2 Tosolonika 3
3
YaꞋin kavasa adama a̱ tsu
1Uma a̱ va̱, na ɗa uteku wa akaka wa, ɗa n folonoi ɗa̱ i yaꞋan kavasa adama a̱ tsu. Ili i iyain, yaꞋin kavasa adama a na akaka a Vuzagbayin a̱ ka̱ra̱Ꞌa̱ n utsura ka̱ta̱ kpamu a cikpa a ɗa a̱ ubuta̱ u na a yawai dem, derere n tsu na i yaꞋin a ayin a na akaka a a̱ ta̱wa̱i wa̱ ɗa̱. 2YaꞋin kavasa kpamu a isa tsu a̱ ubuta̱ u uma a gbani-gbani n uma a kawuya, adama a na yaba dem ɗa u nekei ka̱ɗu n Vuzagbayin ba. 3Amma Vuzagbayin mayun ɗa wi a̱ ubuta̱ wi ili dem, wi ta̱ a kuzuwa ɗa̱ i tsurakpa ka̱ta̱ wi inda ɗa̱ a̱ ubuta̱ u vuma vu gbani-gbani.
4A̱tsu tsu ushuku ta̱ n Vuzagbayin yi ta̱ a kuyaꞋan ili i na tsu danai ɗa̱, ɗa tsu doku kpamu tsu ushuki yi ta̱ a kulyaꞋa kelime n kuyaꞋan nannai. 5Ka̱sa̱kpa̱ Vuzagbayin Yesu Kristi Kishi u yotsongu ɗa̱ uteku u na Ka̱shile ka cigai ɗa̱, ka̱ta̱ u yotsongu ɗa̱ feu tsu na i kululukpa̱ tsu na a̱yi u yaꞋin feu.
Ka̱ta̱ i yaꞋan tsurogo ba
6Gogo na uma a̱ va̱, tsu dana ɗa̱ ta̱ n kula ku Vuzagbayin Yesu Kishi: Shamgbai daꞋin u vuza na wi a̱ ka̱tsuma̱ ka̱ ɗa̱ ɗa wi korogo, ɗa kpamu u kpa̱ɗa̱i kuyongo n ili i na ci yotsongi ɗa̱. 7A̱ɗa̱ a̱ ka̱ci ka̱ ɗa̱ i yeve ta̱ u gaꞋan ta̱ i tono uteku u na ci yaꞋin. A̱tsu orogo a ɗa ci ba, a ayin a na ci koɓolo n a̱ɗa̱. 8Ci isa tsuwaꞋa u vuza gbani babu na tsu tsupai ba. Ci yaꞋan ta̱ ulinga ka̱u kanna n kayin adama a na ka̱ta̱ ci neke ko vuza te vu ɗa̱ a̱miki ba. 9Ci yaꞋan ta̱ nannai ko a na ci a kufuɗa tsa dana ɗa̱ i ɓa̱na̱ tsu, amma ci iwain kufolono adama a na ci ciga ta̱ i ciya̱ agisana a singai a na i kutono. 10A ayin a na ci ishi koɓolo n a̱ɗa̱, ci neke ɗa̱ ta̱ wila̱ u nam pa: “Vuza na baci de dem u yaꞋin ulinga ba, u kulyaꞋa feu ba.”
11Gogo na tsu pana ta̱ a dana a̱ɗa̱ vi yoku i tsu da̱sa̱ngu ta̱ gbani ka̱ta̱ uma a nan lo a iwan kuyaꞋan ulinga, ko kenu. Ulinga wa aza o yoku u ɗa koci a̱ tsu sa̱nka̱. 12Adama a nannai, n kula ku Vuzagbayin vu tsu Yesu Kristi Kishi, tsu folono ta̱ uma a nam pa, ali tsu zuwai le, a̱ gita̱ kuyaꞋan ulinga ka̱ta̱ a̱ ciya̱ ilikulyaꞋa i le ka̱ta̱ kpamu o yongo m ma̱riki.
13Uma a̱ va̱, ka̱ta̱ yo oꞋo n ulinga u singai ba.
14Zukai n aza a na a̱ kpa̱ɗa̱i kutono ili i na tsu ɗanai a akaka a nam pa. I shamgba daꞋin n ele, adama a na o okpo n wono. 15Ka̱ta̱ yi inda le adanshi irala i ɗa̱ i ɗa i ba, amma yaꞋin kadanshi n ele tsu na va kuyaꞋanka vuza nu a kpaꞋa ku te, vuza na u gaꞋin a dana yi a na wi a kuyaꞋan ili i na i gaꞋin ba.
Ikya̱shi yu uteku
16Ka̱sa̱kpa̱ ayin tutu Vuzagbayin vu ma̱ta̱na̱ n ka̱ci ka̱ ni u neke ɗa̱ ma̱ta̱na̱ ma̱ ni ko yi ɗa̱i baci yi lo. Vuzagbayin u yongo n a̱ɗa̱ ra̱ka̱.
17Gogo na ikya̱shi i va̱ i ɗa na, n ɗana ta̱ i ɗa n kukiye ku va̱. Mpa, Bulusu, n ci yaꞋan ta̱ ili i nam pa a uteku wa akaka a̱ va̱ ra̱ka̱, adama a na yaba dem u yeve a na a̱ uta̱i a̱ va̱ mayun.
18YaꞋan kasingai ka Vuzagbayin vu tsu Yesu Kristi Kishi ko yongo n a̱ɗa̱ ra̱ka̱.
Currently Selected:
2 Tosolonika 3: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
