Azusuki 13

A̱ suki Baranaba n Shawulu

1Aza o Kutoni a na i Antakiya i ta̱ n eneki nu nlum n a̱bunda̱i. Ele ɗa Baranaba, n Saminu vuza na e ci ɗeke, “Ma̱lima̱,” n Lusiya a̱ likuci i Kure, m Manayan vuza na wi ishi ka̱ja̱Ꞌa̱ ka̱ Hiridu vu Antiba ele biꞋi muku, n Shawulu. 2Ayin a na ele a kucikpa Ka̱shile n a̱ ka̱na̱i una̱ kpamu, ɗa Ayinviki a̱ Ka̱shile a danai le, “Zagbai Baranaba n Shawulu a yaꞋan ulinga u na n zagbakai le.” 3Ayin a na a vasai, ana kuka̱na̱ ku una̱ ku kotsoi, uma a a vasakai le, adama a na a yaꞋan ulinga, ɗa a̱ suki le a laza.

Baranaba n Shawulu a banai kene Kuburu

4Ayin a na Ayinviki a̱ Ka̱shile a̱ suki Baranaba n Shawulu, ɗa a banai a̱ likuci i Salusiya. Ana a̱ ka̱sa̱kpa̱i likuci ya, ɗa a uwai a kpantsu a banai o kotogu ka mala ma̱ Kuburu. 5Yahaya vu Marukusu u tonoi le, adama a na u ɓa̱nka̱ le. Na ɗe a̱ Kuburu, ɗa a banai a̱ likuci i Salami, ɗa a banai a̱ unu a avasa a Ayahuda, a danai ukuna u kadanshi ka̱ Ka̱shile punu.

6Ana i ɗe o kotogu, ɗaɗa a banai likuci likuci. A yawai a̱ likuci i yoku i na e ci ɗeke Pafasu, ta ɗe ta na u gasai n vuza va Ayahuda vuza na wi n kula Bara-Yesu. U yaꞋansa ta̱ nkunu n kene ka aꞋuwa. 7Vuma vu nam pa u tsu soku ta̱ gomuna vu kotogu, kula ku ni ku ɗa kpamu Sarajiya Bulusu.

Sarajiya Bulusu vuma ɗa vu ugboji n kuyeve ki ili kpamu mayin. U folonoi Baranaba n Shawulu a̱ ta̱wa̱ a̱ kya̱sa̱ yi. U yaꞋin nannai adama a na u ciga ta̱ u pana kadanshi ka̱ Ka̱shile.

8Vuza vu nkunu Alimasu u ka̱na̱i kugbagbala vuzagbayin va adama a na u iwan akaka a. (Alimasu ɗaɗa uteku u na e ci ɗeke Bara-Yesu n Cihelene.) U yaꞋin kataci adama a na u sa̱nga̱ vuzagbayin va u kpa̱ɗa̱ kuneke ka̱ɗu ka̱ ni u Ka̱shile.

9Gogo na Shawulu, uma n a̱bunda̱i e ci ɗeke yi ta̱ Bulusu, Ayinviki a̱ Ka̱shile a shana ta̱ a̱ ka̱ɗu ka̱ ni. Wi indai Alimasu magaba. 10Ɗa u danai, “Avu maku ma Kalijani, vu dansa ta̱ aꞋuwa, vi ta̱ a kuyaꞋanka uma iforotoi n ka̱bini. Vi ta̱ a tsurala n ili i singai dem. Wana ɗai va̱ kuka̱sa̱kpa̱ kuvadalakpa ili i Ka̱shile? 11Ka̱shile ki ta̱ a kutakacika wu n uyimba̱ a kubana megeshe biꞋi kenu.”

Gogo va lo, ɗa egele n ka̱yimbi ka̱ kimba̱i Alimasu, ɗaɗa u ka̱na̱i kupapa, adama a na u ciya̱ vuza na u kurono yi e kukiye. 12Ana gomuna vi iɗika va we enei ili i na i yaꞋin, ɗa u yaꞋin mereve n kuyotsongusu ku ukuna u Vuzagbayin Yesu. I ɗaɗa ili i na i zuwai ni u neke ka̱ɗu n Vuzagbayin va.

