2 Korintiya 3

Uzuwakpani u savu u Ka̱shile

1Ci ta̱ a̱ kugita̱ kuyaꞋan a̱ra̱ɗi adama a̱ ka̱ci ka̱ tsu kpamu? Uma o yoku a yawai n akaka a kucikpa le, ko o folonoi ɗa̱ i ɗanaka le akaka adama a̱ ka̱ci ke le. U gaꞋan ta̱ ci ciya̱ akaka tsu nan lo? 2Amma a̱ɗa̱ ɗa akaka a̱ tsu, ta punu yi a̱ a̱ɗu a̱ tsu, adama a na yaba dem u kece ka̱ta̱ u yeve ili i na u kecei. 3I yotsongu ta̱ a na a̱ɗa̱ ɗa akaka a na Kirisiti Kishi u ɗanai, ɗa a̱tsu ci nekei a ɗa. Ayinviki a̱ Ka̱shile a na e ci neke wuma, a ɗana ɗa̱ ta̱ punu a̱ a̱ɗu a̱ tsu, amma e kepepa ko e meshemberu ma katali ba.

4Ci ta̱ a kudana nannai adama a utsura wu uneki u ka̱ɗu u na ci n u ɗa e kelime ka̱ Ka̱shile adama a̱ Kirisiti Kishi. 5Tsu dana ci ta̱ a kufuɗa kuyaꞋan ulinga u nam pa wa n ka̱ci ka̱ tsu ba. Ka̱shile kaꞋa ka zuwai tsu fuɗai ci yaꞋin ili i na ci yaꞋin ra̱ka̱. 6U zuwai tsu fuɗai tso okpoi agbashi a uzuwakpani u savu u na wu uta̱i a̱ ubuta̱ wa Ayinviki a̱ Ka̱shile. Uzuwakpani u nam pa Wila̱ u na a ɗanai u ɗa ba, adama a na Wila̱ u tsu tuka̱ ta̱ n ukpa̱, amma Ayinviki a̱ Ka̱shile e ci neke ta̱ wuma.

7Wila̱ u cau a ɗana ta̱ u ɗa a atali, u ɗaɗa u tuka̱i n ukpa̱. N nannai dem, ɗa ta na e enei tsugbayin tsu Ka̱shile. Tsugbayin tsu na tsu uta̱i a̱ ubuta̱ u Wila̱ tsu zuwai a̱shi a Musa kutasa ka̱u, uma a Israila e geshe ele a kinda Musa va ba, ko a na kutashi ku nam pa ku geshei ba.#Kut. 34:29. 8Tsugbayin tsu na tsu uta̱i a̱ ubuta̱ wa Ayinviki a̱ Ka̱shile tsu laꞋa ta̱ tsu na tsu uta̱i a̱ ubuta̱ u Wila̱. Mayun ɗa ili ya ba? 9Ulinga u na u ci neke a̱ ilukpa̱ uma tutu wi baci n tsugbayin, ulinga u na u tsu zuwa uma o okpo aza a̱ usuɓi a̱ ubuta̱ u Ka̱shile wi ta̱ a kuyaꞋan n tsugbayin tsu na tsu laꞋi nannai. 10Mayun ɗa, tsugbayin tsu uzuwakpani u kuku tso okpo gbani, adama a na kutashi ku tsugbayin tsu savu tsu laꞋa yi ta̱. 11Wila̱ wi ta̱ n tsugbayin tsu na tsu kporoi ɗe. Amma tsugbayin tsu uzuwakpani u savu tsu laꞋa ta̱ m gbayin ka̱u, tsu ɗa ci o kukporo ba.

12Ci ta̱ a kufuɗa kuyaꞋan kadanshi babu wovon, adama a na ci ta̱ n a̱pa̱Ꞌa̱ tsu nam pa. 13A̱tsu ci tsu Musa ba. A̱shi a̱ ni o yongo ta̱ a kutasa ka̱u, amma ɗa u palai a ɗa adama a na uma a Israila a̱ kpa̱ɗa̱ kene uteku u na kutashi ka ki o kugboro.#Kut. 34:33. 14Uma a o yongo ta̱ n ugbamukaci, ɗa kpamu ili i kpadai le kene ili i mayun a ayin a na baci e kecei Wila̱ wa. Kishi ɗa koci u kufuɗa kutakpa ili i na i zuwai le a̱ kpa̱ɗa̱i kene. 15Ali n anana, e kece baci Wila̱ u Musa, ili yi ta̱ punu i na i palai a̱ɗu e le. 16Amma vuza na baci u banai u Vuzagbayin, wi ta̱ a kutakpa ili i na i palai ni va.#Kut. 34:34. 17Gogo na, Vuzagbayin va a̱yi ɗa Ayinviki a, ubuta̱ u na baci ta na Ayinviki a Vuzavaguɗu i, u tsu neke ta̱ uba̱ruwi. 18Adama a nannai a̱shi a̱ tsu i upali ba, adama a na ci yotsongu tsugbayin tsu Vuzavaguɗu. Ayin a na baci Ayinviki a Vuzavaguɗu i a kuyaꞋan ulinga n a̱tsu, ci ta̱ a̱ kuta̱wa̱ tso kokpo ci ni, ci ta̱ kpamu o kuyotsongu tsugbayin ci ni n a̱bunda̱i ka̱u.

Currently Selected:

2 Korintiya 3: asgNT

Highlight

Copy

Compare