Salmos 71
71
Juuntach Yus seamu
1Apuru wina ejarkat tusan amin seajme.
Wina ajapruam pengké ukurkiip.
2Tura angkanmamtikruata.
Tura timiá pengker asam uwemtikrurta.
Tura anturtukam yainkata.
3Wikia aints pampanam anuminawa nunismek anumkata tusam tsangkamrukta.
Ame wina uurkatin asam,
wina ejarkatin ata,
turasha wina uwemtikrurtin ata.
4-5Yusru wikia natsa akuncha tuke aminka eayajme.
Tura wina Yusur asakmin,
pasé aints ainau tura mangkartin ainau amin umirtamchau asaramtai,
nu aints ainamunmaya angkanmamtikruata.
6Nukuru ampujenia wina jiirkimiame.
Tura akiinamunmayan winaka waitnuyame.
Tura asakmin amincha tuke:
Ameka wina Yusruitme titatjame.
7Aints ainau untsuri wina waitkar nukap nintiminawai.
Turinau wainiatum ame wina ejarkatin tuke ayame.
8Kintajai metek ami pengkeerumin nintimsan:
Ameketme pengkeram tinuyajai.
9Tura asamtai juuntach amatisha tuke waitkata.
Tura wina kakarmar atsamtaisha ajapruamka ukurkiip.
10Wina nemasur ainau mantuwartas iruntrar chichaman najatrinawai.
11Nuka chichainak:
“Yus niin ajapa ukukin asamtai,
aints kichkisha ayamrukchatnuitai.
Tura asamtai papeekrum achiktaram”,
turutinawai.
12Yusru tu tinau asaramtai,
winaka ajapruam ukurkiip,
antsu wári yainkata.
13Wina nemasur ainau inatsaaram mengkaakta.
Wina pasé awajtusartas wakerutin ainaunka chikich aints ainau wishikrarti tusam inatsaarta.
14Antsu wikia amin kintajai metek ame tati tusan nakastatjame.
Turakun ameketme Yusem tuke titatjame.
15Kintajai metek aints ainaun ujaakun:
“Yuska iincha uwemtikramnuyaji,
turasha iincha pengker awajtamnuyaji”, titatjai.
Antsu ¿itiur uwemtikramrayajik? nunaka nintimratatkaman pengké tujintajai.
16Apuru amin pachisan:
Yus ni kakarmarijai ni nemase ainaun nepetnuyayi,
tusan aints ainaun ujaktatjai.
Turasha amin pachisan:
Ningki aints ainaun mash metek inawai,
tusan etserkatatjai.
17Yusru wi natsa amatikia,
tuke wina unuitinuyame.
Tura asakmin juuntach ayatun,
amin pengker turamurmin pachisan etseru weajai.
18Yusru wikia weamran tura jemperukan pujaing waitiatum winaka ajapruam ukurkiip.
Tuke ami kakarmarmin pachisan yamai pujuinaun tura ukunam akiinatin ainauncha ujakminuitjai.
19Yusru nayaimpinam pujau asam,
aints ainau mash metek inawaitme.
Tura ame wainchati takat timiá untsuri takaawitme.
Amijai metek kichkisha atsawai.
20Winaka itit awajtukmaur tura wait wajaktincha wainmamtikrin ayame.
Turayatum wi jakamtai,
winaka inantukim tuke pujusti tusam, iwiarsamunmaya inantuktinuitme.
21Tura aints ainau wina pachitsar:
Pengke aintsuitai tiarti tusam,
tura wijai pengker nintimias pujusti tusam,
winaka pengker awajtustinuitme.
22Tura asakmin Yusru wikia amin pachisan kantan kantamruatjame.
Turasha ameka tuke pengkeraitme titatjame.
Ameka Israela pengkerinme tusan,
amin kitarran tura arpancha tuntuikiamaikiakun kantan kantamruatjame.
23Tura wina uwemtikruru asakmin,
jangkerjaingkia kantan kantamkun nintirjaingkia warastatjai.
24Wina pasé awajtusartas wakerutin ainauka pengké natsaarar pujuu armiayi.
Turinau asaramtai wikia kintajai metek aints ainaun ame pengker turamurmin pachisan chichastatjai.
Currently Selected:
Salmos 71: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
