Roma 1

Kuɓa̱yuwa̱

1Mpa ɗa Bulusu, n ɗanai akaka a nam pa. Mpa kagbashi kaꞋa ke Yesu Kirisiti Kishi. Ka̱shile ka zagbai mu mo okpo vuzavusuki,† ɗa u suki mu m bana n dana uma Arabali a Singai a̱ ni.

2N ayin a cacau, Ka̱shile ka yaꞋin uzuwakpani wa Arabali a Singai a nam pa a̱ ubuta̱ u eneki a̱ ni, tsu na a ɗanai a Katagarda ka Ciɗa. 3-4Arabali a Singai a dana ta̱ ukuna u Maku ma̱ ni, Yesu† Kishi Vuzagbayin vu tsu. A matsa yi ta̱ tsu vuma, ɗa wi matsukaya mo Mogono Dawuda.† Amma Ayinviki a̱ Ka̱shile o yotsongu ta̱ n utsura a na Yesu Maku ma̱ Ka̱shile maꞋa, adama a na u ɗengusa̱ yi ta̱ a̱ ukpa̱. 5Adama a̱ Kishi a ɗa, Ka̱shile ke nekei mu ulinga u singai u vuzavusuki. Ulinga u nam pa wi ta̱ adama a na u tuka̱ uma a aduniyan ra̱ka̱ e neke a̱ɗu, ka̱ta̱ kpamu o tono Yesu mayin. N ci yaꞋanka yi ta̱ ulinga u nam pa. 6A̱ɗa̱ ɗa a̱ ka̱tsuma̱ ka uma a na Yesu Kirisiti Kishi u zagbai va.

7Akaka a nam pa n ɗana ta̱ a ɗa adama a̱ ɗa̱ na yi a̱ likuci i Roma† ra̱ka̱. Ka̱shile ka ciga ɗa̱ ta̱ ɗa u ɗekei ɗa̱ yo okpo uma a ciɗa a̱ ni.

Ka̱sa̱kpa̱ Ka̱shile Dada vu tsu n Vuzagbayin Yesu Kishi u neke ɗa̱ kasingai m ma̱ta̱na̱.

Bulusu u yaꞋin kavasa ɗa kpamu u cikpai Ka̱shile

8YaꞋan biꞋi n gita̱ kudana n cikpa ta̱ Ka̱shile n kula ku Yesu Kishi adama a̱ ɗa̱ ra̱ka̱. N yaꞋan ta̱ nannai adama a na a̱ ubuta̱ kakau a aduniyan dem i ta̱ a kadanshi ku uneki u ka̱ɗu u ɗa̱. 9Ka̱shile ke yeve ta̱ tsu na mi a kuyaꞋanka ɗa̱ kavasa babu kuka̱sa̱kpa̱, ɗa mi a kuyaꞋanka yi tsugbashi n ka̱ɗu ke te, ɗa mi a kudana kpamu uma Arabali a Singai a Maku ma̱ ni. 10N yaꞋan baci kavasa dem, n tsu folono ta̱ Ka̱shile ka̱ ka̱sa̱kpa̱ mu n ta̱wa̱ me ene ɗa̱, ili i nam pa i kuyaꞋan ta̱ Ka̱shile ku ushuku baci.

11N ciga ta̱ me ene ɗa̱, ka̱ta̱ n neke ɗa̱ una̱singai derere tsu na Ayinviki a̱ Ka̱shile e nekei mu. Na lo u kuɓa̱nka̱ ɗa̱ ta̱ i gbonguro n utsura a̱ ubuta̱ u Vuzagbayin. 12Mi ta̱ a kudana nannai adama a na n ciga ta̱ tsu ɓa̱nka̱na̱i n uneki u ka̱ɗu u na ci n u ɗa. Uneki u ka̱ɗu u ɗa̱ wi ta̱ a̱ kuɓa̱nka̱ mu, u va̱ feu u kuɓa̱nka̱ ɗa̱ ta̱. 13A̱ja̱Ꞌa̱ a̱ va̱, n ciga ta̱ i yeve a na ayin tutu n ci ciga kuta̱wa̱ kene ɗa̱. Amma ili i yoku i ci yongo ta̱ a̱ kusa̱nka̱ mu kuta̱wa̱ kene ɗa̱. N ciga ta̱ n zuwa uma a na i a̱ likuci i Roma o tono Kirisiti Kishi, tsu na mpa n yaꞋin n Aza̱ka̱yimbi a na a buwai.

14Mayun ɗa n yaꞋanka uma ra̱ka̱ tsugbashi: aza a na i Nhelene† koɓolo n aza a na i Nhelene ba; koɓolo n aza a na a piꞋisai ɗa e yevei n aza a na a̱ kpa̱ɗa̱i kuyeve ili. 15I ɗaɗa i zuwai n cigai ka̱u n dana ɗa̱ Arabali a Singai punu a̱ likuci i Roma.

Utsura wa Arabali a Singai

16M pana wono adama a Arabali a Singai† a̱ Kishi ba, adama a na utsura u ɗa u na Ka̱shile ka ci yaꞋanka ulinga u ciya̱ wi isa yaba dem vu na u nekei ka̱ɗu, Ayahuda† a ɗa biꞋi a cau, sai kpamu aza a na i Ayahuda ba. 17Arabali a Singai a o yotsongu ta̱ uteku u na Ka̱shile ko bonokoi uma m ma̱riki wa̱ ni: ɗaɗa a̱ ubuta̱ wu uneki u ka̱ɗu a̱ ugiti ali a kubana a uteku. Derere tsu na Katagarda ka Ciɗa ka danai, “Vuza na Ka̱shile ko bonokoi m ma̱riki, wi ta̱ a̱ kuciya̱ wuma adama a na u tsu neke ta̱ ka̱ɗu n Ka̱shile.”#Hab. 2:4; Gal. 3:11; A.Ib. 10:38.

