2 Yahaya 1
1
Ikya̱shi
1Mpa Yahaya mokoshi ma̱ gba̱ra̱, n ɗana ta̱ akaka a nam pa a kubana u vuka vu na Ka̱shile ka zagbai m muku n ni.#1:1 A̱ ubuta̱ u nam pa, “vuka m muku n ni” uye u ɗa u kuyaꞋan kadanshi ka aza o Kutoni a̱ likuci i yoku. Mpa n ciga ɗa̱ ta̱ mayun. Mpa ɗa kpamu n cigai ɗa̱ endeꞋen va̱ ba. Uma ra̱ka̱ a na e yevei ili i mayun i ta̱ feu a kuciga ɗa̱. 2Ci ciga ɗa̱ ta̱ adama a ukuna u mayun u na wi n a̱tsu, u na kpamu u kuyongo n a̱tsu ko wanai.
3N yaꞋan ta̱ kavasa adama a na Ka̱shile Dada n Yesu Kirisiti Kishi vuza na wi Maku ma̱ ni, u yaꞋanka tsu kasingai ka̱ta̱ u pana kpamu asuvayali a̱ tsu! YaꞋan e neke tsu ma̱ta̱na̱, m mayun n ucigi.
Mayun n ucigi
4N pana ta̱ uyoꞋo a na m panai muku n ɗa̱ n yoku mi o kutono uye u mayun, tsu na Dada u danai tsu ci yaꞋan. 5Ka̱ja̱Ꞌa̱ ka̱ va̱, n ɗana adama a na n dana wu vi yaꞋan ili i savu ba. Mi ta̱ a kuɗanaka wu adama a na n dana wu i ciganai, i ɗaɗa ili i iyain i na a danai tsu ci yaꞋan. 6Na ɗa ucigi: adama a na ci yaꞋan ili i na Ka̱shile ka danai tsu ci yaꞋan. A ayin a̱ ugiti, u dana ɗa̱ ta̱ i ciganai.
7Nlum ma aꞋuwa n a̱bunda̱i a̱ uta̱ ta̱ ɗe a aduniyan. Aza a aꞋuwa a nam pa a danai Yesu Kishi wi n ikyamba i mayun tsu vuma ba. Amma ele ɗa aza a aꞋuwa n irala i Kishi. 8YaꞋin cicoꞋo. I yaꞋan baci cicoꞋo ba, yi ta̱ a kunamba ili ra̱ka̱ i na i yaꞋin ulinga adama a i ɗa. Amma i yaꞋan baci cicoꞋo, yi ta̱ a̱ kuciya̱ katsupu ka̱ ɗa̱ derere. 9Vuza na baci dem u kpa̱ɗa̱i kushamgba punu a̱ ubuta̱ u kuyotsongusu ku Kirisiti Kishi, amma ɗa u tonoi ili i yoku kau, wi n Ka̱shile ba. Vuza na baci dem u shamgbai punu a̱ ubuta̱ u kuyotsongusu wa, wi ta̱ koɓolo n Dada m Maku ma dem. 10Vuza yoku u ta̱wa̱ baci a̱ ubuta̱ wo oɓolo u ɗa̱, ɗa u kpa̱ɗa̱i kuyotsongusu ɗa̱ ili i mayun adama a̱ Kishi, ka̱ta̱ i doku i banuki a kpaꞋa ku ɗa̱ ko i doku i kya̱sa̱ yi ba. 11I rabasa baci vuma vu nan lo, a̱ɗa̱ feu i yaꞋan ta̱ ulinga u gbani-gbani u nan lo.
Kadanshi ku ukocishi
12Mpa mi ta̱ n ili n a̱bunda̱i i na n kudana ɗa̱, amma n ciga n ɗanaka ɗa̱ i ɗa e kepepa ba. Adama a nan lo, n ciga ta̱ n ta̱wa̱ wa̱ ɗa̱ n yaꞋan kadanshi n a̱ɗa̱ a̱shi n a̱shi adama a na tsu pana uyoꞋo mayin.
13Muku n tovu vuka,#1:13 A̱yi “taku” a̱Ꞌisa̱ a ɗa a̱ ubuta̱ u na Yahaya wi a ayin a na u ɗanai akaka a, “muku” ele ɗa uma a̱ a̱Ꞌisa̱ a nan lo. vuza na Ka̱shile ka zagbai feu, i ta̱ a̱ kusuꞋuku wu ikya̱shi.
Currently Selected:
2 Yahaya 1: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
