Jeremias 43
43
Si Jeremias ay Dinala sa Ehipto
1Nang masabi na ni Jeremias ang lahat ng ipinasasabi ng Panginoon na kanilang Diyos ang tungkol sa kanila, 2sinabi sa kanya nina Azarias na anak ni Hosaias, Johanan na anak ni Karea, at ng iba pang mayayabang na lalaki, “Sinungaling ka! Hindi ka isinugo ng Panginoon na aming Diyos, para sabihin sa amin na hindi kami dapat pumunta sa Ehipto upang manirahan doon. 3Si Baruc na anak ni Nerias ang naghikayat sa iyo na ibigay kami sa mga taga-Babilonia upang patayin nila kami o bihagin.”
4Kaya si Johanan na anak ni Karea at ang mga kasama niyang opisyal ng mga sundalo at ang lahat ng mamamayan ay hindi sumunod sa utos ng Panginoon na manatili sila sa Juda. 5Sa halip, dinala ni Johanan na anak ni Karea at ng mga kasama niyang opisyal ng mga sundalo ang mga natirang taga-Juda na nagsibalikan sa Juda mula sa ibaʼt ibang bansa na pinangalatan nila. Kabilang dito ang mga lalaki, babae, bata, 6at mga anak na babae ng hari na ipinagkatiwala ni Nebuzaradan na pinuno ng mga guwardiya kay Gedalias na anak ni Ahikam at apo ni Safan. Dinala rin nila sina Propeta Jeremias at Baruc na anak ni Nerias. 7Hindi sila sumunod sa Panginoon, talagang pumunta sila sa Ehipto, at nakarating sila sa lungsod ng Tapanhes.
8Doon sa Tapanhes, sinabi ng Panginoon kay Jeremias, 9“Habang nakatingin ang mga taga-Juda, kumuha ka ng malalaking bato at ibaon mo sa lupa sa gitna ng daan papasok sa palasyo ng Faraon#43:9 Faraon: Ang ibig sabihin, hari ng Ehipto. sa Tapanhes. 10Pagkatapos, sabihin mo sa kanila na ako, ang Panginoon ng mga Hukbo, ang Diyos ng Israel ay nagsasabi, ‘Susuguin ko ang lingkod kong si Haring Nebucadnezar ng Babilonia at ilalagay ko ang kanyang trono at toldang panghari sa ibabaw ng mga batong ito na ibinaon ko sa lupa sa gitna ng daan. 11Sasalakayin niya ang Ehipto at papatayin niya ang mga itinakdang patayin, at bibihagin niya ang mga itinakdang bihagin. Ang ibaʼy itinakdang mamatay sa digmaan. 12Susunugin niya ang mga templo ng mga diyos-diyosan sa Ehipto. Ang ibang mga diyos-diyosan ay masusunog din, at ang iba ay dadalhin niyang bihag. Lilinisin niya ang lupain ng Ehipto katulad ng paglilinis ng pastol ng kanyang damit upang alisin ang mga pulgas. Pagkatapos, aalis si Nebucadnezar na ligtas sa anumang pinsala. 13Talagang wawasakin niya ang mga haligi ng diyos-diyosan sa Heliopolis#43:13 Heliopolis: Sa literal, bahay ng araw. sa Ehipto, at susunugin niya ang mga templo ng mga diyos-diyosan doon.’ ”
Currently Selected:
Jeremias 43: ASD
Highlight
Share
Copy
Want to have your highlights saved across all your devices? Sign up or sign in
Ang Banal na Bibliya, Ang Salita ng Diyos™, ASD™
Karapatang-sipi © 2009, 2011, 2014, 2025 ng Biblica, Inc.
Ginamit nang may pahintulot ng Biblica, Inc.
Reserbado ang lahat ng karapatan sa buong mundo.
―――――――
Holy Bible, Tagalog Contemporary Bible™
Copyright © 2009, 2011, 2014, 2025 by Biblica, Inc.
Used with permission. All rights reserved worldwide.
