1 Mga Taga-Corinto 10

Mga Babala mula sa Kasaysayan ng Israel

1Mga kapatid, huwag sana nating kalimutan ang nangyari sa ating mga ninuno noon. Ginabayan sila ng Diyos sa pamamagitan ng ulap, at tinulungan sila sa kanilang pagtawid sa Dagat na Pula. 2Sa pamamagitan ng ulap at ng dagat ay nabautismuhan sila bilang mga alagad ni Moises. 3Kumain silang lahat ng pagkaing ibinigay ng Diyos. 4At uminom din silang lahat ng inuming ibinigay niya, dahil uminom sila ng tubig na pinaagos ng Diyos mula sa bato. Ang batong iyon na sumáma sa kanila ay walang iba kundi si Kristo. 5Ngunit sa kabila nito, karamihan sa kanila ay gumawa ng hindi kalugod-lugod sa Diyos, at dahil dito, nangalat ang kanilang mga bangkay sa ilang.

6Ang mga nangyaring iyon sa kanila ay nagsisilbing aral sa atin upang hindi tayo maghangad ng masasamang bagay tulad nila. 7Huwag kayong sumamba sa mga diyos-diyosan, tulad ng ginawa ng iba sa kanila. Sapagkat sinasabi sa Kasulatan, “Nagpista ang mga tao, nag-inuman at nagsayawan sa pagsamba nila sa mga diyos-diyosan.”#10:7 Exo. 32:6. 8Huwag tayong gumawa ng seksuwal na imoralidad, tulad ng ginawa ng iba sa kanila. Dahil ditoʼy namatay ang 23,000 ang sa kanila sa loob lamang ng isang araw. 9Huwag ninyong subukin si Kristo#10:9 Sa ilang manuskrito, Panginoon. tulad ng ginawa ng iba sa kanila, kaya namatay sila sa tuklaw ng mga ahas. 10Huwag din kayong mareklamo tulad ng ilan sa kanila, kaya pinatay sila ng Anghel ng kamatayan.

11Ang mga bagay na itoʼy nangyari bilang halimbawa sa atin, at isinulat para magsilbing babala sa ating mga nabubuhay sa panahong nalalapit na ang katapusan ng lahat. 12Kung inaakala ninyong matatag ang inyong pananampalataya, mag-ingat kayo at baka mahulog kayo sa kasalanan! 13Walang pagsubok na dumarating sa inyo na hindi naranasan ng ibang tao. Ngunit maaasahan natin ang pangako ng Diyos na hindi niya tayo pababayaang subukin nang higit pa sa ating makakaya. Kaya kung dumaranas kayo ng pagsubok, gagawa siya ng paraan upang mapagtagumpayan ninyo ito.

14Kaya mga minamahal, huwag kayong sasamba sa mga diyos-diyosan. 15Sinasabi ko ito sa inyo bilang mga taong nakakaunawa, kaya pag-isipan ninyo ang sinasabi ko. 16Kapag iniinom natin ang alak sa kopa na ipinagpapasalamat natin sa Diyos, hindi baʼt nakikibahagi tayo sa dugo ni Kristo? Kapag kinakain natin ang tinapay na pinagpipira-piraso, hindi baʼt nakikibahagi tayo sa katawan ni Kristo? 17Kaya nga, iisang katawan lamang tayo kahit maraming bahagi, dahil iisang tinapay lamang ang ating pinagsasaluhan.

18Tingnan ninyo ang mga Israelita. Ang mga kumakain ng mga handog ay mga kabahagi sa gawain sa altar. 19Ano ang ibig kong sabihin? Sinasabi ko ba na may kabuluhan ang mga diyos-diyosan o ang pagkaing inihandog sa kanila? 20Hindi! Ang ibig kong sabihin ay inialay nila ang mga handog na iyan sa mga demonyo at hindi sa Diyos. Ayaw kong makibahagi kayo sa mga demonyo. 21Hindi tayo maaaring makiinom sa kopa ng Panginoon at sa kopa ng masasamáng espiritu, at hindi rin tayo maaaring makisalo sa hapag ng Panginoon at sa hapag ng masasamang espiritu. 22Gusto ba nating magselos ang Panginoon? Mas makapangyarihan ba tayo kaysa sa kanya?

Ang Kalayaan ng Mananampalataya

23May nagsabi, “Maaari nating gawin ang kahit ano,” ngunit hindi lahat ay nakakatulong. “Maaari nating gawin ang kahit ano,” ngunit hindi lahat ay nakakabuti. 24Huwag lamang ang sarili ninyong kapakanan ang inyong isipin kundi ang kapakanan din ng iba.

25Kainin ninyo ang anumang karneng nabibili sa pamilihan nang hindi na nagtatanong upang hindi kayo usigin ng inyong konsensiya. 26Sapagkat sinasabi ng Kasulatan, “Ang mundo at ang lahat ng naroroon ay pag-aari ng Panginoon.”#10:26 Salmo 24:1.

27Kung imbitahan kayo ng isang hindi mananampalataya sa isang salo-salo at gusto ninyong dumalo, kainin ninyo ang anumang ihain sa inyo nang hindi na nagtatanong upang hindi kayo usigin ng inyong konsensiya. 28Ngunit kung sinabihan kayo na ang pagkain ay inihandog sa mga diyos-diyosan, huwag na kayong kumain, alang-alang sa nagsabi nito sa inyo, para walang mabalisang konsensiya. 29Ang konsensiya ng iba ang tinutukoy ko, hindi ang konsensiya ninyo. Bakit hinuhusgahan ng konsensiya ng iba ang kalayaan ko? 30Kung nagpasalamat naman ako sa Diyos sa pagkain ko, bakit ako tinutuligsa sa pagkain ko nito?

31Kaya kung kumain man kayo o uminom, o anuman ang gawin ninyo, gawin ninyo ang lahat ng ito para sa kaluwalhatian ng Diyos. 32Huwag kayong gagawa ng kahit anong makakatisod sa mga Hudyo o Hentil, o sinuman sa iglesya ng Diyos. 33Sundin ninyo ang aking ginagawa: Sinisikap ko na sa lahat ng aking ginagawa ay matutulungan ko ang lahat. Hindi ang sarili kong kapakanan ang aking iniisip kundi ang kapakanan ng iba upang maligtas sila.

Currently Selected:

1 Mga Taga-Corinto 10: ASD

Highlight

Copy