Bulusu u lyaꞋi kelime nu nwalu

13Bulusu n aza a na i koɓolo a̱ ka̱sa̱kpa̱i Pafasu m kpantsu ɗa a banai a Bamafila. A yawai a̱ likuci i na antsu a̱ ci cipa̱ a Paraga. A Paraga va, ɗa Yahaya vu Marukusu u ka̱sa̱kpa̱i le o kubono a Urishelima. 14Amma Baranaba m Bulusu a yaꞋin nwalu a pasai mala a kubana a̱ likuci i na e ci ɗeke Antakiya vu uɓon u Bisidiya.

A kanna ka Ashibi, ɗa a uwai a̱ kunu ka avasa† a̱ da̱sa̱ngi. 15Ana o kotsoi mekecu punu a atagarda a Musa n Eneki, aza a na i kelime ka̱ kunu ka avasa a̱ suki uma e ece le, “Aza a̱ tsu, yi baci n kadanshi ku uɓa̱nki wa̱ a̱ɗu, ɗenga̱i i yaꞋanka tsu.”

16Ɗa Bulusu u ɗenga̱i kashani u ɗengusa̱i ekiye a̱ ni adama a na u zuwa uma a paɗa bini, ɗa u gita̱i kadanshi: “Uma a Israila,† n a̱ɗa̱ vu na yi a kupana wovon u Ka̱shile ki Israila, panakai mu. 17Ka̱shile ki Israila ka zagba ta̱ ikaya i tsu, ɗa u ka̱sa̱kpa̱i uma a̱ tsu a yaꞋan kawalatsu a ayin a na ele ɗe a iɗika i Masar. N utsura u ni, ɗa wu uta̱ka̱i le punu a iɗika i Masar. 18Ali a̱ya̱ amangere a̱yi e kureme ka̱ɗu n ugbami wa aci u le a kakamba ka. 19Ɗaɗa u niꞋwa̱nta̱ngi ngono n cindere n KanaꞋana,† ɗa u bonoi u nekei iɗika ya aza a Israila yo okpo i le ya agadu. 20Ili i nam pa i yaꞋan ta̱ a̱ ka̱tsuma̱ ka̱ a̱ya̱ amangatawa̱na̱shi n amangerenkupa (450).

“Ana o kotsoi nannai, a zuwai eyevafada, ɗa a yaꞋin ulinga ali a kubana a ayin e keneki SamaꞋila.† 21Amma ɗa uma a danai i ta̱ a kuciga mogono. Ali a̱ya̱ amangere ɗa Ka̱shile ke nekei le mogono kula ku ni ku ɗa Shawulu, maku ma̱ Kishu a umaci u Bayami.† 22Ɗaɗa Ka̱shile ku uta̱ka̱i ni punu o tsugono tsa ɗa u zuwai Dawuda. Ka̱shile ka yaꞋin kadanshi adama a Dawuda, u danai, ‘Dawuda maku ma Yasa,† vuma vu nam pa a̱yi ɗa vuza na u kuzuwa ka̱ɗu ka̱ va̱ ka yaꞋan ma̱za̱nga̱, adama a na u kuyaꞋan ta̱ ili i na n cigai u yaꞋanka mu dem.’

23“Ka̱shile ka yaꞋin uzuwakpani, u danai, ‘A̱ ka̱tsuma̱ ka limata i Dawuda ya ta punu vuza na u kisa Israila u kuta̱.’ A̱yi ɗa ta na Yesu. 24Amma kafu Yesu u ta̱wa̱, Yahaya ɗa u yongoi a kudana uma a Israila a̱ shika̱ unushi u le ka̱ta̱ o bono u Ka̱shile, a yaꞋanka le kusumbu ka akucina.#Mar. 1:4; Luk. 3:3. 25Ayin a na Yahaya wi o kukotso ulinga u ni, ɗa we ecei, ‘I sheshe ta̱ mpa ɗa Kishi ka? A̱Ꞌa̱! Amma wi ta̱ lo a̱ kuta̱wa̱. N yawa biꞋi n foɗo ataka a̱ ni ba.’#Mar. 1:7; Luk. 3:16.

