Roma 8

Ka̱sa̱kpa̱ Ayinviki a̱ Ka̱shile a lyaꞋa tsugono

1Adama a nannai, a̱ɗa̱ aza o Kutoni a̱ Kirisiti Kishi a ɗa baci, Ka̱shile ka kuyaꞋanka ɗa̱ afada ka̱ta̱ wi ilukpa̱ ɗa̱ ba. 2Ayinviki a̱ Ka̱shile a na e ci neke wuma u na u tsu uta̱ u Yesu Kishi a zuwa mu ta̱ m ba̱ruwa̱ a̱ ubuta̱ wu utsura wu unushi u na u tsu tuka̱ n ukpa̱. 3Wila̱ u Musa u ciya̱ utsura u na wi isa tsu ba, adama a na a̱tsu a̱ ka̱ci ka̱ tsu ci ta̱ n unushi. Amma Ka̱shile ka yaꞋin ili i na Wila̱ u fuɗai u yaꞋin ba. U suki Maku ma̱ ni aduniyan n ikyamba tsu tsu, amma i tsu yi ta̱ n unushi. Ka̱shile ka̱ la̱nga̱sa̱i tsugono tsu unushi wa̱ tsu, ana u nekei Maku ma̱ ni tsa alyuka adama a unushi u tsu. 4U yaꞋan ta̱ nannai adama a na ci yaꞋan ili dem i na Wila̱ u danai a̱ ubuta̱ u kupanaka Ayinviki a̱ Ka̱shile, amma a̱ ubuta̱ u kutono ili i na a̱tsu a̱ ka̱ci ka̱ tsu ci cigai kuyaꞋan ba.

5Uma a̱ ka̱sa̱kpa̱ baci ili i na a cikalakai ka̱ci ke le i lyaꞋa tsugono we le, ayin tutu i ta̱ a kuyaꞋan kusheshe ku unushi. Amma aza a na a̱ ka̱sa̱kpa̱i Ayinviki a̱ Ka̱shile a lyaꞋa tsugono we le, ayin tutu i ta̱ e kusheshe ukuna u na Ayinviki a̱ Ka̱shile a kupana uyoꞋo. 6Mali mu unushi ma vuma ma lyaꞋa baci tsugono wa̱ ni, wi ta̱ a̱ kukuwa̱. Amma Ayinviki a̱ Ka̱shile a lyaꞋa baci tsugono wa̱ ni, wi ta̱ a̱ kuciya̱ wuma m ma̱ta̱na̱. 7Mali mu unushi ma vuma mi baci o tsugono, wi ta̱ a̱ vishili n Ka̱shile ayin tutu. U tsu tono ili i na Ka̱shile ka danai u yaꞋan ba. Mayun ɗa, u tsu fuɗa u yaꞋan nannai ba. 8Aza a na a̱ ka̱sa̱kpa̱i mali mu unushi me le ma lyaꞋa tsugono we le, a tsu fuɗa a zuwa Ka̱shile ka pana uyoꞋo ba.

9Amma mayun ɗa Ayinviki a̱ Ka̱shile i a̱ ida̱shi a̱ a̱ɗu a̱ ɗa̱, i ta̱ a kulyaꞋa tsugono wa̱ ɗa̱, mali mu unushi ma̱ ɗa̱ kpamu ma kulyaꞋa tsugono ba. (Ka̱ta̱ kpamu i ciɓa a n aza a na i babu Ayinviki a̱ Ka̱shile o kuyongo we le, aza o Kutoni a ɗa ba, ko kenu.) 10Ikyamba i ɗa̱ yi ta̱ a̱ kukuwa̱ adama a̱ unushi. Amma Kirisiti Kishi wi baci punu asuvu a̱ ɗa̱, Ayinviki i ta̱ e kuneke ɗa̱ wuma, adama a na Kishi ko bonoko ɗa̱ ta̱ aza a̱ usuɓi e ekiye a̱ Ka̱shile. 11Ka̱shile ka̱ ɗengusa̱i Yesu a̱ ukpa̱. Ayinviki a̱ ni i baci kpamu o kuyongo n a̱ɗa̱, i ta̱ feu e kuneke ikyamba i ɗa̱ i na i kukuwa̱ wuma. Ka̱shile kaꞋa vuza na u ɗengusa̱i Kishi a̱ ukpa̱, Ayinviki a̱ ni a na i o kuyongo n a̱ɗa̱ i ta̱ kpamu e kuneke ikyamba i ɗa̱ wuma.

