehekehe, ki he heletā, ki he taki pōpula, pea ki he vete mo e laea, ‘o hangē ko ia ‘oku lolotonga ni. 8Pea ko eni, ‘i he momo‘i taimi ni, kuo ai ha ‘ofa meia Sihova ko homau ‘Otua, he tuku homau toenga ke hao, mo e tuku ha‘amau fa‘o ‘i hono Potu Tapu, ke fai ‘e homau ‘Otua ha fakamaama ‘o homau mata, mo tuku ke mau ki‘i mānava hake ‘i he‘emau pōpula. 9He ko e kau pōpula kimautolu, ka ‘i he‘emau pōpula kuo ‘ikai li‘aki kimautolu ‘e homau ‘Otua, ka kuo ne le‘ei mai ha ‘ofa ‘a e ngaahi Tu‘i Pēsia kiate kimautolu, ke ‘omai hamau fakamānava hake, ke langa hake ‘a e fale ‘o homau ‘Otua, pea ke fokotu‘u hono ngaahi potu maumau, pea ke ‘omi hamau ‘ā ‘i Siuta mo Selusalema.
10Pea ka kuo pehē, pea ko e hā ai ‘emau lea ‘e fai, ‘e homau ‘Otua? he kuo mau li‘aki ho‘o ngaahi tu‘utu‘uni,
11‘a ia na‘a ke fakafai ‘i ho‘o kau tamaio‘eiki ko e kau palōfita, ho‘o folofola mai, ‘o pehē, Ko e fonua ‘oku mou ‘alu ke ma‘u ko e fonua ‘uli ia, ko e me‘a ‘i he ‘uli ‘a e kakai ‘o e ngaahi feitu‘u, ‘a ‘enau ngaahi fakalielia, ‘a ia kuo fonu ai ‘a e fonua mei potu ki potu ‘i he‘enau tō‘onga mousa‘a.
12Pea ko ia, ‘oua na‘a ‘ange ho‘omou fānau fefine ki he‘enau fānau tangata, pea ko ‘enau fānau fefine ‘oua te mou ‘omi ke ‘unoho mo ho‘omou fānau tangata; pea ‘oua te mou feinga‘i ha‘anau tu‘umālie pe ko ha‘anau lelei, ‘o ta‘engata: koe‘uhiā ke mou mālohi, pea ke mou kai ‘a e lelei ‘o e fonua, ‘o tuku ia ko e tofi‘a ki ho‘omau fānau, ‘o ta‘engata.#‘Eki 34.11-16; Teu 7.1-5
13Pea hili ‘a e fu‘u me‘a kuo hoko kiate kimautolu, koe‘uhi ko ‘emau ngaahi ngāue kovi, pea koe‘uhi ko ‘emau hia lahi–‘osi, kuo faka‘ange‘ange ho‘o tautea ‘emau kovi, ‘e homau ‘Otua, pea kuo ke tuku hamau fu‘u toenga pehē–
14pea te mau toe paetaku‘i koā ho‘o tu‘utu‘uni, ‘o fakakāinga mo e kakai ‘oku fai ‘a e ngaahi fakalielia ko ē? ‘Ikai koā te ke houhau mai, kae‘oua ke mau ‘osi; ‘o ‘oua ‘e ai hamau toenga, pe ha hao? 15‘E Sihova, ko e ‘Otua ‘o ‘Isileli, ‘oku tonuhia ‘a e ‘Afiona; he ‘oku ke me‘a mai ko e toenga kimautolu kuo hao: pea vakai ‘oku mau ‘i ho ‘ao ko e koto hia; he ‘oku ‘ikai matu‘u ha taha ‘i ho ‘ao koe‘uhi ko e me‘a ko ia.
Currently Selected:
KO ‘ĒSELA 9: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
KO ‘ĒSELA 9
9
Ko Hono ‘Ilo ‘e ‘Ēsela ‘a e Femali‘aki mo e Kakai Muli
1PEA kuo ‘osi ‘a e ngaahi me‘a ko ia na‘e ‘unu‘unu mai kiate au ‘a e hou‘eiki, ‘o nau pehē, Tā ko e kakai ‘Isileli, mo e kau taula‘eiki, mo e kau Līvai, ‘oku ‘ikai te nau nofo mavahe mei he ngaahi kakai ‘o e ngaahi fonua ‘i honau tō‘onga fakalielia–‘a e Kēnani, ‘a e Heti, ‘a e Pēlisi, ‘a e Siepusi, ‘a e ‘Āmoni, ‘a e Moape, ‘a e ‘Isipite, pea mo e ‘Āmoli. 2He kuo nau to‘o honau ngaahi ‘ōfefine mo‘onau ‘unoho, pea ke ‘unoho mo ‘enau fānau; pea kuo fefiofi ‘a e hako tapu pea mo e ngaahi kakai ‘o e ngaahi fonua: pea ‘oku takimu‘a ‘a e hou‘eiki mo e kau pule ‘i he angahala ko ē. 3Pea ‘i he‘eku fanongo ki he ngaahi lea ko ia, ne u hae hifo hoku kofu, mo hoku pulupulu, pea u ta‘aki ‘ani fulufulu ‘o hoku ‘ulu mo hoku fakapau, pea u nofo hifo kuo u mo‘utāfu‘ua.
