Kene 8

Urotu u cirupa̱ wu ukocishi

1Ana Ma̱giri ma kulukpai urotu u cirupa̱ u cindere wu ukocishi wa, ɗa a paɗai bini ɗe gaɗi, ali kagimi ka̱ viyum vi te.

2Ɗa me enei alingata a gbagbaꞋin e cindere aza a na i kashani e kelime ka̱ Ka̱shile ka, ɗa yaba dem vi le wi isai kavana.

3Kalingata ko yoku kau ku uta̱i ɗa ka shamgbai a katalikalyuka.† Wi ta̱ a̱ kuɓa̱na̱ kakpanu ka azanariya, a̱ ubuta̱ u na o tsu songu ili i ma̱gula̱ni. Wi isai ili i ma̱gula̱ni i nam pa n a̱bunda̱i i na u ci yaꞋanka alyuka koɓolo n kavasa ka uma a̱ Ka̱shile ra̱ka̱. Kalingata ka ka zuwai alyuka a nam pa a katalikalyuka ka na a yaꞋin n azanariya ka na ki e kelime ka kakuba ko tsugono ka. 4Ili i ma̱gula̱ni ya a̱ kukula̱ punu a kakpanu ka na kalingata ka ki a̱ kuɓa̱na̱, ɗa ka̱nga̱ ka̱ ni koɓolo n avasa a uma a̱ Ka̱shile a kubana gaɗi u Ka̱shile. 5Ɗa kalingata ka ka ɗikai cikina tsa akina a̱ ubuta̱ u katalikalyuka ɗa u shatangi kakpanu ka. Ɗa u ɓasangi kaꞋa a aduniyan: kutashi n ulaɗi maru-maru, n kacaꞋa, n akpanga a gbagbaꞋin, ɗa iɗika kpamu i gba̱ɗa̱i ka̱u.

Alingata a̱ na̱shi a̱ ugiti a̱ lika̱i avana e le

6Ɗaɗa alingata e cindere a na i a̱ kuɓa̱na̱ avana e cindere o foɓusoi kulika̱ le.

7Ana kalingata ka iyain ka̱ lika̱i kavana ka̱ ni, ɗa alingata a taɗuki mini ma atali n akina usatari nu mpasa a aduniyan. Akina a o songi ugboku u te a̱ ka̱tsuma̱ ku ugboku u tatsu a aduniyan gbende, ɗa a̱ la̱nga̱sa̱i nɗanga ra̱ka̱ n yutishi yu ukambu ya. Ɗa ugboku u re a aduniyan o okpoi.

8Ɗa kalingata ke ire ka̱ lika̱i kavana ka̱ ni. Ɗa a taɗuki punu a mala ma ili tsu kusan ku gbayin ku na ki a̱ kukula̱. Ɗa ugboku u te a̱ ka̱tsuma̱ ku ugboku u tatsu a̱ mini ma mala ɗa u bonoi mpasa. 9Ɗaɗa ili ra̱ka̱ a̱ ka̱tsuma̱ ki ili i tatsu i na yi o kuyongo punu a mala ma nan lo i kuwa̱i, ɗa kpamu antsu a na i punu a ugboku u mala u nan lo wa a̱ ciya̱i muna ra̱ka̱.

10Ɗaɗa kalingata ka tatsu ka̱ lika̱i kavana ka̱ ni, ɗa kazangata ka gbayin ka na ki a̱ kukula̱ an ka̱va̱sa̱, ku uta̱i gaɗi ɗa ka̱ yikpa̱i. Kazangata ka ka̱ yikpa̱i o kuɗolu ku te a̱ ka̱tsuma̱ ko nɗolu n tatsu, ɗa kpamu ka̱ yikpa̱i a̱ ka̱shi ka̱ mini ke te a̱ ka̱tsuma̱ ka tatsu. 11Kula ku kazangata ka ku ɗaɗa A̱guma̱ o Okono, ɗa ukambu u te a̱ ka̱tsuma̱ ku ukambu u tatsu u mini wa u bonoi okono. Ɗa uma n a̱bunda̱i a̱ kuwa̱i adama a na mini ma mi ta̱ n okono.

12Ɗa kalingata ka̱ na̱shi ka̱ lika̱i kavana ka̱ ni. Ɗa ili i lapai ɗa i la̱nga̱sa̱i ukambu u te a̱ ka̱tsuma̱ ku ukambu u tatsu u kanna, n wotoi n azangata. Ɗa ayin a kutashi ku kanna e jebei, ɗa ka̱yimbi ka̱ kimba̱i ukambu u te a̱ ka̱tsuma̱ ku ukambu u tatsu u ayin a kutashi. Ɗa wotoi n azangata a̱ kpa̱ɗa̱i kudoku kuneke kutashi a ukambu u te a̱ ka̱tsuma̱ ku ukambu u tatsu.#8:12 Kanna ki ishi ta̱ ka tsu akana a agisana a̱ iyum kupa n ire, amma n ayin a kabaꞋin ka nam pa ka tsu akana ta̱ a̱ iyum kunla̱i koci. Ili i te i ɗa kpamu n wotoi n azangata; i ta̱ a kakana a̱ iyum kunla̱i koci. Ayin a na i a kuyaꞋan kutashi ba, ubuta̱ u tsu okpo ta̱ n ka̱yimbi.

13Ɗaɗa n la̱nuki ɗa me enei kajimba a ciꞋimkpi gaɗi zuva, o yoroli n kacaꞋa a kudana, “Ili ya atakaci! Ili ya atakaci! Ili ya atakaci yi ta̱ a kucina uma a aduniyan ra̱ka̱ a ayin a na baci alingata a tatsu a na a buwai a̱ kulika̱ avana e le.”

Currently Selected:

Kene 8: asgNT

Highlight

Copy

Compare