ယူဝ်း 1
SHNCL
1
ၼုၵ်ႈၵပၢတ်ႈ​ၸဝ်ႈ​ဢၼ်​ဢသၢၵ်ႈလိပ်း
1မိူဝ်ႈ​ၵေႃႇၸႃႉ​ႁူဝ်ပိုင်း​ၼၼ်ႉ၊မီး​ၼုၵ်ႈၵပၢတ်ႈ​ၸဝ်ႈ​ဢေႃႈ။ ၼုၵ်ႈၵပၢတ်ႈ​ၸဝ်ႈ​ၼၼ်ႉ၊မီး​လူၺ်ႈ​ၵၼ်​တင်း​ၽြႃးပဵၼ်ၸဝ်ႈ​လႄႈ​ၼုၵ်ႈၵပၢတ်ႈ​ၸဝ်ႈ​ၼၼ်ႉ၊ပဵၼ်​ၽြႃးပဵၼ်ၸဝ်ႈ​ဢေႃႈ။- 2မၼ်းၸဝ်ႈ​ၼၼ်ႉ၊မီး​ယူႇ​ၸဵမ်မိူဝ်ႈ​ႁူဝ်ပိုင်း​ႁူမ်ႈ​လူၺ်ႈ​ၵၼ်​တင်း​ၽြႃးပဵၼ်ၸဝ်ႈ​လႄႈ၊- 3ၽြႃးပဵၼ်ၸဝ်ႈ​ၽၢၼ်ႇသၢင်း​ႁဵတ်း​ပဵၼ်​ၶိူင်ႈပိူင်​ၵႃႈမီး​တင်းသဵင်ႈတင်းလူင်​ဢေႃႈ။ ၶိူင်ႈပိူင်​ဢၼ်​ၵၢင်းလွတ်ႈ​သေ​တၢင်း​ဢၼ်​မၼ်းၸဝ်ႈ​ၽၢၼ်ႇသၢင်း​ႁဵတ်း​ပဵၼ်​ၼၼ်ႉ၊ဢမ်ႇ​မီး​သေ​ၸိူဝ်ႉ​သေ​မဵဝ်း​ဢေႃႈ။- 4ၵႃႈၼႂ်း​မၼ်းၸဝ်ႈ​ၼၼ်ႉ၊မီး​ဢသၢၵ်ႈ​လႄႈ ဢသၢၵ်ႈ​ၼၼ်ႉ၊သမ်ႉ​ပဵၼ်​ဢၼ်လႅင်း​တီႈ​ၵူၼ်း​တင်းလၢႆ​ဢေႃႈ။- 5ဢၼ်လႅင်း​ၼၼ်ႉ​ၵေႃႈ၊ထွင်ႇ​ႁိူဝ်ႈ​ၼႂ်း​ဢၼ်​လပ်းသိင်ႇ​လႄႈ​ဢၼ်​လပ်းသိင်ႇ​ဢမ်ႇ​ၸၢင်ႈ​ပႄႉၼႅင်ႇ​မၼ်း​လႆႈ​ဢေႃႈ။
6ၽြႃးပဵၼ်ၸဝ်ႈ​ၼၼ်ႉ၊ပွႆႇၸႂ်ႉ​ၵူၼ်း​ၵေႃႉ​ၼိုင်ႈ​ဢၼ်​လႆႈ​ၸိုဝ်ႈ​ယူဝ်းႁၢၼ်ႇ၊ၼၼ်ႉ​မႃး​ဢေႃႈ။- 7ၵေႃႉ​ၼၼ်ႉ၊မႃး​ႁႂ်ႈ​ပဵၼ်​သၢၵ်ႈသေႇ​သေလႄႈ​ၶၢမ်ႇသၢၵ်ႈသေႇ​လွင်ႈ​ဢၼ်လႅင်း​ၸဝ်ႈ​ၼၼ်ႉ၊ႁႂ်ႈ​ၵူၼ်း​တင်းသဵင်ႈတင်းလူင်​လႆႈ​ဢွၼ်ၵၼ်​ယုမ်ႇမၢတ်ႈ​ၵွပ်ႈပိူဝ်ႈ​မၼ်း​ဢေႃႈ။- 8ယူဝ်းႁၢၼ်ႇ၊ၼၼ်ႉ၊မၼ်း​ပဵၼ်​ဢၼ်လႅင်း​ၸဝ်ႈ​ဢမ်ႇၸႂ်ႈ၊မၼ်း​မႃး​ႁႂ်ႈလႆႈ​ၶၢမ်ႇသၢၵ်ႈသေႇ​လွင်ႈ​ဢၼ်လႅင်း​ၸဝ်ႈ​ၵူၺ်း​ဢေႃႈ။- 9ဢၼ်လႅင်း​ဢၼ်​ၸိုဝ်ႈ​ဢၼ်​ၸႂ်ႈ၊ဢၼ်​ထွင်ႇ​ႁိူဝ်ႈ​တီႈ​ၵူၼ်း​ၵူႈၵေႃႉၵူႈၵူၼ်း​ၼၼ်ႉ၊မႃး​ၼႂ်း​လေႃးၵႃႉ​ၼႆႉ​ယူႇ​ယဝ်ႉ​လႄႈ။
