Salmos 139
139
David: Yus mash nekawai timiauri
1Yusru wina nintirka nekame.
2Wi itiur pujaja nusha waitme.
Ame arák pujayatum,
wi nintimaursha mash nekawitme.
3Wi wekaamtaisha tura ayamkun pujamtaisha,
nunismek waitme.
Wina jintarun wi wekaaja nusha mash waitme.
4Wina chichamrun tuke chichaaja nuka ameka mash anturtukuitme.
5Ame wina eemkim tura ukurninisha pujurtame.
Uwejmijaisha wina takarme.
6Nunaka mash nekayatun nintimratatkaman yuumatajai.
7Aminu Wakanim tuke pujurtau asamtai,
¿wisha tuki wetaj? Ame mash nungkanmaya ainau nekau asakmin ¿wisha itiur tupikiakminuitja?
8Wikia nayaimpinam waakmatisha,
ameka tuke nuni pujurtame.
Tura nungka taimunam nitak pujamtaisha winaka tuke waitme.
9-10Wikia kashik nantakin,
nasejai juun entsa amajin wekaamtaisha,
ai wekaasata tusam uwejmijai tuke wina achirkatnuitme.
11-12Antsu wikia teenam anumkatasan wakerai wainiatmek,
ameka tsawaisha tura kashisha tuke nunismek waitme.
13-14Wina namangkur najanau asam,
tura wina nukuru ampujesha najatau asakmin,
amincha maaketai tajame.
Aminu itiurkachmintrum atsau asamtai, wikia:
Ame pengké tujinkachuitme tusan nekajme.
15-16Wina mash nekaru asakmin,
wikia anumkachminuitjai.
Chikich ainau winaka waitinatsaing ameka najatamiame.
Wina nukuru ampujen pujai waitiatum,
wina kintarka warutmak at tusam mash nekaamiame.
Aminu papirumin wina kintarka warutmak at tusam mash aarmawaitai.
17-18Ami takatrum nekas pengker aina nuka untsuri ainawai.
Tura asaramtai nuna nekapmartatkaman tujintajai.
19-20Yusru aints ainau amin nakitramina nuna pujutringkia jurukiarta.
Nuka nangkamiar amin naarmin pachisar pasé chichainawai.
Tura asaramtai mangkartin ainau wina takarsacharti tusam waitkata.
21Apuru amin nakitramin ainaunka wikia nakitajai.
Tura amin umirtamtan nakitin ainaunka nakitajai.
22Nu aints ainauka wina nemasrua nunisarang asaramtai,
tuke wina nintirjai nu aints ainaunka tsuutajai.
23Yusru nintimaur nekame.
Tura asam nintirka jiirtusta.
Tura nintirun tunau atsuash tusam nekartuata.
24Tura tunau jintanam wekaamtaisha tuke nekamtikruata.
Tura tuke pujut nangkankashtinnum pujusminam tusam jintintruata.#Sal 17.3; 26.2
Currently Selected:
Salmos 139: acu
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