Uma ra̱ka̱ a nusa ta̱

18Ka̱shile ka gaɗi ko yotsongu ta̱ wupa u ni adama a̱ unushi ra̱ka̱ n kagbani-gbani dem. Wi ta̱ feu a kuyaꞋan wupa adama a aza a na a̱ tsu sa̱nka̱ mayun kuta̱ adama a kawuya ke le. 19Aza a nam pa e yeve ta̱ ili ra̱ka̱ i Ka̱shile i na i gaꞋin yaba dem u yeve, adama a na u yotsongu le ta̱ i ɗa ra̱ka̱. 20Uma a kufuɗa kene utsura u Ka̱shile u na wi babu uteku ko tsu na wi ciɗa ba. N ayin a ɗe ana Ka̱shile ka yaꞋin aduniyan, ili ra̱ka̱ i na u yaꞋin i yotsongu ta̱ tsu na wi. Adama a nannai uma a nam pa i n uye u kuta̱ ba. 21Ko a na e yevei Ka̱shile, a iwain kuneke yi tsugbayin uteku u na u gaꞋin e neke Ka̱shile ka mayun, ɗa a iwain kucikpa yi. Kusheshe ku le ku kucikpa ko okpoi gbani. A̱ɗu a tsulau e le a shanai n ka̱yimbi. 22A danai ele va o gbojo ta̱, amma ɗa o okpoi alau. 23A yaꞋanka Ka̱shile ka na ki n tsugbayin n wuma u babu uteku tsugbashi ba. Kucikpa, a yaꞋankai a̱ma̱li tsugbashi. A yaꞋin a̱ma̱li a nam pa o yotsoi uma, uma ta na o ci yongo ko wanai ba. A yaꞋin feu a̱ma̱li a na o yotsoi nnu, nu nnama, koɓolo n oko.

24Adama a na a yaꞋansa ta̱ ili i nam pa, ɗa Ka̱shile ka̱ ka̱sa̱kpa̱i uma a nam pa o tono uye u le. A yaꞋan ta̱ ili i na a cigai kuyaꞋan, ɗa mali ma gbani-gbani me le ma zuwai le a yaꞋankpanai ili i wono i tsugbani n ikyamba i le. 25A iwain ili i mayun i Ka̱shile ɗa a̱ ushuki n aꞋuwa. I a kuyaꞋanka ili i na Ka̱shile ka yaꞋin tsugbashi, a na a yaꞋanka vuza na u yaꞋin i ɗa tsugbashi. A̱yi ɗa vuza na u kisa ucikpi u babu uteku. Ta nannai.†

26Adama a na uma a yaꞋan ili i nan lo, Ka̱shile ka̱ ka̱sa̱kpa̱i le o tono uye u wono u le. A̱ma̱ci a tsugbani n otoku e le a̱ma̱ci, u gaꞋan ta na nannai ba. 27Ta feu ali a ci yaꞋan nannai. A̱ ka̱sa̱kpa̱i kuvaku n a̱ma̱ci, ɗa a kucikpa a̱ ciya̱i mali mu utsura ma na a vaku n otoku e le ali. A yaꞋankpanai ili i wono, ili i na i ciya̱i le va atakaci a ɗa adama a ili i gbani-gbani i na a yaꞋin.

28Uma a ɗika a̱ a̱ɗu e le a na u gaꞋin a yaꞋan n uyevi u Ka̱shile u mayun ba. Adama a nannai ɗa Ka̱shile ka̱ ka̱sa̱kpa̱i le n asuvawuya e le, u ka̱sa̱kpa̱i le a yaꞋan ili i na i gaꞋin a yaꞋan ba. 29I ta̱ tukpa n ili kakau ra̱ka̱: I ta̱ n unushi n kagbani-gbani. A cigai ili ra̱ka̱ yo okpo i le. I a tsurala n uma. A shatangi ka̱ci ke le kpamu n cisheꞋe. A cigai munaka ɗa kpamu a̱ shilika̱i uteku u le. A̱ ya̱nsa̱na̱i. Ayin tutu e kusheshe ukuna u gbani-gbani adama a uma. A ci yaꞋan ta̱ kuyun. 30A̱ kula̱nga̱sa̱ ula a uma. A iwain Ka̱shile. E ci neke vuza tsugbayin ba. I ta̱ n a̱ra̱ɗi. A ci cikpa ta̱ ka̱ci ke le a̱ ubuta̱ u uma. A dakakai adama a na a yaꞋan kawuya n uye u savu kakau. A cikpa isheku i le ba. 31Tsulau tsu ɗa le. O koɗoi uzuwakpani u le. O yotsongu uma kasingai ko asuvayali ba. 32E yeve ta̱ a na wila̱ u Ka̱shile u danai aza a na baci a yaꞋin ili nannai, a yawa ta̱ a̱ kuwa̱. Amma na lo u sa̱nka̱ le kulyaꞋa kelime n kuyaꞋan ili i gbani-gbani ba. Ali o dokushi aza o yoku utsura wa̱ a̱ɗu adama a na a yaꞋan nannai feu.

Currently Selected:

Roma 1: asgNT

Highlight

Copy