10မၼ်းၸဝ်ႈ​မီး​ယူႇ​ၼႂ်း​လေႃးၵႃႉ​ၼႆႉ​ယဝ်ႉ။ လေႃးၵႃႉ​ၼႆႉ​ၵေႃႈ​လႆႈ​ၶၢမ်ႇ​တၢင်း​ဢၼ်​ၽၢၼ်ႇသၢင်း​ႁဵတ်း​ပဵၼ်​ၵွပ်ႈပိူဝ်ႈ​မၼ်းၸဝ်ႈ​ယဝ်ႉ​ဢေႃႈ။ ၼႂ်းဝႃႈၼၼ်​သေၵေႃႈ၊လေႃးၵႃႉ​ၼႆႉ​ဢမ်ႇ​ႁုၸၵ်း​မၼ်းၸဝ်ႈ။- 11မၼ်းၸဝ်ႈ​မႃး​ၸူး​ဝၢၼ်ႈမိူင်း​မၼ်းၸဝ်ႈ​သေၵေႃႈ၊ၵူၼ်း​မဵဝ်း​မၼ်းၸဝ်ႈ​တင်းလၢႆ​ယင်း​ဢမ်ႇ​ႁပ်ႉတုင်း​ဢဝ်​မၼ်းၸဝ်ႈ​လႄႈ​ယူႇ​ဢေႃႈ။- 12တီႈ​ၶဝ်​ၸိူဝ်း​ဢၼ်​ႁပ်ႉတုင်း​ဢဝ်​မၼ်းၸဝ်ႈ​လႄႈ​သမ်ႉ​ယုမ်ႇမၢတ်ႈ​မၼ်းၸဝ်ႈ​ၸိူဝ်း​ၼၼ်ႉ၊ၵႃႈမီး​တင်းသဵင်ႈတင်းလူင်​ၸမ်ႉ၊မၼ်းၸဝ်ႈ​ပၼ်​ဢၶႂၢင်ႉ​တၼ်းၶူဝ်း​ဢၼ်​လႆႈ​ပဵၼ်​လုၵ်ႈလၢင်း​ၽြႃးပဵၼ်ၸဝ်ႈ​ဢေႃႈ။- 13ၶဝ်​ၸိူဝ်း​ၼၼ်ႉ၊ပဵၼ်​လုၵ်ႈလၢင်း​ၽြႃးပဵၼ်ၸဝ်ႈ​မႃး​ၵွပ်ႈပိူဝ်ႈ​ၵိူတ်ႇလဵင်ႉ​မႃး​ၸွမ်းၼင်ႇ​ၸႃႇတိ​ၵူၼ်း​ဢမ်ႇၸႂ်ႈ။ ပဵၼ်​လုၵ်ႈလၢင်း​ဢၼ်​ၵိူတ်ႇလဵင်ႉ​မႃး​ၵွပ်ႈပိူဝ်ႈ​ၼိူဝ်ႉလိူတ်ႈ​ၵူၼ်း​ဢမ်ႇၸႂ်ႈ။ ပဵၼ်​လုၵ်ႈလၢင်း​ဢၼ်​ၵိူတ်ႇ​ပဵၼ်​မႃး​ၸွမ်းၼင်ႇ​ဢလူဝ်ႇ​ၵၢင်ၸႂ်​ၵူၼ်း​ၵေႃႈ​ဢမ်ႇၸႂ်ႈ။ ပဵၼ်​လုၵ်ႈလၢင်း​ဢၼ်​ၵိူတ်ႇ​ပဵၼ်​မႃး​ၵွပ်ႈ​လူၺ်ႈ​ၽြႃးပဵၼ်ၸဝ်ႈ​ဢေႃႈ။
14ၼုၵ်ႈၵပၢတ်ႈ​ၸဝ်ႈ​ၼၼ်ႉ၊လႆႈ​မႃး​ၶၢမ်ႇ​ဢဝ်​ၸႃႇတိ​ၵူၼ်း​လႄႈ​ပျေႉၸုမ်ႇ​တင်း​ၵျေးၸူး​ၸဝ်ႈ၊ဢိၵ်ႇတင်း​သဵတ်ႈၸႃႇ​ၸဝ်ႈ​သေလႄႈ​တႄႇ​ယူႇ​ၸွမ်း​ႁဝ်း​ဢေႃႈ။ ႁဝ်း​ၵေႃႈ​လႆႈ​ႁၼ်​မုၼ်ၽုင်း​မၼ်းၸဝ်ႈ​ဢၼ်​ပဵၼ်​ၸိူဝ်ႉ​ၼင်ႇ​မုၼ်ၽုင်း​လုၵ်ႈၸဝ်ႈ​ပႃးလဵဝ်​ၵူၺ်း​ဢၼ်​လႆႈ​မႃး​ၵႃႈတီႈ​ပေႃႈၸဝ်ႈ​ၼၼ်ႉ​ဢေႃႈ။
15သြႃႇ​ယူဝ်းႁၢၼ်ႇ၊ၶၢမ်ႇသၢၵ်ႈသေႇ​လွင်ႈ​မၼ်းၸဝ်ႈ​လႄႈ​ႁွင်ႉ​ပၢဝ်ႇ​ဝႃႈ၊ “ၸဝ်ႈ​ဢၼ်​ၵဝ်​လၢတ်ႈ​လႄႈ​ဝႃႈ၊ ‘ၸဝ်ႈ​ဢၼ်​မႃး​လိုၼ်းလင်​ၵဝ်​ၼၼ်ႉ၊ယင်း​ယႂ်ႇ​မျၢတ်ႈ​ၼႃႇ​သေ​ၵဝ်​ပိူဝ်ႈ​ဢၼ်​မၼ်းၸဝ်ႈ​မီး​ဝႆႉ​ဢွၼ်တၢင်း​ၵဝ်​ဢမ်ႇ​ပႆႇ​ၵိူတ်ႇ​ၼၼ်ႉ​ဢေႃႈ’ ဝႃႈ​ၼင်ႇ​ၼႆ​ၼၼ်ႉ​ပဵၼ်​ၸဝ်ႈ​ၼႆႉ​ယဝ်ႉ၊” ဝႃႈ​ၼင်ႇ​ၼႆ​ဢေႃႈ။