26“Gogo na panai, a̱ɗa̱ ntsukaya mi Ibrahim. Zuwai atsuvu, a̱ɗa̱ vu na yi a kupana wovon u Ka̱shile. Panai akaka a nam pa a na a danai uteku u na i kuciya̱ wishi, adama a na u yaba dem u ɗa. 27Uma a Urishelima a tsu pana ta̱ kadanshi ke eneki a kanna ka Ashibi dem. E kece baci kaꞋa, ko n nannai e yeve a na ukuna u Yesu u ɗa eneki a i a kadanshi ba. Ele n aza e kelime a shatangu ta̱ kadanshi ka nan lo ana a unai ni. 28A fuɗa a̱ ciya̱ ili i mayun i na a unakai ni ba, amma ali n nannai va a danai Bilatu† u zuwai osoji a̱ ni a una yi.

29“Ayin a na o kotsoi kuyaꞋan ili i na a ɗanai adama a̱ ni, ɗa a̱ cipa̱ka̱i ni a maɗanga ma atakaci ma, ɗa a zuwai ni a kasaun ka na a̱ ga̱va̱i a katali. 30Amma ɗa Ka̱shile ka̱ ɗengusa̱i ni n wuma. 31A̱ ka̱tsuma̱ ka ayin n a̱bunda̱i, ɗa u yotsongi ka̱ci ka̱ ni u mukumitoni† n na mi n a̱yi a̱ Ga̱lili, ɗa o tonoi ni a kubana a Urishelima. Uma a nam pa a, ele ɗa aza a na a kuyaꞋan kadanshi ka̱ ni u uma a Israila.

32“Gogo na mpa m Baranaba ci ta̱ na adama a na tsu tuka̱ ɗa̱ n Arabali a Singai a̱ Ka̱shile. Uzuwakpani u Ka̱shile a kubana wi ikaya i tsu mayun u ta̱wa̱ ta̱ a ayin a̱ tsu. 33Ka̱shile ka̱ ɗengusa̱ ta̱ Yesu n wuma. Ili i na vishipa vi ire a Katagarda ki Ishipa ka ki kudansa i ɗaɗa:

‘Avu ɗa Maku ma̱ va̱.

Anana mo okpo ta̱ eshevu.’#Ishp. 2:7.

34Ka̱shile ka̱ ɗengusa̱i Yesu n wuma, u ka̱sa̱kpa̱ ikyamba i ni i shama ba. Na va ɗaɗa i na Ka̱shile ka danai,

‘N kuneke wu ta̱ una̱singai u ciɗa u na n yaꞋankai Dawuda uzuwakpani.’#Ish. 55:3.

35Ishipa† i yoku i dansa ta̱ ukuna u nan lo mayin, a danai,

‘Va̱ kuka̱sa̱kpa̱ Vuma Ciɗa u shama a kasaun ba.’#Ishp. 16:10.

36“Gogo na, ili i nam pa i bura Dawuda ba. Dawuda u kotso ta̱ ɗe kuyaꞋan ulinga a ayin a̱ ni uteku u na Ka̱shile ka cigai. Ɗa u kuwa̱i ɗa a̱ ciɗa̱ngi ni koɓolo n isheku i ni, ali ɗa ikyamba i ni i shamai. 37A̱Ꞌa̱, ukuna u vuza yoku ɗa. Yesu ɗa vuza na Ka̱shile ka̱ ɗengusa̱i, ikyamba i ni kpamu i shama ba.

38-39“A̱ja̱Ꞌa̱ a̱ va̱, akaka a ɗaɗa, Yesu wi ta̱ a kucinukpaka ɗa̱ unushi u ɗa̱. Wila̱ u Musa u kisa ɗa̱ a̱ ubuta̱ wu unushi ba. Amma vuza na baci u nekei ka̱ɗu n Yesu a cinukpaka yi ta̱ unushi u ni ra̱ka̱, ka̱ta̱ wo okpo vuma vi ciɗa e ekiye a̱ Ka̱shile.