12Uma a̱ va̱, u gaꞋan ta̱ ci yongo uteku u na Ayinviki a̱ Ka̱shile a danai tsu. Ka̱ta̱ ci yongo uteku u na ci cikalai ba, adama a na a̱tsu a̱ ka̱ci ka̱ tsu aza a unushi a ɗa. 13Adama a na i lyaꞋa baci kelime n kutono mali mu unushi ma̱ ɗa̱, i kukuwa̱ ta̱. Amma i ka̱sa̱kpa̱ baci Ayinviki a̱ Ka̱shile a̱ ɓa̱nka̱ ɗa̱, adama a na i ka̱sa̱kpa̱ kuyaꞋan ili i kavama, yi ta̱ a̱ kuciya̱ wuma u mayun. 14Muku n Ka̱shile m mayun ele ɗa aza a na a̱ ka̱sa̱kpa̱i Ayinviki a̱ Ka̱shile o tono n ele.

15Adama a na Ayinviki a na Ka̱shile ke nekei ɗa̱ o bonoko ɗa̱ ta̱ muku n ni, o bonoko ɗa̱ agbashi o wovon ba. Ayinviki a ɗa kpamu e ci neke utsura ali ci ɗeke Ka̱shile, “Dada! Esheku a̱ tsu!” 16Ayinviki a̱ Ka̱shile a̱ tsu ushuku ta̱ n ayinviki a̱ tsu a na a̱tsu muku n Ka̱shile n ɗa. 17Adama a nannai, ci ta̱ a kisa ili i na Ka̱shile u tsu ɓa̱na̱ka̱ uma a̱ ni. Ili ra̱ka̱ kpamu Ka̱shile ke nekei Maku ma̱ ni, Kishi, ili i nam pa i tsu i ɗa feu. Amma ci baci a̱ kuciya̱ tsugbayin uteku na Kishi u ciya̱i tsugbayin, mayun ɗa feu tsu takacika tsu na u yaꞋin.

Tsugbayin tsu na ci lo a̱ kuta̱wa̱

18Ci ciɓa baci n tsugbayin tsu na u kuneke tsu a kubana megeshe, atakaci a na ci o kusoꞋo gogo na ili i ɗa ba. 19Ili dem i na Ka̱shile ka yaꞋin yi ta̱ a kuvana m ma̱za̱nga̱ a ayin a na Ka̱shile ko kuyotsongu e keteshe aza a na i muku n ni m mayun. 20Ka̱shile ka yaꞋanka ta̱ ili dem i na u yaꞋin una̱ u wuya. Ili i na u yaꞋin i ɗa i sheshei kuyaꞋan nannai a̱ ka̱ci ka̱ ni ba, amma Ka̱shile kaꞋa ke sheshei kuyaꞋan nannai. 21Ko n nannai, Ka̱shile ki ta̱ n kusheshe ku nam pa ku na u kuzuwa ili dem i na u yaꞋin i ba̱ruwa̱ ciya̱ i shama ba, ka̱ta̱ feu i ciya̱ uba̱ruwi n tsugbayin koɓolo m muku n Ka̱shile.

22Ci yeve ta̱ ali a̱ kuta̱wa̱ ayin o gogo na, ili dem i na Ka̱shile ka yaꞋin yi ta̱ a̱ yura̱ nu mɓa̱la̱, tsa̱ a̱ga̱nda̱ a limata. 23Ko a̱tsu aza o Kutoni feu ci ta̱ a̱ yura̱ adama a̱ mɓa̱la̱, ko a na ci n Ayinviki a̱ Ka̱shile, vuza na wi kuneꞋe ku iyain ku Ka̱shile. A̱tsu feu ci ta̱ a kuvana m ma̱za̱nga̱ a kanna ka nan lo ka na Ka̱shile ka kisa tsu an muku n ni ra̱ka̱ ra̱ka̱, ka̱ta̱ u zuwa ikyamba i tsu dem i ba̱ruwa̱. 24A isa tsu ta̱ ɗe, ɗa ci kpamu n a̱pa̱Ꞌa̱ a nam pa. Ce ene baci ili i na ci a kuvana, na lo a̱pa̱Ꞌa̱ a mayun a ɗa ka̱ta̱ ba. Uma e ci keɗe a̱pa̱Ꞌa̱ a̱ ubuta̱ wi ili i na a̱ ciya̱i ɗe ba. 25Amma a̱tsu ci keɗe ta̱ a̱pa̱Ꞌa̱ a̱ ubuta̱ wi ili i na ka̱ta̱ ci ciya̱i ba, ɗa kpamu ci a kuvana i ɗa n uremi u ka̱ɗu.