16ၵႃႈၼႂ်း​တၢင်း​ဢၼ်​ပျေႉၸုမ်ႇ​မၼ်းၸဝ်ႈ​ၼၼ်ႉ၊ႁဝ်း​ၵႃႈမီး​တင်းသဵင်ႈတင်းလူင်​လႆႈ​ႁပ်ႉ​ၶၢမ်ႇ​ဢဝ်​မၢင်ႇၵလႃႇ​ၵျေးၸူး​ၸဝ်ႈ​မဵဝ်း​ၼိုင်ႈ​ယဝ်ႉ၊သမ်ႉ​ထၢပ်ႈ​သႂ်ႇ​ထႅင်ႈ​မဵဝ်း​ၼိုင်ႈ​ဢေႃႈ။- 17လွင်ႈ​မၼ်း​ၸမ်ႉ၊ပိင်းၺၢပ်ႈတြႃး​ၸိုင်၊ၽြႃးပဵၼ်ၸဝ်ႈ​ပၼ်​ၼႂ်း​မိုဝ်း​မူဝ်းသေႇ၊ဢေႃႈ။ ၵျေးၸူး​တြႃး​တင်း​သဵတ်ႈၸႃႇ​တြႃး​ၸမ်ႉ၊ပဵၼ်​မႃး​ၵွပ်ႈ​လူၺ်ႈ​ၸဝ်ႈ​ယေႇသု​ၶရိၸ်ႈ၊ဢေႃႈ။- 18ၽူႈလႂ်​ဢမ်ႇ​တွၼ်ႉ​လႆႈ​ႁၼ်​ၽြႃးပဵၼ်ၸဝ်ႈ။ ၼႂ်းဝႃႈၼၼ်​သေၵေႃႈ၊လုၵ်ႈၸဝ်ႈ​ပႃးလဵဝ်​ၵူၺ်း​ဢၼ်​ႁၵ်ႉပႅင်း​ၸမ်ၸႂ်​ပေႃႈၸဝ်ႈ​ၼၼ်ႉ၊ႁႂ်ႈ​မၼ်းၸဝ်ႈ​ထၢင်ႇသႃး​မႃး​ဢေႃႈ။
သြႃႇ​ယူဝ်းႁၢၼ်ႇ​ၶၢမ်ႇသၢၵ်ႈသေႇ​လွင်ႈ​တူဝ်ၸဝ်ႈၵဝ်ႇ
19ၼႆႉ​ၸမ်ႉ၊ပဵၼ်​လွင်ႈ​သြႃႇ​ယူဝ်းႁၢၼ်ႇ၊ဢေႃႈ။ မိူဝ်ႈ​ဢၼ်​ၶုၼ်​ဢႃႇၼႃႇ​ၵူၼ်း​မဵဝ်း​ၵျူး၊ၶဝ်၊ဢၼ်​မီး​ၼႂ်း​ဝဵင်း​ယေႇရုသလႅမ်ႇ၊ပွႆႇၸႂ်ႉ​ယဵၸ်ႈပရေႃးႁဵၵ်ႈ#1:19 “ယဵၸ်ႈပရေႃးႁဵၵ်ႈ” - ပဵၼ်​ၽူႈတၢင်တူဝ်​ႁဵတ်းဝၢတ်ႈ​သၢၵ်ႈၵၢပ်ႈ​တၢင်းလူႇ​တီႈ​ၽြႃးပဵၼ်ၸဝ်ႈ​ၶဝ်​တင်း​ၵူၼ်း​မဵဝ်း​လေႇဝိ၊တင်းလၢႆ၊ၵႂႃႇၸူး​သြႃႇ​ယူဝ်းႁၢၼ်ႇ၊ႁႂ်ႈလႆႈ​ထၢမ်​မၼ်း​လႄႈ​ဝႃႈ၊ “မႂ်း​ပဵၼ်​ၽူႈလႂ်” ဝႃႈ​ၼင်ႇ​ၼႆ​ၼၼ်ႉ​ဢေႃႈ။
20မၼ်း​ယင်း​ဢမ်ႇ​သိူင်ႇ​ဢမ်ႇ​လပ်ႉ​လႄႈ​ၶိုၼ်း​လၢတ်ႈ​ဝႃႈ၊ “ၵဝ်​ဢမ်ႇၸႂ်ႈ​ၸဝ်ႈ​ၶရိၸ်ႈ၊ၵူၺ်း၊” ဝႃႈၼႆ​ၶၢမ်ႇသၢၵ်ႈသေႇ​လႅင်း​လႅင်း​ဢေႃႈ။
21ၶဝ်​သမ်ႉ​ထၢမ်​လႄႈ​ဝႃႈ၊ “ပေႃး​ပဵၼ်​ၼႆ​ၸိုင်၊မႂ်း​ပဵၼ်​ၽူႈလႂ်။ ပဵၼ်​ဢေးလိယႃႉ၊ႁိုဝ်း၊” ဝႃႈ​ၼင်ႇ​ၼႆ​လႄႈ​မၼ်း​ၶိုၼ်း​ဝႃႈ၊ “ၵဝ်​ဢမ်ႇၸႂ်ႈ၊” ဝႃႈ​ၼင်ႇ​ၼႆ​ဢေႃႈ။ ၶဝ်​သမ်ႉ​ၶိုၼ်း​ထၢမ်​ဝႃႈ၊ပဵၼ် “ပရေႃးၽႅတ်ႈ#1:21 “ပရေႃးၽႅတ်ႈ” - ၽူႈ​ႁေႃးလၢတ်ႈ​ၵႂၢမ်း​ၽြႃးပဵၼ်ၸဝ်ႈ​လွင်ႈတၢင်း​ဢၼ်​တၵ်း​ပဵၼ်​မႃး​တေႃႈလဵဝ်​လႄႈ​ဝၼ်း​မိူဝ်းၼႃႈ​ဢၼ်​ၵျၢမ်းလိၵ်ႈ​လၢတ်ႈ​ဝႆႉ​ၼၼ်ႉ​ႁိုဝ်း၊” ဝႃႈၼႆ​လႄႈ​မၼ်း​ၶိုၼ်း​ဝႃႈ၊ “ဢမ်ႇၸႂ်ႈ​ၵူၺ်း၊” ဝႃႈ​ၼင်ႇ​ၼႆ​ဢေႃႈ။