40“YaꞋin mayin! Ka̱ta̱ i ka̱sa̱kpa̱ kadanshi ke eneki ka shana wa̱ ɗa̱ ba. Adama a na a dana ta̱:

41‘Indai, a̱ɗa̱ aza o kugoyi,

yaꞋin mereve ka̱ta̱ i kuwa̱!

Adama a na mi ta̱ a kuyaꞋan ili a ayin a̱ ɗa̱,

ili i na i kushuku ba, ko yayi u ta̱wa̱i u danai ɗa̱.’ ”#Hab. 1:5.

42Ayin a na Bulusu m Baranaba i a̱ kuka̱sa̱kpa̱ a̱ ubuta̱ wo oɓolo wa, ɗa uma o folonoi le o doku a dana le kpamu ukuna u nam pa wa a kanna ko oɓolo ka na ki a̱ kuta̱wa̱ a Ashibi a na o bono. 43Ana o kotsoi kucikpa ku Ka̱shile, Ayahuda n a̱bunda̱i n aza a na a̱ ushuki kutono Ka̱shile a banai n ele. Bulusu m Baranaba o folonoi uma a a shamkpa n a̱ɗu e le a̱ ubuta̱ u Ka̱shile, vuza na wi a kuyaꞋanka le kasingai.

Ayahuda o yoku a iwain le

44Kuden ku ire ku yawai, uma a̱ likuci a n a̱bunda̱i a̱ uta̱i adama a na a panaka le a kudansa ukuna u Vuzagbayin Yesu. 45Amma ana azagbagbaꞋin a Ayahuda e enei oɓolo a, ɗa a yaꞋin cisheꞋe o goyoi Bulusu, ɗa kpamu a̱ ka̱na̱i kanananai n ili i na u dansai dem.

46Ɗaɗa Bulusu m Baranaba a yaꞋin kadanshi babu wovon a danai, “Mayun ɗa sai Arabali a Singai a̱ Ka̱shile a nam pa a̱ɗa̱ Ayahuda i gita̱ biꞋi kupana. Amma a na i iwain kaꞋa, ali ɗa i yaꞋankai a̱ɗu a̱ ɗa̱ afada i danai a̱ɗa̱ i yawa yi isa wuma u babu uteku ba. Adama a nannai, ci ta̱ e kuneke Aza̱ka̱yimbi. 47Vuzavaguɗu u neke tsu ta̱ kadanshi ka nam pa a katagarda ki Ishaya:

‘N zuwa wu ta̱ na an kutashi ka Aza̱ka̱yimbi.

I kuɗika ta̱ utsura u wishi u Ka̱shile i banka uma a̱ ubuta̱ kakau a iɗika.’ ”#Ish. 42:6; 49:6.

48Ana Aza̱ka̱yimbi† a panai nannai, a̱ ka̱na̱i ma̱za̱nga̱ ɗa a cikpai Ka̱shile adama a akaka a nam pa. Aza a na kpamu Ka̱shile ka zagbai a̱ ciya̱ wuma u babu uteku, e neke ta̱ a̱ɗu e le.

49Akaka a Vuzagbayin Yesu a nan lo a̱ ka̱ra̱Ꞌi ukambu u nan lo. 50Amma azagbagbaꞋin a Ayahuda a banai a̱ ubuta̱ wa azagbagbaꞋin a̱ likuci ya n a̱ma̱ci a na i n usuɓi n tsugbayin kpamu. Ɗa a zuwai le a̱ ka̱na̱ kuyaꞋanka Bulusu m Baranaba kawuya, ali o lokoi le a ukambu u nan lo wa.

51Amma Bulusu m Baranaba a̱ ka̱pa̱tsa̱i kubuta̱ ku ene e le ɗa ko okpoi urotu u uma a, ɗa a lazai a banai a̱ likuci i Ikaniya. 52A Ikaniya ya, aza o Kutoni a yaꞋin ma̱za̱nga̱ n a̱bunda̱i, ɗa kpamu Ayinviki a̱ Ka̱shile a shanai we le.

Currently Selected:

Azusuki 13: asgNT

Highlight

Copy