Salmo 66
66
Salmo 66
Para sa direktor ng mga mang-aawit: Awit na isinulat ni David.
1Kayong mga tao sa buong mundo,
isigaw ninyo ang inyong papuri sa Diyos
nang may kagalakan.
2Umawit kayo ng mga papuri para sa kanya.
Parangalan ninyo siya sa pamamagitan
ng inyong mga awit.
3Sabihin ninyo sa kanya,
“O Diyos, kahanga-hanga ang inyong mga gawa!
Dahil sa inyong dakilang kapangyarihan,
luluhod ang inyong mga kaaway sa takot.
4Ang lahat ng tao sa buong mundo
ay sasamba sa inyo
na may awit ng papuri.”
5Halikayoʼt tingnan ang kahanga-hanga
na ginawa ng Diyos para sa mga tao.
6Pinatuyo niya ang dagat;
tinawid ito ng ating mga ninuno
nang naglalakad.
Tayoʼy mangagalak sa kanyang mga ginawa.
7Makapangyarihang maghahari ang Diyos, magpakailanman.
Mga bansaʼy kanyang pinagmamasdan,
kaya ang mga sumusuway sa kanya
ay hindi dapat magmalaki.
8Kayong mga tao, purihin ninyo ang Diyos!
Iparinig ninyo sa lahat ang inyong papuri.
9Iningatan niya ang ating buhay
at hindi niya hinayaang tayoʼy madapa.
10Sapagkat sinubok ninyo kami, O Diyos, upang dalisayin;
tulad namiʼy pilak na dinalisay sa apoy.
11Hinayaan nʼyo kaming mahuli sa bitag
at pinagpasan nʼyo kami
ng mabigat na dalahin.
12Pinabayaan nʼyo ang aming mga kaaway
na tapakan kami sa ulo;
parang dumaan kami sa apoy
at lumusong sa baha.
Ngunit dinala nʼyo kami sa lugar ng kasaganaan.
13Mag-aalay ako sa inyong Templo ng mga handog na sinusunog#66:13 handog na sinusunog: Tingnan ang kahulugan nito sa Lev. 1:3.
upang tuparin ko ang aking mga ipinangako sa inyo,
14mga pangakong sinabi ko noong akoʼy nasa gitna ng kaguluhan.
15Mag-aalay ako sa inyo ng matatabang hayop bilang handog na sinusunog,
katulad ng mga tupa, toro at mga kambing.
16Halikayoʼt makinig, kayong lahat
na may takot sa Diyos.
Sasabihin ko sa inyo
ang mga ginawa niya sa akin.
17Humingi ako sa kanya
ng tulong habang nagpupuri.
18Kung hindi ko ipinahayag sa Panginoon
ang aking mga kasalanan,
hindi niya sana ako pakikinggan.
19Ngunit tunay ngang pinakinggan
ako ng Diyos
at ang dalangin koʼy kanyang sinagot.
20Purihin ang Diyos,
na hindi tumanggi sa aking panalangin,
at hindi nagkait ng kanyang tapat na pag-ibig sa akin.
Currently Selected:
Salmo 66: ASD
Highlight
Copy
Compare
Share
Want to have your highlights saved across all your devices? Sign up or sign in
Biblica® Open Ang Salita ng Diyos™
Karapatang-sipi © 2009, 2011, 2014, 2025 ng Biblica, Inc.
Biblica® Open Tagalog Contemporary Bible™
Copyright © 2009, 2011, 2014, 2025 by Biblica, Inc.
Ang “Biblica” ay ang tatak-pangkalakal na nakarehistro sa Biblica, Inc. sa United States Patent at Trademark Office.
Ginamit nang may pahintulot.
“Biblica” is a trademark registered in the United States Patent and Trademark Office by Biblica, Inc.
Used with permission.
Mga Awit 66
66
Awit ng Pagpupuri at Pasasalamat
Isang Awit na kinatha para sa Punong Mang-aawit.
1Sumigaw sa galak ang mga nilalang!
2At purihin ang Diyos na may kagalakan; wagas na papuri sa kanya'y ibigay!
Awitan siya't luwalhatiin siya!
3Ito ang sabihin sa Diyos na Dakila:
“Ang mga gawa mo ay kahanga-hanga;
yuyuko sa takot ang mga kaaway, dahilan sa taglay mong kapangyarihan.
4Ang lahat sa lupa ika'y sinasamba,
awit ng papuri yaong kinakanta;
ang iyong pangala'y pinupuri nila.” (Selah)#4 SELAH: Tingnan ang Awit 3:2.
5Ang ginawa ng Diyos, lapit at pagmasdan,
ang kahanga-hangang ginawa sa tanan.
6Naging#Exo. 14:21; Jos. 3:14-17. tuyong lupa kahit na karagatan,
mga ninuno nati'y doon dumaan;
doo'y naramdaman labis na kagalakan.
7Makapangyarihang hari kailanman,
siya'y nagmamasid magpakailanman;
kaya huwag magtatangkang sa kanya'y lumaban. (Selah)#7 SELAH: Tingnan ang Awit 3:2.
8Ang lahat ng bansa'y magpuri sa Diyos,
inyong iparinig papuring malugod.
9Iningatan niya tayong pawang buháy,
di tayo bumagsak, di niya binayaan!
10O Diyos, sinubok mo ang iyong mga hirang,
sinubok mo kami upang dumalisay;
at tulad ng pilak, kami'y idinarang.
11Iyong binayaang mahulog sa bitag,
at pinagdala mo kami nang mabigat.
12Sa mga kaaway ipinaubaya,
sinubok mo kami sa apoy at baha,
bago mo dinala sa dakong payapa.
13Ako'y maghahandog sa banal mong templo
ng aking pangako na handog sa iyo.
14Pati pangako ko, nang may suliranin,
ay ibibigay ko, sa iyo dadalhin.
15Natatanging handog ang iaalay ko;
susunuging tupa, kambing, saka toro,
mababangong samyo, halimuyak nito. (Selah)#15 SELAH: Tingnan ang Awit 3:2.
16Lapit at makinig, ang nagpaparangal sa Diyos,
at sa inyo'y aking isasaysay ang kanyang ginawang mga kabutihan.
17Ako ay tumawag, sa Diyos ay nagpuri,
kanyang karangalan, aking sinasabi.
18Kung sa kasalanan ako'y magpatuloy,
di sana ako dininig ng ating Panginoon.
19Ngunit tunay akong dininig ng Diyos,
sa aking dalangin, ako ay sinagot.
20Purihin ang Diyos! Siya'y papurihan,
pagkat ang daing ko'y kanyang pinakinggan,
at ang pag-ibig niya sa aki'y walang katapusan.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2005 Philippine Bible Society