မတ်ႈ 1
1
လွင်ႈၸိူဝ်ႉၶိူဝ်းပူႇပေႃႈၸဝ်ႈယေႇသုၶရိၸ်ႈ
(တူၺ်း၊ လု 3:23-38)
1ၸရၢင်းၸိူဝ်ႉၶိူဝ်းပူႇပေႃႈၸဝ်ႈယေႇသုၶရိၸ်ႈ၊ဢၼ်သိုပ်ႇလူင်းမႃးၵႃႈတီႈၶုၼ်လူင်တႃႇဝိတ်ႈ၊ဢၼ်ပဵၼ်ၸိူဝ်ႉၶိူဝ်းဢႃႇပြႃႇႁၢမ်ႇ၊ၼၼ်ႉၸမ်ႉ။
2-5 ဢႃႇပြႃႇႁၢမ်ႇ၊မီးလုၵ်ႈၸၢႆးဢိၸၢၵ်ႈ၊ ဢိၸၢၵ်ႈ၊မီးလုၵ်ႈၸၢႆးယႃႇၵုပ်ႈ၊ ယႃႇၵုပ်ႈ၊မီးလုၵ်ႈၸၢႆးၸႃႉၸဵမ်ယုတႃႉ၊တင်းပီႈၼွင်ႉမၼ်းတင်းလၢႆ၊ယုတႃႉ၊မီးလုၵ်ႈၸၢႆးၽေးရိတ်ႉ၊တင်းၸေးရႃႉ၊ (ပဵၼ်လုၵ်ႈၸၢႆးၼၢင်းတႃႇမႃႇ၊ၼၼ်ႉ) ၽေးရိတ်ႉ၊မီးလုၵ်ႈၸၢႆးႁေႇၸရုၼ်ႇ၊ ႁေႇၸရုၼ်ႇ၊မီးလုၵ်ႈၸၢႆးဢႃႇရမ်ႇ၊ ဢႃႇရမ်ႇ၊မီးလုၵ်ႈၸၢႆးဢမိၼတပ်ႉ၊ ဢမိၼတပ်ႉ၊မီးလုၵ်ႈၸၢႆးၼႃႇသုၼ်ႇ၊ ၼႃႇသုၼ်ႇ၊မီးလုၵ်ႈၸၢႆးသႃႇလမုၼ်ႇ၊ သႃႇလမုၼ်ႇ၊တင်းမေးမၼ်းရႃႇၶပ်ႉ၊မီးလုၵ်ႈၸၢႆးပေႃႇၸႃႉ၊ ပေႃႇၸႃႉ၊တင်းမေးမၼ်းရုထႃႉ၊မီးလုၵ်ႈၸၢႆးဢူဝ်းပိတ်ႉ၊ ဢူဝ်းပိတ်ႉ၊မီးလုၵ်ႈၸၢႆးယေႇသႄး၊ ယေႇသႄး၊မီးလုၵ်ႈၸၢႆးၶုၼ်လူင်တႃႇဝိတ်ႈ၊ဢေႃႈ။
6ၶုၼ်လူင်တႃႇဝိတ်ႈ၊တင်းမေးမၼ်းဢၼ်ဢွၼ်တၢင်းယၢမ်ႈပဵၼ်မေးဢုရိယႃး၊မႃးၼၼ်ႉမီးလုၵ်ႈၸၢႆးသေႃးလမုၼ်ႇ၊- 7သေႃးလမုၼ်ႇ၊မီးလုၵ်ႈၸၢႆးရူဝ်းပုမ်ႇ၊ ရူဝ်းပုမ်ႇ၊မီးလုၵ်ႈၸၢႆးဢပိယႃႉ၊ ဢပိယႃႉ၊မီးလုၵ်ႈၸၢႆးဢႃႇသႃႉ၊- 8ဢႃႇသႃႉ၊မီးလုၵ်ႈၸၢႆးယူဝ်းသၽတ်ႉ၊ ယူဝ်းသၽတ်ႉ၊မီးလုၵ်ႈၸၢႆးယူဝ်းရမ်ႇ၊ ယူဝ်းရမ်ႇ၊မီးလုၵ်ႈၸၢႆးဢူဝ်းၸိယႃႉ၊- 9ဢူဝ်းၸိယႃႉ၊မီးလုၵ်ႈၸၢႆးယူဝ်းထမ်ႇ၊ ယူဝ်းထမ်ႇ၊မီးလုၵ်ႈၸၢႆးဢႃႇၶတ်ႉ၊ ဢႃႇၶတ်ႉ၊မီးလုၵ်ႈၸၢႆးႁေႇၸၵိ၊- 10ႁေႇၸၵိ၊မီးလုၵ်ႈၸၢႆးမၼႃႇသေႇ၊ မၼႃႇသေႇ၊မီးလုၵ်ႈၸၢႆးဢႃႇမုၼ်ႇ၊ ဢႃႇမုၼ်ႇ၊မီးလုၵ်ႈၸၢႆးယူဝ်းသိယႃႉ၊သေယဝ်ႉ၊- 11မိူဝ်ႈဢၼ်ၵူၼ်းမဵဝ်းဢိသရေး၊ဢမ်ႇပႆႇလႆႈၶၢမ်ႇတိဢဝ်သိမ်းဢဝ်ၵႂႃႇတီႈမိူင်းပႃႇပုလုၼ်ႇ၊ပုၼ်ႉၸိုင်၊ယူဝ်းသိယႃႉ၊မီးလုၵ်ႈၸၢႆးယေႇၶေႃးၼိ၊တင်းၼွင်ႉၸၢႆးမၼ်းလႂ်ဢေႃႈ။
12ဝၢႆးသေဢၼ်လႆႈၶၢမ်ႇတၢင်းဢၼ်တိဢဝ်ၵႂႃႇမိူင်းပႃႇပုလုၼ်ႇ၊ယဝ်ႉၼၼ်ႉ၊ယေႇၶေႃးၼိ၊မီးလုၵ်ႈၸၢႆးသႃႇလထိဢေးလႃႉ၊ သႃႇလထိဢေးလႃႉ၊မီးလုၵ်ႈၸၢႆးၸေႇရုပႃႉပေႇလႃႉ၊- 13ၸေႇရုပႃႉပေႇလႃႉ၊မီးလုၵ်ႈၸၢႆးဢပျုတ်ႉ၊ ဢပျုတ်ႉ၊မီးလုၵ်ႈၸၢႆးဢေးလျႃႇၵိမ်း၊ ဢေးလျႃႇၵိမ်း၊မီးလုၵ်ႈၸၢႆးဢႃႇၸေႃႇ၊- 14ဢႃႇၸေႃႇ၊မီးလုၵ်ႈၸၢႆးၸႃႇတုၵ်ႉ၊ ၸႃႇတုၵ်ႉ၊မီးလုၵ်ႈၸၢႆးဢၶိမ်ႇ၊ ဢၶိမ်ႇ၊မီးလုၵ်ႈၸၢႆးဢေးလျုတ်ႉ၊- 15ဢေးလျုတ်ႉ၊မီးလုၵ်ႈၸၢႆးဢေးလႃႇၸႃႇ၊ ဢေးလႃႇၸႃႇ၊မီးလုၵ်ႈၸၢႆးမတ်ႉထၼ်ႇ၊မတ်ႉထၼ်ႇ၊မီးလုၵ်ႈၸၢႆးယႃႇၵုပ်ႈ၊- 16ယႃႇၵုပ်ႈ၊မီးလုၵ်ႈၸၢႆးယူဝ်းသႅပ်ႈ၊ၽူဝ်ၼၢင်းမႃႇရိ၊လႄႈ၊ၵႃႈတီႈၼၢင်းမႃႇရိ၊ၼၼ်ႉၵိူတ်ႇလဵင်ႉမႃးၸဝ်ႈယေႇသု၊ဢၼ်လႆႈႁွင်ႉႁဵၵ်ႈဝႃႈ၊ ၸဝ်ႈၶရိၸ်ႈ၊ၼၼ်ႉဢေႃႈ။
17ပိူဝ်ႈၼႆလႄႈၸိူဝ်ႉၶိူဝ်းဢႃႇပြႃႇႁၢမ်ႇ၊သိုပ်ႇလူင်းတေႃႇထိုင်ၶုၼ်လူင်တႃႇဝိတ်ႈ၊မီးသိပ်းသီႇသိုပ်ႇ။ လုၵ်ႉတီႈၶုၼ်လူင်တႃႇဝိတ်ႈ၊တေႃႇထိုင်ၶိင်ႇဢၼ်လႆႈၶၢမ်ႇတိဢဝ်ၵႂႃႇမိူင်း ပႃႇပုလုၼ်ႇ၊မီးသိပ်းသီႇသိုပ်ႇ။ ၸႃႉၸဵမ်ၶၢမ်ႇတိၵႂႃႇတီႈမိူင်းပႃႇပုလုၼ်ႇ၊တေႃႇထိုင်ၸဝ်ႈယေႇသုၶရိၸ်ႈ၊မီးသိပ်းသီႇသိုပ်ႇဢေႃႈ။