22ၶဝ်​ၸင်ႇ​လၢတ်ႈ​လႄႈ​ဝႃႈ၊ “မႂ်း​ပဵၼ်​ၽူႈလႂ်။ ႁဝ်း​လူဝ်ႇ​လႆႈ​ၵႂၢမ်း​ဢၼ်​တေ​ၶိုၼ်း​ၵႂႃႇ​ၶႆႈၼႄ​ၶဝ်​ၸိူဝ်း​ဢၼ်​ပွႆႇၸႂ်ႉ​ႁဝ်း​မႃး​ၼၼ်ႉ​ဢေႃႈ။ မႂ်း​မီး​လွင်ႈတၢင်း​ဢၼ်​တၵ်း​လၢတ်ႈ​လွင်ႈ​တူဝ်ၸဝ်ႈၵဝ်ႇ​ၸိူဝ်ႉ​ၼင်ႇ​ႁိုဝ်၊” မိူဝ်ႈ​ဢၼ်​ဝႃႈ​ၼင်ႇ​ၼႆ​ၸိုင်။
23သြႃႇ​ယူဝ်းႁၢၼ်ႇ၊ၵေႃႈ​လၢတ်ႈ​လႄႈ​ဝႃႈ၊
“ၵဝ်​ပဵၼ်​သဵင်​ၵေႃႉ​ဢၼ်​ႁွင်ႉ​ပၢဝ်ႇ​ယူႇ​ၵႃႈၼႂ်း​ထိူၼ်ႇလႅင်ႉ​လႄႈ​ဝႃႈ၊
‘ႁႂ်ႈ​သဵၼ်ႈတၢင်း​ထႃႇဝရႃႉ​ၽြႃး​သိုဝ်ႈ​တႃႉ၊’
ဢၼ်​ဝႃႈ​မႅၼ်ႈ​ၸွမ်း​ၵႂၢမ်း​ပရေႃးၽႅတ်ႈ​ဢိသႃႇယႃႉ၊ႁေႃးလၢတ်ႈ​ဝႆႉ​ၼၼ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
24ၶဝ်​ၸိူဝ်း​ဢၼ်​မႃး​ၼၼ်ႉ၊ပဵၼ်​ၵူၼ်း​ၵိူင်း​ၽႃႇရိသႄး၊ၶဝ်​ပွႆႇၸႂ်ႉ​မႃး​ဢေႃႈ။- 25ၶဝ်​ၼၼ်ႉ​သမ်ႉ​ထၢမ်​ထႅင်ႈ​လႄႈ​ဝႃႈ၊ “မႂ်း​ၼႆႉ​ပဵၼ်​ၸဝ်ႈ​ၶရိၸ်ႈ၊ၵေႃႈ​ဢမ်ႇၸႂ်ႈ။ ဢေးလိယႃႉ၊ၵေႃႈ​ဢမ်ႇၸႂ်ႈ။ ပဵၼ်​ပရေႃးၽႅတ်ႈ​ဢၼ်​ၵျၢမ်းလိၵ်ႈ​လၢတ်ႈ​ဝႆႉ​ၼၼ်ႉ​ၵေႃႈ​ဢမ်ႇၸႂ်ႈ၊ႁဵတ်းသင်​လႄႈ​မႂ်း​ပၼ်​မၢင်ႇၵလႃႇ​ပပ်ႉတိၸမ်ႇ#1:25 “ပပ်ႉတိၸမ်ႇ” - မၢင်ႇၵလႃႇ​တၢင်းၸူမ်ၼမ်ႉ​ၼင်ႇ​ႁိုဝ်၊” ဝႃႈ​ၼင်ႇ​ၼႆ​ဢေႃႈ။
26သြႃႇ​ယူဝ်းႁၢၼ်ႇ၊ၶိုၼ်း​လၢတ်ႈ​လႄႈ​ဝႃႈ၊ “ၵဝ်​ပၼ်​မၢင်ႇၵလႃႇ​ပပ်ႉတိၸမ်ႇ​လူၺ်ႈ​ၼမ်ႉ​ဢေႃႈ။ ၵူၺ်းၵႃႈ၊ၼႂ်း​ၵႄႈၵၢင်​သူ​မီး​ၸဝ်ႈ​ပႃး​ၼိုင်ႈ​ဢၼ်​သူ​ဢမ်ႇ​ႁုၸၵ်း​ၼၼ်ႉ​ဢေႃႈ။- 27ပိၵ်ႉသမ်ႉ​ၸဝ်ႈ​ၼၼ်ႉ​မႃး​လိုၼ်းလင်​ၵဝ်​သေၵေႃႈ၊ၵဝ်​ၼႆႉ​ယင်း​ဢမ်ႇ​ထိူၵ်ႈ​ၵႄႈ​သၢႆ​ၶႅပ်းတိၼ်​ၸဝ်ႈ​ၼၼ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