4Pea na‘e fakataha mai kiate au ‘a kinautolu fua pē na‘e tailiili ‘i he ngaahi folofola ‘a e ‘Otua ‘o ‘Isileli, koe‘uhi ko e angahala ‘a e kau fakapōpula: ka ko au na‘a ku nofo mo‘o tāfu‘ua, ‘o a‘u ki he feitu‘ula‘ā feilaulau efiafi.
5Pea ‘i he fai ‘o e feilaulau efiafi na‘a ku tu‘u hake mei he‘eku fakavaivai, pea kuo mahae hoku kofu mo hoku pulupulu; pea u tū‘ulutui, ‘o fola hoku nima kia Sihova ko hoku ‘Otua. 6Pea u pehē, ‘E hoku ‘Otua, ‘oku ou mā: ‘io, ‘oku ou laea ke hanga hake ki he ‘Afiona ko hoku ‘Otua: he kuo fokotu‘u ‘emau kovi, ‘o fakafale mai, pea kuo hakehake ‘emau hia ‘o a‘u ki langi. 7Talutalu ‘emau ngaahi kui ko e koto hia pē kimautolu, ‘o a‘u ki he ‘aho ni: pea ko e me‘a ‘i he‘emau ngaahi kovi ne tuku kimautolu, ‘a homau ngaahi tu‘i mo homau kau taula‘eiki ki he nima ‘o e ngaahi tu‘i ‘o e fonua kehekehe, ki he heletā, ki he taki pōpula, pea ki he vete mo e laea, ‘o hangē ko ia ‘oku lolotonga ni. 8Pea ko eni, ‘i he momo‘i taimi ni, kuo ai ha ‘ofa meia Sihova ko homau ‘Otua, he tuku homau toenga ke hao, mo e tuku ha‘amau fa‘o ‘i hono Potu Tapu, ke fai ‘e homau ‘Otua ha fakamaama ‘o homau mata, mo tuku ke mau ki‘i mānava hake ‘i he‘emau pōpula. 9He ko e kau pōpula kimautolu, ka ‘i he‘emau pōpula kuo ‘ikai li‘aki kimautolu ‘e homau ‘Otua, ka kuo ne le‘ei mai ha ‘ofa ‘a e ngaahi Tu‘i Pēsia kiate kimautolu, ke ‘omai hamau fakamānava hake, ke langa hake ‘a e fale ‘o homau ‘Otua, pea ke fokotu‘u hono ngaahi potu maumau, pea ke ‘omi hamau ‘ā ‘i Siuta mo Selusalema.
10Pea ka kuo pehē, pea ko e hā ai ‘emau lea ‘e fai, ‘e homau ‘Otua? he kuo mau li‘aki ho‘o ngaahi tu‘utu‘uni,
11‘a ia na‘a ke fakafai ‘i ho‘o kau tamaio‘eiki ko e kau palōfita, ho‘o folofola mai, ‘o pehē, Ko e fonua ‘oku mou ‘alu ke ma‘u ko e fonua ‘uli ia, ko e me‘a ‘i he ‘uli ‘a e kakai ‘o e ngaahi feitu‘u, ‘a ‘enau ngaahi fakalielia, ‘a ia kuo fonu ai ‘a e fonua mei potu ki potu ‘i he‘enau tō‘onga mousa‘a.
12Pea ko ia, ‘oua na‘a ‘ange ho‘omou fānau fefine ki he‘enau fānau tangata, pea ko ‘enau fānau fefine ‘oua te mou ‘omi ke ‘unoho mo ho‘omou fānau tangata; pea ‘oua te mou feinga‘i ha‘anau tu‘umālie pe ko ha‘anau lelei, ‘o ta‘engata: koe‘uhiā ke mou mālohi, pea ke mou kai ‘a e lelei ‘o e fonua, ‘o tuku ia ko e tofi‘a ki ho‘omau fānau, ‘o ta‘engata.#‘Eki 34.11-16; Teu 7.1-5
13Pea hili ‘a e fu‘u me‘a kuo hoko kiate kimautolu, koe‘uhi ko ‘emau ngaahi ngāue kovi, pea koe‘uhi ko ‘emau hia lahi–‘osi, kuo faka‘ange‘ange ho‘o tautea ‘emau kovi, ‘e homau ‘Otua, pea kuo ke tuku hamau fu‘u toenga pehē–
14pea te mau toe paetaku‘i koā ho‘o tu‘utu‘uni, ‘o fakakāinga mo e kakai ‘oku fai ‘a e ngaahi fakalielia ko ē? ‘Ikai koā te ke houhau mai, kae‘oua ke mau ‘osi; ‘o ‘oua ‘e ai hamau toenga, pe ha hao? 15‘E Sihova, ko e ‘Otua ‘o ‘Isileli, ‘oku tonuhia ‘a e ‘Afiona; he ‘oku ke me‘a mai ko e toenga kimautolu kuo hao: pea vakai ‘oku mau ‘i ho ‘ao ko e koto hia; he ‘oku ‘ikai matu‘u ha taha ‘i ho ‘ao koe‘uhi ko e me‘a ko ia.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.