လွင်ႈၸဝ်ႈယေႇသုၶရိၸ်ႈၵိူတ်ႇလဵင်ႉ
(တူၺ်း၊ လု 2:1-7)
18လွင်ႈတၢင်းဢၼ်ၸဝ်ႈယေႇသု၊ၵိူတ်ႇလဵင်ႉမႃးၸမ်ႉ၊ မႄႈၸဝ်ႈမႃႇရိ၊ၼၼ်ႉ၊မႆမၼ်ႈၵၼ်ဝႆႉတင်းယူဝ်းသႅပ်ႈ၊ဢေႃႈ။ ၵူၺ်းၵႃႈ၊မိူဝ်ႈဢၼ်ၶဝ်သွင်ၵေႃႉယင်းဢမ်ႇပႆႇလႆႈတိူဝ်ႉလႆႈထုၵ်ႇၵၼ်ၼၼ်ႉ၊မႃႇရိ၊ပႃးပတိၵ်ႈသၼ်ႇထေႇမႃးၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈဢေႃႈ။- 19ယူဝ်းသႅပ်ႈ၊ဢၼ်ပဵၼ်ၽူႈမၢႆမၼ်းၼၼ်ႉ၊ပဵၼ်ၵူၼ်းလီၵူၼ်းငၢမ်းလႄႈ၊ဢမ်ႇၶႂ်ႈႁႂ်ႈသရေႇမႃႇရိ၊လႆႈလုၽၢႆႇၼႃႈၵူၼ်းၼၼ်ႉၸင်ႇ၊ၵျၢမ်ႇဢၢင်ႈလွမ်ယႃႉသဵတ်ႈၸႃႇၶဝ်သွင်ၵေႃႉပႅတ်ႈတဵတ်ႇတဵတ်ႇဢေႃႈ။- 20ယၢမ်းမိူဝ်ႈဢၼ်မၼ်းယင်းၵျၢမ်ႇဢၢင်ႈၶႂ်ႈႁဵတ်းၸိူဝ်ႉၼင်ႇၼၼ်ၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်းၼႂ်းတၢင်းၼွၼ်းၽၼ်လႄႈလၢတ်ႈဝႃႈ၊ “ယူဝ်းသႅပ်ႈ၊ၸိူဝ်ႉၶိူဝ်းတႃႇဝိတ်ႈ၊႟၊ယႃႇပေၵူဝ်ႁႄပုၼ်ႈဢၼ်တၵ်းသိမ်းဢဝ်မႃႇရိ၊ႁႂ်ႈလႆႈပဵၼ်မေးမႂ်း။ ပတိၵ်ႈသၼ်ႇထေႇဢၼ်တႄႇပဵၼ်ၼႂ်းမၼ်းၼၼ်ႉ၊ပဵၼ်ၵွပ်ႈပိူဝ်ႈဝိၺိၺ်ႇဢၼ်မူတ်းၸၢင်ႇၸဝ်ႈဢေႃႈ။- 21မၼ်းတၵ်းၵိူတ်ႇလဵင်ႉလုၵ်ႈၸၢႆးမႃးလႄႈ၊မႂ်းတၵ်းလႆႈႁွင်ႉႁဵၵ်ႈၸိုဝ်ႈယေႇသု၊ဝႃႈၼႆ၊ၵွပ်ႈပိူဝ်ႈမၼ်းၼၼ်ႉတၵ်းၵႄႇၶျွတ်ႈဢဝ်ၵူၼ်းမဵဝ်းမၼ်းဢွၵ်ႇသေၵႃႈၼႂ်းဢပျတ်ႈဢေႃႈ၊” ဝႃႈၼင်ႇၼႆဢေႃႈ။