28လွင်ႈတၢင်း​ၸိူဝ်း​ၼႆႉ၊ပဵၼ်​ၼႂ်း​ဝၢၼ်ႈ​ပေႇထၼိ၊ၽၢႆႇ​ပုၼ်ႈ​ၼမ်ႉ​ယေႃးတၢၼ်ႇ၊တီႈ​ဢၼ်​သြႃႇ​ယူဝ်းႁၢၼ်ႇ၊ပၼ်​မၢင်ႇၵလႃႇ​ပပ်ႉတိၸမ်ႇ​ၼၼ်ႉ​ဢေႃႈ။
သြႃႇ​ယူဝ်းႁၢၼ်ႇ​ၶၢမ်ႇသၢၵ်ႈသေႇ​လွင်ႈ​ၸဝ်ႈ​ယေႇသု
29ထႅင်ႈ​ဝၼ်း​ၼိုင်ႈ၊သြႃႇ​ယူဝ်းႁၢၼ်ႇ၊ႁၼ်​ၸဝ်ႈ​ယေႇသု၊မႃး​ၸူး​မၼ်း​ယူႇ​လႄႈ၊လၢတ်ႈ​လႄႈ​ဝႃႈ၊ “တူၺ်း​လူး။ ၸဝ်ႈ​ၼၼ်ႉ​ပဵၼ်​သူဝ်းဢွၼ်ႇ​ၽြႃးပဵၼ်ၸဝ်ႈ၊ၸဝ်ႈ​ဢၼ်​ဢဝ်​ဢပျတ်ႈ​ၵူၼ်းလေႃးၵီႇ​ၼႆႉ​ၵႂႃႇ​ၼၼ်ႉ​ယဝ်ႉ။- 30ၸဝ်ႈ​ဢၼ်​ၵဝ်​လၢတ်ႈ​လႄႈ​ဝႃႈ၊ ‘ၸဝ်ႈ​ဢၼ်​မႃး​လိုၼ်းလင်​ၵဝ်​ၼၼ်ႉ၊ယင်း​ယႂ်ႇ​မျၢတ်ႈ​ၼႃႇ​သေ​ၵဝ်၊ပိူဝ်ႈ​ဢၼ်​မၼ်းၸဝ်ႈ​မီး​ဝႆႉ​ယူႇ​ဢွၼ်တၢင်း​ၵဝ်​ၵိူတ်ႇလဵင်ႉ​မႃး​ၼၼ်ႉ​ဢေႃႈ၊’ ဝႃႈ​ၼင်ႇ​ၼႆ​ၼၼ်ႉ၊ပဵၼ်​ၸဝ်ႈ​ၼႆႉ​ယဝ်ႉ။- 31ၸဝ်ႈ​ၼၼ်ႉ၊ပဵၼ်​ၽူႈလႂ်​ဝႃႈၼႆ​ၵဝ်​ဢမ်ႇ​လႆႈ​ႁု။ ၼႂ်းဝႃႈၼၼ်​သေၵေႃႈ၊ၼင်ႇ​ႁိုဝ်​ၸဝ်ႈ​ၼၼ်ႉ တၵ်း​လႆႈ​ထၢင်ႇသႃး​တီႈ​ၵူၼ်း​မဵဝ်း​ဢိသရေး၊ၸိုင်၊ၵဝ်​ၸင်ႇ​မႃး​ပၼ်​မၢင်ႇၵလႃႇ​ပပ်ႉတိၸမ်ႇ​လူၺ်ႈ​ၼမ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
32လိူဝ်​သေ​ၼၼ်ႉ၊သြႃႇ​ယူဝ်းႁၢၼ်ႇ၊ၶၢမ်ႇသၢၵ်ႈသေႇ​လႄႈ​လၢတ်ႈ​ဝႃႈ၊ “ၵဝ်​လႆႈ​ႁၼ်​ဝိၺိၺ်ႇ​ၸဝ်ႈ​ပဵၼ်​ၸိူဝ်ႉ​ၼင်ႇ​ႁၢင်ႈ​ၼူၵ်ႉတူႈ​ဢၼ်​လုၵ်ႉ​သေ​ၵႃႈၼိူဝ်​ၵၢင်ႁၢဝ်​လူင်း​မႃး​မီး​ယူႇ​ၵႃႈၼိူဝ်​မၼ်းၸဝ်ႈ​ၼၼ်ႉ​ဢေႃႈ။- 33ၸဝ်ႈ​ၼၼ်ႉ၊ပဵၼ်​ၽူႈလႂ်​ဝႃႈၼႆ​ၵဝ်​ယင်း​ဢမ်ႇ​ပႆႇ​လႆႈ​ႁု။ ၵူၺ်းၵႃႈ၊ၽြႃးပဵၼ်ၸဝ်ႈ​ဢၼ်​ပွႆႇၸႂ်ႉ​ၵဝ်​မႃး​ပၼ်​မၢင်ႇၵလႃႇ​ပပ်ႉတိၸမ်ႇ​လူၺ်ႈ​ၼမ်ႉ​ၼၼ်ႉ၊မီး​ဢမိင်ႉ​တီႈ​ၵဝ်​လႄႈ​ဝႃႈ၊ ‘မႂ်း​တၵ်း​လႆႈ​ႁၼ်​ဝိၺိၺ်ႇ​ၸဝ်ႈ​လူင်း​မႃး​မီး​ယူႇ​ၼိူဝ်​ၵူၼ်း​ၵေႃႉ​ၼိုင်ႈ​ဢေႃႈ။ ၵေႃႉ​ၼၼ်ႉ​ပဵၼ်​ၵေႃႉ​ဢၼ်​ပၼ်​မၢင်ႇၵလႃႇ​ပပ်ႉတိၸမ်ႇ​လူၺ်ႈ​ဝိၺိၺ်ႇ​မူတ်းၸၢင်ႇ​ၸဝ်ႈ​ယဝ်ႉ၊’ ဝႃႈၼႆ၊- 34ၵႃႈ​ၼင်ႇ​ဢၼ်​ဝႃႈ​ၼၼ်ႉ၊ၵဝ်​လႆႈ​ႁၼ်​ယဝ်ႉ​လႄႈ​ၶၢမ်ႇသၢၵ်ႈသေႇ​လွင်ႈ​ဢၼ်​ၸဝ်ႈ​ၼၼ်ႉ​ပဵၼ်​လုၵ်ႈၽြႃးပဵၼ်ၸဝ်ႈ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
ဢၼ်ႇတရေႇ​တင်း​ပေႇတရု​ၸွမ်းလင်​ၸဝ်ႈ​ယေႇသု
35ဝၢႆးသေ​ၼၼ်ႉ​ထႅင်ႈ​ဝၼ်း​ၼိုင်ႈ၊သြႃႇ​ယူဝ်းႁၢၼ်ႇ၊ၸုၵ်း​ယူႇ​လူၺ်ႈ​ၵၼ်​တင်း​တပႄး​မၼ်း​သွင်​ၵေႃႉ​လႄႈ၊- 36တူၺ်း​ႁၼ်​ၸဝ်ႈ​ယေႇသု၊ပႆ​တၢင်း​ၵႂႃႇ​ယူႇ​ၼၼ်ႉ​သေလႄႈ​လၢတ်ႈ​ဝႃႈ၊ “တူၺ်း​သူဝ်းဢွၼ်ႇ​ၽြႃးပဵၼ်ၸဝ်ႈ​တႃႉ။” ဝႃႈ​ၼင်ႇ​ၼႆ​ဢေႃႈ။
37တပႄး​မၼ်း​သွင်​ၵေႃႉ​ၼၼ်ႉ၊လႆႈ​ငိၼ်း​ၵႂၢမ်း​မၼ်း​လႄႈ​ၵႂႃႇ​ၸွမ်း​ၸဝ်ႈ​ယေႇသု၊ဢေႃႈ။- 38ၸဝ်ႈ​ယေႇသု၊ဝၢႆႇ​တူၺ်း​လႄႈ​ႁၼ်​ၶဝ်​ၸွမ်း​မႃး​ယူႇ​ၼၼ်ႉ​ၸင်ႇ​ထၢမ်​ဝႃႈ၊ “သူ​ႁႃ​ၵႃႈသင်၊” ဝႃႈ​ၼင်ႇ​ၼႆ​လႄႈ​ၶဝ်​ၶိုၼ်း​လၢတ်ႈ​လႄႈ​ဝႃႈ၊
“ရပ်ႉပိ။ ၸဝ်ႈ​သြႃႇ​ႁဝ်း​ယူႇ​ၵႃႈ​လႂ်​ၶႃႈ၊” ဝႃႈ​ၼင်ႇ​ၼႆ​ဢေႃႈ။ (ရပ်ႉပိ​ၼၼ်ႉ၊ပွင်ႇဝႃႈ​သြႃႇလူင်​ဢေႃႈ။)
39မၼ်းၸဝ်ႈ​ၵေႃႈ​လၢတ်ႈ​လႄႈ​ဝႃႈ၊ “မႃး​တူၺ်း​တႃႉ၊” ဝႃႈ​ၼင်ႇ​ၼႆ​လႄႈ၊ၶဝ်​ၵေႃႈ​ၵႂႃႇ​လႄႈ​လႆႈ​ႁၼ်​တီႈ​ယူႇ​မၼ်းၸဝ်ႈ​ဢေႃႈ။ ပိူဝ်ႈ​ဢၼ်​ၶိင်ႇ​ယၢမ်း​ၼၼ်ႉ၊မီး​သီႇ​မွင်း​ဝၢႆးဝၼ်း​ယဝ်ႉ​လႄႈ ဝၼ်း​ၼၼ်ႉ​ၶဝ်​ယူႇ​ၸွမ်း​မၼ်းၸဝ်ႈ​သေ​ဢေႃႈ။
40ၼႂ်း​ၶဝ်​သွင်​ၵေႃႉ​ဢၼ်​လႆႈ​ငိၼ်း​ၵႂၢမ်း​သြႃႇ​ယူဝ်းႁၢၼ်ႇ၊လႄႈ ၵႂႃႇ​ၸွမ်း​ၸဝ်ႈ​ယေႇသု၊ၼၼ်ႉ​ၵေႃႉ​ၼိုင်ႈ​ၸမ်ႉ၊ပဵၼ်​ဢၼ်ႇတရေႇ၊ၼွင်ႉၸၢႆး​သိမုၼ်ႇ​ပေႇတရု၊ဢေႃႈ။- 41မၼ်း​ၵႂႃႇ​သွၵ်ႈ​ႁၼ်​ပီႈဢၢႆႈ​မၼ်း​ဢွၼ်တၢင်း​ပိူၼ်ႈ​လႄႈ​လၢတ်ႈၼႄ​မၼ်း​လႄႈ​ဝႃႈ၊ “ႁဝ်း​လႆႈ​ထူပ်း​ႁၼ်​ၸဝ်ႈ​မေႇသိ၊ယဝ်ႉ၊” ဝႃႈ​ၼင်ႇ​ၼႆ​ဢေႃႈ။ (ၸဝ်ႈ​မေႇသိ၊ၼၼ်ႉ ပွင်ႇဝႃႈ​ၸဝ်ႈ​ၶရိၸ်ႈ၊ဢေႃႈ)။- 42မၼ်း​ၸင်ႇ​ဢွၼ်​သိမုၼ်ႇ၊ၵႂႃႇၸူး​ၸဝ်ႈ​ယေႇသု၊ဢေႃႈ။
