1 Korintiya 16
16
Kisa ki ikebe adama a uma a̱ Ka̱shile
1Yi isa baci ikebe adama a uma a̱ Ka̱shile, n kuciga ɗa̱ ta̱ i yaꞋan derere tsu na n danai a̱Ꞌisa̱ a aza o Kutoni n a̱bunda̱i a na i Galatiya a yaꞋan. 2Kanna ka Aladi ra̱ka̱ yaba dem vu ɗa̱ u zuwa ikebe i yoku i na u ciya̱i. I zuwa i ɗa adama e kuneke kuneꞋe. I yaꞋan baci nannai ayin a na n yawai, yo kudoku kusoꞋo atakaci i bana n i bonoi o kutono n yi isai i ɗa ba. 3Zagbai aza o Kutoni o yoku a ɗika i ɗa a banka a Urishelima. Mi ta̱ e kuneke le atagarda a akaka a na o kuyotsongu a na a̱ɗa̱ ɗa i zagbai le. 4Wi baci feu a kugaꞋan ci yaꞋan nwalu ma koɓolo, ci ta̱ a kuyaꞋan n ɗa.
Ili i na Bulusu wi a kuciga kuyaꞋan
5Ayin a na baci n walai m Makidoniya, mi ta̱ a kubana me kene ɗa̱. 6U gaꞋan ba n da̱sa̱ngu n a̱ɗa̱ una̱ u ayin e re, ko ali ayin a̱ kuta̱nu o kotso, ka̱ta̱ i ɓa̱nka̱ mu n ka̱na̱ uye a̱ ubuta̱ u na n kubana dem. 7Vuzagbayin wu ushuku baci, mi a kuciga n yawa lo gogo ba, n ciga ta̱ n geshe adama a na n yawa baci n ciya̱ n yongo lo n a̱ɗa̱ ali ayin ka̱u, a na ma laza lo babu n yaꞋan megeshe. 8Amma mpa mi ta̱ a kushamgba na a Afisu ali sai Ka̱ɗiva̱† ka Kanna ka Amangerenkupa† kuta̱. 9N ciya̱ ta̱ ka̱ba̱nga̱ ka singai punu ka na n kuyaꞋan ulinga, ka̱ta̱ uma n a̱bunda̱i a isa ukuna wa, ko a na uma o yoku a cigai ba.
10Timoti u yawa baci, yi isa yi mayin. Wi ta̱ a kuyaꞋan ulinga u Vuzagbayin, tsu na mpa mi a kuyaꞋan. 11Ka̱ta̱ i ka̱sa̱kpa̱ vuza u goyo yi ba. I neke yi una̱singai u ɗa̱ ka̱ta̱ i ɓa̱nka̱ yi u ka̱na̱ uye a ayin a na baci wi o kubono na wa̱ va̱. Mi ta̱ a kuvana yi koɓolo n aza o Kutoni a na a buwai o bono.
12Gogo na, mi ta̱ a kuɗanaka ɗa̱ ukuna wo Apolosu vuza tsu. N tsu dana yi ta̱ u ɓolongu ekiye n aza a̱ tsu a na a buwai a ayin a na baci a̱ ta̱wa̱i kene ɗa̱, amma u ciga kuyaꞋan nannai gogo na ba. Ayin a na baci u ciya̱i ka̱ba̱nga̱, wi ta̱ a̱ kuta̱wa̱ we kene ɗa̱.
Bulusu u kotsoi akaka a̱ ni
13Zukai n ka̱ci ka̱ ɗa̱. I gbaɓarangu uneki u ka̱ɗu u ɗa̱. Ka̱ta̱ i pana wovon ba. Tsurakpai. 14YaꞋin ulinga u ɗa̱ ra̱ka̱ a̱ ka̱tsuma̱ ku ucigi.
15I yeve ta̱ Istifanu n limata i ni ele ɗa a̱ gita̱i kuneke a̱ɗu e le n Kishi a cau a Akataya, ɗa ta na e nekei ka̱ci ke le adama a kuyaꞋanka uma a̱ Ka̱shile tsugbashi. N folono ɗa̱ ta̱, uma a̱ va̱, 16i tono uma a nam pa n aza o yoku ci le, aza a na i a kuyaꞋan ulinga n tsugbashi n ele. 17Mi ta̱ a̱ ma̱za̱nga̱ ma na me ene Istifanu, koɓolo n Fatunatu, n Akaiku. A̱ ɓa̱nka̱ mu ta̱ adama a na a̱ɗa̱ yi lo na ba. 18E neke mu ta̱ utsura u ka̱ɗu n a̱bunda̱i, n yeve ta̱ ta a yaꞋankai ɗa̱ feu nannai. I neke tsugbayin tsu singai wa aza a na a ci yaꞋan tsugbashi derere tsu uma a nan lo.
19A̱Ꞌisa̱ aza o Kutoni† n a̱bunda̱i a na i a uɓon u Asiya i ta̱ ikya̱shi i ɗa̱.
Akila m Pirisila, n aza o Kutoni a na a tsu bana a gasa a kpaꞋa ku le, i ta̱ ikya̱shi i ɗa̱ a̱ ka̱tsuma̱ ka kula ka Vuzagbayin.
20Aza a na i o kutono Vuzagbayin dem i ta̱ ikya̱shi i ɗa̱.
I kya̱sa̱na̱i mayin.
21N ekiye a̱ va̱ a ɗa n yaꞋin iɗani i nam pa: Mpa Bulusu mi ta̱ ikya̱shi i ɗa̱.
22Avasa a̱ va̱ a ɗa, Ka̱shile ka yaꞋanka yaba dem vu na u iwain kuciga Vuzavaguɗu una̱. YaꞋan Vuzagbayin u bono gogoꞋo.
23YaꞋan kasingai ka Vuzagbayin Yesu ko yongo n a̱ɗa̱.
24N ciga ta̱ yaba dem vu na wi vuza vu kutoni Kirisiti Kishi.
Currently Selected:
1 Korintiya 16: asgNT
Highlight
Copy
Compare
Share
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
