Kene 11

Ngan n re

1Ɗaɗa mi isai kalangu ka kugisanku, ɗa Ka̱shile ka danai mu, “Bana vi gisangu A̱Ꞌisa̱ a Gbayin a̱ Ka̱shile n katalikalyuka, ka̱ta̱ vi kece uma a na i a kucikpa Ka̱shile punu. 2Amma ka̱ta̱ vi gisangu ulanga u na wi lo pulai va̱ a̱Ꞌisa̱ va ba, adama a na n neke ta̱ na lo va wa aza a na a̱ kpa̱ɗa̱i kuneke a̱ɗu nu mpa. I ta̱ a kulyaꞋa tsugono a̱ likuci i va̱ ali wotoi amangere n u re.#11:2 Wotoi amangere n u re ili i te i ɗa n ayin 1,260. La̱na̱ kpamu 12:14. 3Mi ta̱ a̱ kusuku ngan n re n va̱, aza a na a kudana kadanshi ka̱ va̱ ka mayun u uma. I ta̱ a kuꞋuka aminya a na a ukai adama a̱ una̱mgbuka̱tsuma̱, ka̱ta̱ a̱ ka̱na̱ kudana uma kadanshi ka̱ va̱ a̱ ka̱tsuma̱ ka ayin ka̱kpa̱n ke te n amangatawenre n amangatatsu (1,260).”

4Ngan n re n na mi a kusala ukuna u kadanshi ka̱ Ka̱shile i ta̱ kashani e kelime ka Vuzavaguɗu, vuza na wi a kulyaꞋa tsugono tsa aduniyan a nam pa ra̱ka̱. Ele ɗa o okpoi a na nɗanga n zaitun n re n ashamkpatsu a̱ nkuni e re ɗe. 5Vuza na baci u cigai kuforo le, akina i ta̱ a̱ kuta̱ punu a̱ una̱ u le ka̱ta̱ a una irala i le. Nannai ɗa Ka̱shile ka kuna yaba dem vu na baci u cigai kuneke le usa̱n. 6A̱ ka̱tsuma̱ ka ayin a na i a kudana uma kadanshi ka̱ Ka̱shile, wi ta̱ e kuneke le utsura u na a̱ sa̱nka̱ mini ma̱ Ka̱shile. A̱ ciya̱ ta̱ kpamu utsura u na a kufuɗa kubonoko mini mo okpo mpasa, ka̱ta̱ a zuwa ma̱dukpa̱ ma na baci a cigai dem ma̱ ka̱na̱ kuneke uma a iɗika usa̱n. I ta̱ a kufuɗa kuyaꞋan ili i nam pa a ayin a na baci de dem a cikalai.

7Ayin a na ngan n re ma o kotsoi kudana akaka e le, ka̱di ka na ku uta̱i e kpenle ku zururu ka ki ta̱ a kuyaꞋan kuvon n ele. Wi ta̱ a kulyaꞋa le ali ka̱ta̱ wu una le. 8I ta̱ a kuvakangu even a ikyamba i le a uye u gbayin u likuci a̱ ubuta̱ u na a kutangi Vuzagbayin vi le ikusa a maɗanga ma atakaci.† Uɗeki u na e ɗekei likuci i nan lo “Sodom”† ko “Masar” u yaꞋan ta̱ an kansa. 9Uma a iɗika dem, n umaci, n elentsu, n ka̱tsura̱ feu i ta̱ e kene even a ikyamba i nan lo. A̱ kuka̱sa̱kpa̱ vuza u ciɗa̱ngu le ba, sai a yaꞋan ayin a tatsu n kagimi. 10Uma a aduniyan ra̱ka̱ i ta̱ a kuyaꞋan ma̱za̱nga̱ adama a na uma e re a nam pa a̱ kuwa̱ ta̱. I ta̱ a kuyaꞋan ka̱ɗiva̱ ka̱ta̱ a tsula kuneꞋe e nekenei, adama a na eneki e re a nam pa a zuwa ta̱ uma o soꞋi atakaci n a̱bunda̱i.

