Ab'e Roma Enhandhula
Enhandhula
Paulo yaghandiikira ab'e Roma embaluwa eno olw'okwetegekera okukyalira Ekikunsu ky'Abaikiriza mu Kurisito eky'e Roma. Mu ntegeka ye, yali nga wa kukola mu Bakuristo abaali eyo okumala ekiseera, memale beene abo bamugemereku asobole okuja mu Supania. Yaghandiika ng'ainhonhola endhikiriza y'Ekikurisito nga mwene bwe yali agitegeera. Mu kitabo kino n'omuli obukwenda bwa Paulo obusinga kuba bwidhuvu.
Ng'amaze okulamusa abantu ab'omu Kikunsu ky'Abaikiriza mu Kurisito eky'e Roma n'okubakobera nga bw'abasabira, Paulo aja mu maiso n'okubakobera ensonga enkulu mu mbaluwa eno. Ensonga eyo n'eno nti: “Mu Mawulire Amalungi obutuufu bwa Katonda mwe bubonekera. Obutuufu obwo Katonda abutugha lwa kwikiriza; busookera mu kwikiriza era bweyongerera mu kwikiriza.” (1:17)
Paulo oyo amala yaagaziya ensonga eno ati: Abantu boonaboona, Abayudaaya n'abamaghanga agandi, beetaaga okutoolebwaku omusango, kuba boonaboona bafaanana mu kufugibwa obuyinza bw'ekibi. Era abantu bagheebwa obutuukirivu nga babita mu kwikiriza mu Yesu Kurisito. Paulo bw'amala ekyo, aizaaku okwinhonhola enkolagana ey'omuntu ni Katonda empyaka, abantu mwe bafunira obulamu obuyaaka olw'okweyimba ni baba omuntu omulala ni Kurisito. Ekiva mu kweyimba okwo, ni kino: omuntu oyo aikiriza, aba n'emiraala ni Katonda era ni Mwoyo wa Katonda, era ava mu maani g'ekibi n'okufa, yaaba wa idembe.
Okuva ku nkenga eyokutaanu okutuuka ku yomunaana Paulo akoba ekyateesaagho Amateeka ga Katonda, era yaayogera ni ku maani ga Mwoyo wa Katonda mu bulamu obw'omuntu aikiriza. Olwo ni yaatoolera okwoleka ensambo Abayudaaya n'abamaghanga agandi ye batuukaanira obukalamu mu ntegeka Katonda ye yategekera abantu boonaboona. Akakasa ati eky'Abayudaaya okuloba Yesu kyali mu ntegeka ya Katonda, olwo abantu boonaboona bafune omwagaania okutuuka ku kisa kya Katonda mu Yesu Kurisito. Era takiikiriza nga Abayudaaya baidhanga kuloba Yesu ekiseera kyonakyona.
Mu kufundikira, Paulo aghandiika ku nfaanana y'obulamu Omukurisito bw'agwaine okubaamu, nga amaani agata ku kugonzania okugwaine okubaagho mu Bakuristo. Aghandiika ni ku bikulu ebindi nga bino: okugheereza Katonda, ebintu Omukurisito by'ateekwa okukolera abafuzi ab'ensi era ni bantu baine, n'ebigema ku mwoyo gw'omuntu nga bwegumulumiriza. Mu bukwenda bwe asembyayo ebibono ebisaaka Katonda.
Ebirimu nga bwe biiraganwaku
Enhandhula, n'ekikulu embaluwa eno ky'eriku 1:1-17
Obwetaavu obw'omuntu obw'okulokolebwa 1:18—3:20
Ensambo Katonda yaalokolamu 3:21—4:25
Obulamu obuyaaka mu Kurisito 5:1—8:39
Isiraeli mu ntegeka ya Katonda 9:1—11:36
Eneebisa y'Ekikurisito 12:1—15:13
Okufundikira, n'okulamusa kwa Paulo 15:14—16:27
Currently Selected:
Ab'e Roma Enhandhula: Sog
Highlight
Share
Copy
Want to have your highlights saved across all your devices? Sign up or sign in
Baibuli Ekibono kya Katonda © The Bible Society of Uganda, 2014