26Ayinviki a̱ Ka̱shile feu a̱ tsu ɓa̱nka̱ tsu ta̱ a̱tsu vu na ci babu utsura. Ci yeve kuyaꞋan avasa uteku u na u yotsoi ba. Amma Ayinviki a̱ Ka̱shile a̱ ka̱ci ka̱ ni a ci yaꞋanka ta̱ Ka̱shile kadanshi adama a̱ tsu, ali u tsu folonoko tsu ta̱ Ka̱shile n yura̱ i na i laꞋi ili i na vuma u kufuɗa kudansa. 27Ka̱shile ki ta̱ e kene ili i na yi a̱ a̱ɗu a uma. U yeve ta̱ kpamu ili i na yi a̱ ka̱ɗu ka Ayinviki a̱ Ka̱shile, adama a na Ayinviki a̱ Ka̱shile a ci yaꞋanka ta̱ Ka̱shile kadanshi adama a uma a̱ ni, n adama a ili i na yi derere n ucigi u Ka̱shile.

28Ci yeve ta̱ kpamu Ka̱shile ka tsu zuwa ta̱ ili dem i yaꞋan ulinga koɓolo mayin adama a ugaꞋin a kubana wa aza a na a cigai ni. Ele ɗa uma a na u ɗekei, adama a na ta u sheshei kuyaꞋan nannai. 29Ka̱shile ke yeve le ta̱ kafu u yaꞋan a aduniyan, ɗa u zagbai le ciya̱ o okpo tsu Maku ma̱ ni, adama a na Yesu kpamu wo okpo magaji ka̱ta̱ u ciya̱ amgbu n a̱bunda̱i. 30Ana u zagbai le, ɗa yeve u ɗekei le a̱ ta̱wa̱i wa̱ ni. Ana u ɗekei le, u bonokoi le derere n ka̱ci ka̱ ni, ɗa u yaꞋankai le uzuwakpani u tsugbayin ci ni.

Ucigi u Ka̱shile

31Yi ɗa̱i tsa kudana adama a ukuna u nam pa ra̱ka̱? Ka̱shile ki baci n a̱tsu, babu vuza na u kulyaꞋa utsura u tsu. 32Ka̱shile ka̱ sa̱nka̱ m Maku ma̱ ni ba, amma u nekei ni adama a̱ tsu ra̱ka̱. Uteku u na u nekei tsu ɗe Yesu, mayun ɗa u kuneke tsu ili ra̱ka̱. 33Yayi u kushika uma a na Ka̱shile ka zagbai? Babu vuza, adama a na Ka̱shile kaꞋa ko bonokoi le derere. 34Yayi u kilukpa̱ uma a̱ Ka̱shile? Babu vuza, adama a na Yesu Kishi u kuwa̱i, ɗa kpamu a̱ ɗengusa̱i ni a̱ ukpa̱, ɗa gogo na kpamu wi ɗe e kukiye ku usingai ku Ka̱shile, o kufolono yi adama a̱ tsu.

35Babu ili i na i kupece tsu n ucigi u na Kirisiti Kishi wi n u ɗa adama a̱ tsu, ko tsu uwa a kadama, ko ci o kusoꞋo atakaci. Ko uma e neke tsu awuya, e kupece tsu n ucigi u Kishi ba. Ko ci babu ilikulyaꞋa, ko ci babu ili i kuꞋuka, ili i nan lo ra̱ka̱ i kupece tsu n ucigi u ni ba. Uma a uka tsu baci wovon, ko a una tsu, a kufuɗa kupece tsu n ucigi u Kishi ba. 36Derere ɗa tsu na Katagarda ka Ciɗa ka danai,

“Kanna dem uma a tsu dana ta̱ i ta̱ a kuna tsu adama a̱ nu,

uma a tsu takacika tsu ta̱,

uteku u na a ci yaꞋanka m malala ma na i a kubana kukiɗa.”

37Amma ko n ili i nam pa ra̱ka̱, ci lyaꞋa ta̱ utsura wi ili gbende, a̱ ubuta̱ u ni vuza na u cigai tsu! 38N yeve ta̱ a na mayun ɗa ili yi lo a kufuɗa ye pece tsu n ucigi u ni ba: Ukpa̱ wa kufuɗa ba, wuma kpamu wa kufuɗa ba. Alingata, ko wunla̱i u gbani-gbani, ko utsura wa̱ a̱da̱nga̱shile† wi a kufuɗa we pece tsu n ucigi u ni ba. Ili i na yi a kuyaꞋan gogo na, ko ili i na i kuyaꞋan na kelime i kuyaꞋan ili ba. 39Ci baci zuva na ɗe gaɗi, ko ci ɗaka asuvu a mala, dem wi n ukuna ba, adama a na babu ili i na yi punu aduniyan i na i kufuɗa ye pece tsu n ucigi u Ka̱shile u na u yotsongi a̱ ubuta̱ u Kirisiti Yesu Kishi Vuzagbayin vu tsu.

Currently Selected:

Roma 8: asgNT

Highlight

Copy