22လွင်ႈတၢင်းၸိူဝ်းၼႆႉ၊ၼင်ႇႁိုဝ်ပျႃႇတိၵ်ႈတေႃႇထႃႇဝရႃႉၽြႃးဢၼ်ဢဝ်တင်းပရေႃးၽႅတ်ႈ#1:22 “ပရေႃးၽႅတ်ႈ” - ၽူႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈလွင်ႈတၢင်းဢၼ်တၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈ ႁေႃးလၢတ်ႈဝႆႉဝႃႈ၊- 23“တူၺ်းလူး၊သၢဝ်ၵၼ်ႇၺႃႇတၵ်းပႃးပတိၵ်ႈသၼ်ႇထေႇလႄႈ၊ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ လုၵ်ႈၸၢႆးၼၼ်ႉတၵ်းလႆႈႁွင်ႉႁဵၵ်ႈၸိုဝ်ႈဢေႇမႃႇၼူၺ်ႇလႃႉ၊ဢေႃႈ၊” ဝႃႈၼႆမီးမႃးၼၼ်ႉ၊တၵ်းပျေႉၸုမ်ႇၸိုင်၊ၸင်ႇပဵၼ်ဢေႃႈ။ ဢေႇမႃႇၼူၺ်ႇလႃႉ၊ၼႆႉ၊ၶႂ်ႈဝႃႈ၊ “ၽြႃးပဵၼ်ၸဝ်ႈမီးယူႇလူၺ်ႈၵၼ်တင်းႁဝ်း၊” ဝႃႈၼႆဢေႃႈ။ #တူၺ်း၊ ဢိ 7:14
24မိူဝ်ႈဢၼ်ယူဝ်းသႅပ်ႈ၊တိုၼ်ႇမႃးၼၼ်ႉ၊မၼ်းႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉၼၼ်ႉလႄႈၸင်ႇသွင်ႇမၢင်ႇၵလႃႇသိမ်းဢဝ်မႃႇရိ၊ႁႂ်ႈလႆႈပဵၼ်မေးမၼ်းဢေႃႈ။- 25ၵူၺ်းၵႃႈ၊ၸူဝ်ႈဢၼ်ဢမ်ႇပႆႇၵိူတ်ႇလဵင်ႉမႃးလုၵ်ႈႁူဝ်သၢဝ်ၼၼ်ႉၸိုင်၊ယူဝ်းသႅပ်ႈ၊ယင်းဢမ်ႇႁဵတ်းမေႇထုင်ႇဢၼ်သိူၵ်ႈသမ်ႇၵၼ်တင်းမႃႇရိ၊လႃးလႃးလႄႈယူႇဢေႃႈ။ ယူဝ်းသႅပ်ႈ၊ၵေႃႈ၊ပၼ်ၸိုဝ်ႈပၼ်သဵင်လုၵ်ႈၸၢႆးၼၼ်ႉလႄႈဝႃႈ၊ “ယေႇသု၊” ဢေႃႈ။
Currently Selected:
မတ်ႈ 1: SHNCL
Highlight
Share
Copy
Want to have your highlights saved across all your devices? Sign up or sign in