ၸဝ်ႈ​ယေႇသု၊ယႅၵ်ႉ​တူၺ်း​မၼ်း​သေလႄႈ​လၢတ်ႈ​ဝႃႈ၊ “မႂ်း​ပဵၼ်​သိမုၼ်ႇ၊လုၵ်ႈၸၢႆး​ယူဝ်းၼႃႉ၊ဢေႃႈ။ ၸိုဝ်ႈသဵင်​မႂ်း​ၸိုင်​တၵ်း​လႆႈ​ႁွင်ႉဝႃႈ၊ၵေးၽႃႉ၊ယဝ်ႉ၊” ဝႃႈ​ၼင်ႇ​ၼႆ​ဢေႃႈ။ (ၵေးၽႃႉ၊ၼႆႉ၊ဢထိၵ်ႈပႄႇ​မၼ်း​မိူၼ်​ၵၼ်​တင်း​ပေႇတရု၊ဢၼ်​ပွင်ႇဝႃႈ၊ “မၢၵ်ႇႁိၼ်” ဢေႃႈ။)
ၸဝ်ႈ​ယေႇသု​ႁွင်ႉ​ဢဝ်​ၽိလိပ်ႉပု​တင်း​ၼႃႇႀၼေႇလႃႉ
43ထႅင်ႈ​ဝၼ်း​ၼိုင်ႈ၊ၸဝ်ႈ​ယေႇသု၊မီး​ဢလူဝ်ႇ​ၶႂ်ႈ​ၵႂႃႇ​ၵႃႈတီႈ​မိူင်း​ၵႃႇလိလႄး၊ဢေႃႈ။ မၼ်းၸဝ်ႈ​ႁၼ်​ၽိလိပ်ႉပု၊လႄႈ​လၢတ်ႈ​ဝႃႈ၊ “ၸွမ်း​ၵဝ်​မႃး​တႃႉ၊” ဝႃႈ​ၼင်ႇ​ၼႆ​ဢေႃႈ။- 44ၽိလိပ်ႉပု၊ၼၼ်ႉ၊ပဵၼ်​ၵူၼ်း​ဝဵင်း​ပႅတ်ႉၸေးတႃႉ၊မိူၼ်​ၵၼ်​တင်း​ဢၼ်ႇတရေႇ၊တင်း​ပေႇတရု၊ၶဝ်​ဢေႃႈ။- 45ၽိလိပ်ႉပု၊ၵႂႃႇ​သွၵ်ႈ​ႁၼ်​ၼႃႇႀၼေႇလႃႉ၊လႄႈ​လၢတ်ႈၼႄ​မၼ်း​လႄႈ​ဝႃႈ၊ “ႁဝ်း​လႆႈ​ထူပ်း​ႁၼ်​ၸဝ်ႈ​ဢၼ်​မူဝ်းသေႇ၊တႅမ်ႈ​ဝႆႉ​လွင်ႈ​မၼ်း​ၼႂ်း​ပိင်းၺၢပ်ႈတြႃး၊ဢိၵ်ႇတင်း​ပရေႃးၽႅတ်ႈ#1:45 “ပရေႃးၽႅတ်ႈ” - ၽူႈ​ႁေႃးလၢတ်ႈ​ၵႂၢမ်း​ၽြႃးပဵၼ်ၸဝ်ႈ​လွင်ႈတၢင်း​ဢၼ်​တၵ်း​ပဵၼ်​မႃး​တေႃႈလဵဝ်​လႄႈ​ဝၼ်း​မိူဝ်းၼႃႈ​ၶဝ်​တႅမ်ႈ​ဝႆႉ​ၼၼ်ႉ​ယဝ်ႉ။ ၸဝ်ႈ​ၼၼ်ႉ၊ပဵၼ်​ၸဝ်ႈ​ယေႇသု၊ၵူၼ်း​ဝဵင်း​ၼႃႇၸရႅတ်ႈ၊လုၵ်ႈၸၢႆး​ယူဝ်းသႅပ်ႈ၊ၼၼ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
46 ၼႃႇႀၼေႇလႃႉ၊ၵေႃႈ​လၢတ်ႈ​တီႈ​မၼ်း​လႄႈ​ဝႃႈ၊ “လွင်ႈတၢင်း​ဢၼ်​လီ​ဢၼ်​ငၢမ်း​သေ​ၸိူဝ်ႉ​သေ​ပိူင်​ၸၢင်ႈ​ပေႃႇမႃး​ၵႃႈတီႈ​ဝဵင်း​ၼႃႇၸရႅတ်ႈ၊လႆႈ​ႁိုဝ်း၊” ဝႃႈ​ၼင်ႇ​ၼႆ​လႄႈ၊
