1 Mga Cronica 13
13
Ang Pagkuha ng Kahon ng Kasunduan
(2~Sam. 6:1‑11)
1Nakipag-usap si David sa kanyang mga opisyal at sa mga kumander ng libu-libo at daan-daang sundalo. 2Pagkatapos, sinabi niya sa lahat ng Israelitang naroon, “Kung gusto ninyo at kung kalooban ng Panginoon na ating Diyos, magpapadala tayo ng mensahe sa lahat ng kababayan natin sa buong Israel, pati na sa mga pari at mga Levita na kasama nila sa mga bayan at pastulan. Papuntahin natin sila rito upang makiisa sa atin. 3Ito na ang panahon upang kunin natin ang Kahon ng ating Diyos, dahil hindi natin ito pinahalagahan nang si Saul pa ang hari.” 4Pumayag ang buong kapulungan dahil nakita nilang iyon ang tamang gawin.
5Kaya tinipon ni David ang lahat ng mga Israelita, mula sa Ilog Shihor sa Ehipto hanggang sa Lebo-hamat,#13:5 Lebo-hamat: O Paakyat ng Hamat. upang kunin ang Kahon ng Diyos#13:5 Kahon ng Diyos: Ito ang Kahon ng Kasunduan. sa Kiriat-jearim. 6Pumunta si David at lahat ng kasama niyang mga Israelita sa Baala (o Kiriat-jearim) na sakop ng Juda para kunin doon ang Kahon ng Diyos na Panginoon, na tinatawag sa pangalan ng Panginoon na nakaluklok sa gitna ng mga kerubin.
7Kinuha nila ang Kahon ng Diyos sa bahay ni Abinadab at ikinarga sa bagong kariton. Sina Uza at Ahio ang umaalalay sa kariton. 8Buong lakas na nagdiwang si David at lahat ng mga Israelita sa presensya ng Diyos. Umawit sila at tumugtog ng mga alpa, lira, tamburin, pompyang at trumpeta.
9Nang dumating sila sa giikan ni Quidon,#13:9 Quidon: O Nacon. hinawakan ni Uza ang Kahon, dahil nadulas ang mga baka. 10Nagalit nang matindi ang Panginoon kay Uza dahil hinawakan niya ang Kahon. Kaya namatay siya roon sa presensya ng Diyos.
11Nagalit si David dahil biglang pinarusahan ng Panginoon si Uza. Ito ang dahilan kaya hanggang ngayon ang lugar na iyon ay tinatawag na Perez-uza.#13:11 Perez-uza: Ang ibig sabihin, biglang pagparusa kay Uza.
12Nang araw na iyon, natakot si David sa Diyos at sinabi niya, “Paano madadala sa lungsod ko ang Kahon ng Diyos?” 13Kaya nagpasya siyang huwag na lang dalhin sa kanyang lungsod#13:13 kanyang lungsod: Sa Hebreo, Lungsod ni David. ang Kahon ng Diyos. Sa halip, iniwan niya ito sa bahay ni Obed-edom na taga-Gat. 14Nanatili ito sa bahay ni Obed-edom sa loob ng tatlong buwan, at pinagpala ng Panginoon ang pamilya ni Obed-edom at ang lahat ng ari-arian niya.
Currently Selected:
1 Mga Cronica 13: ASD
Highlight
Share
Copy
Want to have your highlights saved across all your devices? Sign up or sign in
Ang Banal na Bibliya, Ang Salita ng Diyos™, ASD™
Karapatang-sipi © 2009, 2011, 2014, 2025 ng Biblica, Inc.
Ginamit nang may pahintulot ng Biblica, Inc.
Reserbado ang lahat ng karapatan sa buong mundo.
―――――――
Holy Bible, Tagalog Contemporary Bible™
Copyright © 2009, 2011, 2014, 2025 by Biblica, Inc.
Used with permission. All rights reserved worldwide.
