Mga Taga-Efeso 3
3
Ang Plano ng Diyos sa mga Hindi Hudyo
1Sa kadahilanang ito, akong si Pablo ay nakabilanggo ngayon dahil sa paglilingkod ko kay Kristo Hesus, sa pamamagitan ng pagtuturo ko sa inyong mga Hentil.
2Siguradong nabalitaan ninyo na ipinagkatiwala sa akin ng Diyos ang pagpapahayag ng biyaya niya para sa inyo. 3Gaya ng nabanggit ko sa sulat na ito,#3:3 Gaya … sulat na ito: O Gaya ng nabanggit ko sa isa kong sulat. ang Diyos mismo ang nagpahayag sa akin tungkol sa kanyang lihim na plano. 4Habang binabasa ninyo ang sulat kong ito,#3:4 Habang … sulat kong ito: O Kung mabasa ninyo ang sulat kong iyon. malalaman ninyo ang pagkakaunawa ko sa planong ito patungkol kay Kristo. 5Hindi inihayag ng Diyos ang planong ito sa mga tao noon, ngunit ipinahayag na niya ngayon sa mga banal#3:5 banal: O pinili. na apostol at mga propeta sa pamamagitan ng Espiritu. 6At ito nga ang plano ng Diyos: na sa pamamagitan ng Magandang Balita, ang mga Hentil ay tatanggap ng mga pangako ng Diyos kasama ng mga Hudyo, at magiging bahagi rin sila ng iisang katawan dahil sa pakikipag-isa nila kay Kristo Hesus.
7Dahil sa biyaya ng Diyos, naging tagapangaral ako ng Magandang Balitang ito sa pamamagitan ng kapangyarihan niya. 8Kahit ako ang pinakahamak sa lahat ng mga mananampalataya#3:8 mananampalataya: Sa Griyego, hagios. Tingnan ang talababa sa 1:1. Ganito rin sa talata 18|EPH 3:18 at 19|EPH 3:19., ipinagkaloob pa rin sa akin ng Diyos ang pribilehiyong ipangaral sa mga Hentil ang hindi masukat na biyayang galing kay Kristo, 9at ipaliwanag sa lahat kung paano maisasakatuparan ang plano ng Diyos. Noong unaʼy inilihim ito ng Diyos na lumikha ng lahat ng bagay, 10upang sa pamamagitan ng iglesya ay maipahayag ngayon sa mga namumuno at may kapangyarihan sa kalangitan ang karunungan niyang nahahayag sa ibaʼt ibang paraan. 11Ito na ang plano niya sa simula pa lang, at natupad niya ito sa pamamagitan ni Kristo Hesus na Panginoon natin. 12Sa pananampalataya natin kay Kristo Hesus at pakikipag-isa sa kanya, tayo ngayon ay malaya nang makakalapit sa Diyos nang walang takot o pag-aalinlangan. 13Kaya huwag sana kayong panghinaan ng loob dahil sa mga paghihirap na dinaranas ko, dahil ito sa ikabubuti#3:13 ikabubuti: O ikararangal. ninyo.
Ang Pag-ibig ni Kristo
14Kapag naiisip ko ang mga ito, lumuluhod ako at nananalangin sa Ama, 15ang manlilikha ng lahat ng nasa langit at nasa lupa.#3:15 Sa literal ang siyang nagpangalan sa bawat pamilya sa langit at lupa. 16Ipinapanalangin ko na sa kadakilaan ng kapangyarihan niya ay palakasin niya ang espirituwal ninyong pamumuhay sa pamamagitan ng kanyang Espiritu 17upang manahan si Kristo sa mga puso ninyo dahil sa inyong pananampalataya. Ipinapanalangin ko rin na maging matibay kayo at matatag sa pag-ibig ng Diyos, 18-19upang maunawaan ninyo at ng iba pang mga hinirang kung gaano kalawak, at kahaba, at kataas, at kalalim ang pag-ibig ni Kristo. Maranasan ninyo sana ito, kahit hindi ito lubusang maunawaan, upang maging ganap sa inyo ang katangian ng Diyos.
20Sa makakagawa ng higit pa sa hiniling o inaasahan natin sa pamamagitan ng kapangyarihan niyang kumikilos sa atin, 21purihin natin siya magpakailanman dahil sa mga ginawa niya para sa iglesya na nakay Kristo Hesus. Amen.
Currently Selected:
Mga Taga-Efeso 3: ASD
Highlight
Share
Copy
Want to have your highlights saved across all your devices? Sign up or sign in
Ang Banal na Bibliya, Ang Salita ng Diyos™, ASD™
Karapatang-sipi © 2009, 2011, 2014, 2025 ng Biblica, Inc.
Ginamit nang may pahintulot ng Biblica, Inc.
Reserbado ang lahat ng karapatan sa buong mundo.
―――――――
Holy Bible, Tagalog Contemporary Bible™
Copyright © 2009, 2011, 2014, 2025 by Biblica, Inc.
Used with permission. All rights reserved worldwide.