ၽိလိပ်ႉပု၊ၶိုၼ်း​လၢတ်ႈ​လႄႈ​ဝႃႈ၊ “ၸွမ်း​မႃး​တူၺ်း​တႃႉ၊” ဝႃႈ​ၼင်ႇ​ၼႆ​ဢေႃႈ။
47 ၸဝ်ႈ​ယေႇသု၊ႁၼ်​ၼႃႇႀၼေႇလႃႉ၊မႃး​ၸူး​မၼ်းၸဝ်ႈ​ယူႇ​ၼၼ်ႉ​သေယဝ်ႉ၊လၢတ်ႈ​လွင်ႈ​မၼ်း​လႄႈ​ဝႃႈ၊ “တူၺ်း​လူး။ ၵေႃႉ​ၼႆႉ​ပဵၼ်​ၵူၼ်း​မဵဝ်း​ဢိသရေး၊ၸႅတ်ႈ​ၸႅတ်ႈ၊ၵေႃႉ​ဢၼ်​ဢမ်ႇ​မီး​တီႈ​တၵ်း​ပႅတ်ႉလႅၼ်​လႆႈ​ၼၼ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
48 ၼႃႇႀၼေႇလႃႉ၊ၵေႃႈ​ထၢမ်​လႄႈ​ဝႃႈ၊ “ၸဝ်ႈႁဝ်း​ပဵၼ်​ၸိူဝ်ႉ​ၼင်ႇ​ႁိုဝ်​လႄႈ​ႁုၸၵ်း​ၵဝ်ၶႃႈ​တီႈၶႃႈ၊” ဝႃႈ​ၼင်ႇ​ၼႆ​လႄႈ၊
ၸဝ်ႈ​ယေႇသု၊ၶိုၼ်း​လၢတ်ႈ​လႄႈ​ဝႃႈ၊ “ၸူဝ်ႈ​ဢၼ်​ၽိလိပ်ႉပု၊ဢမ်ႇ​ပႆႇ​ႁွင်ႉ​ဢဝ်​မႂ်း​မႃး​ၼၼ်ႉ၊ၵဝ်​ႁၼ်​မႂ်း​မီး​ယူႇ​တႂ်ႈ​တူၼ်ႈ​မၢၵ်ႇလိူဝ်ႇ​ပုၼ်ႉ​ယဝ်ႉ၊” ဝႃႈ​ၼင်ႇ​ၼႆ​ဢေႃႈ။
49 ၼႃႇႀၼေႇလႃႉ၊ၵေႃႈ​ၶိုၼ်း​လၢတ်ႈ​လႄႈ​ဝႃႈ၊ “ၸဝ်ႈ​သြႃႇ​ႁဝ်း​ပဵၼ်​လုၵ်ႈၽြႃးပဵၼ်ၸဝ်ႈ​တီႈၶႃႈ​ဢေႃႈ။ ၶုၼ်ႁေႃၶမ်း​ၵူၼ်း​မဵဝ်း​ဢိသရေး၊ၵေႃႈ​ပဵၼ်​တီႈၶႃႈ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။
50 ၸဝ်ႈ​ယေႇသု၊ၵေႃႈ​သမ်ႉ​လၢတ်ႈ​လႄႈ​ဝႃႈ၊ “ပိူဝ်ႈ​ဢၼ်​ၵဝ်​ဝႃႈ၊ၵဝ်​ႁၼ်​မႂ်း​မီး​ယူႇ​တႂ်ႈ​တူၼ်ႈ​မၢၵ်ႇလိူဝ်ႇ​ပုၼ်ႉ၊ဝႃႈ​ၼင်ႇ​ၼႆ​လႄႈ​မႂ်း​ၸင်ႇ​ယုမ်ႇ​ႁိုဝ်း။ မႂ်း​ယင်း​တၵ်း​လႆႈ​ႁၼ်​လွင်ႈတၢင်း​ဢၼ်​ယဵင်ႈၶႅၼ်း​ယႂ်ႇ​ၼႃႇ​သေ​ဢၼ်​ၼႆႉ​လူးၵွၼ်ႇ​ဢေႃႈ၊” ဝႃႈ​ၼင်ႇ​ၼႆ​သေယဝ်ႉ၊- 51သမ်ႉ​လၢတ်ႈ​တီႈ​ၶဝ်​လႄႈ​ဝႃႈ၊ “ၵဝ်​ဝႃႈ​တီႈ​ၸိုဝ်ႈၸႂ်ႈ​မၼ်း​ၸမ်ႉ၊သူ​တၵ်း​လႆႈ​ႁၼ်​ၵၢင်ႁၢဝ်​ၽုၺ်ႇ​ပိုတ်ႇ​ဝႆႉ၊ဢိၵ်ႇတင်း​တမၢၼ်ႇၵၢင်ႁၢဝ်​ၽြႃးပဵၼ်ၸဝ်ႈ​တင်းလၢႆ၊ၶိုၼ်ႈ​ၶိုၼ်ႈ​လူင်း​လူင်း​ၸူး​လုၵ်ႈၵူၼ်း၊ယူႇ​ၼၼ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။