11Amma ana ayin a tatsu n kagimi a lazai, ɗa Ka̱shile ka̱ tsuwa̱nka̱i eneki e re a nan lo ayinviki a wuma kpamu. Ɗa a̱ ɗenga̱i a shamgbai kashani n ene e le, ɗa yaba dem vu na we enei le u panai wovon ka̱u. 12Ɗa eneki e re a a panai ka̱la̱ka̱tsu ku utsura ku uta̱i gaɗi a kudana, “Ta̱wa̱i gaɗi na!” Ɗaɗa a̱ ɗenga̱i a kubana a̱ Ka̱shile punu a asuvu e eleshu, irala i le tamkpamu a iɗika a kinda le.

13Gogo va lo ɗa iɗika i gba̱ɗa̱i n utsura ɗa kasaka ke te a̱ ka̱tsuma̱ ka asaka kupa dem punu a̱ likuci ya a̱ yikpa̱i. Uma a̱kpa̱n e cindere a̱ kuwa̱i adama a̱ kugba̱ɗa̱ ki iɗika ku nan lo. Aza a na a buwai n wuma a panai wovon ka̱u ɗa e nekei Ka̱shile ka na ki a̱ ida̱shi na ɗe gaɗi tsugbayin. 14Atakaci e ire o kotso ta̱, amma a tatsu a yawa ta̱ ɗevu n kuta̱wa̱.

Kavana ke cindere

15Ɗa kalingata ke cindere ka̱ lika̱i kavana ka̱ ni, ɗa m panai alingata na ɗe gaɗi a kuyaꞋan kadanshi n kacaꞋa a kudana,

“Ka̱shile ka̱ tsu n vuza na u zagbai adama a na wo okpo Kishi, wi ta̱ n utsura u na u lyaꞋa tsugono a iɗika dem,

Ka̱shile ki ta̱ a kulyaꞋa tsugono ali ayin a babu uteku.”

16Ɗa nkoshi m gba̱ra̱-gba̱ra̱ ele uma kamanga n aza a̱ na̱shi a, ele na i ida̱shi a akuba o tsugono a̱ ubuta̱ u te n Ka̱shile, a̱ kuɗa̱ngi ali a lyaꞋi kayala ɗa a cikpai ni. 17A danai,

“Vuzavaguɗu Ka̱shile Uba̱nga̱ri,

vuza na wi n wuma gogo na, n ayin a ɗe,

ci cikpa wu ta̱ a na vi o kuyotsongu utsura u gbayin u nu.

Vi gita̱ ta̱ ɗe feu kulyaꞋa tsugono.

18Uma a aduniyan i ta̱ a wupa n avu,

amma gogo na ayin a wupa a̱ nu a yawa ta̱.

Ayin a ɗa a na va kuyaꞋanka a̱kpisa̱ afada,

ka̱ta̱ vu tsupa agbashi a̱ nu.

Vi ta̱ a kutsupa eneki a̱ nu n uma a ciɗa† a̱ nu,

vi ta̱ a kutsupa aza a na a panai wovon u kula ku nu ra̱ka̱,

u gita̱ a vuza na u laꞋi n kenu ali a kubana u vuza na u laꞋi m gbayin.

Ka̱ta̱ vu una ra̱ka̱ aza a na a̱ tuka̱i n koli a iɗika.”

19A̱Ꞌisa̱ a̱ Ka̱shile na ɗe gaɗi a̱ ɓa̱yuwa̱i, ɗa a fuɗai e enei Akpati vu Uzuwakpani† punu a asuvu. Ɗa ulaɗi u ka̱na̱i kuyaꞋan maru-maru n cigiriwi n kacaꞋa ka akpanga, n kugba̱ɗa̱ ki iɗika, m mini ma atali n a̱bunda̱i.

Currently Selected:

Kene 11: asgNT

Highlight

Copy

Compare