Matayo Enhandhula
Enhandhula
Mu kitabo kino eky'Amawulire Amalungi nga bwe gaaghandiikibwa Matayo, Matayo oyo atulomboodhera ati Yesu n'Omulokozi Katonda ye yabitamu okutuukiriza ebyo byonabyona bye yasuubiza abantu be mu Ndagaano Enkaire. Amawulire Amalungi gano ti ga Bayudaaya bonka, eighanga Yesu mwe yazaalibwa era mwe yali nga ali mu bulamu bwe obw'oku nsi, aye ga nsi yoonayoona.
Ekitabo kino ekya Matayo kyasengekebwa bukalamu inho. Kitoolera n'okuzaalibwa kwa Yesu, kyainhonhola okubatizibwa kwe n'okukemebwa. Olwo ni kyaja ku mirimo gye yakolera mu Galilaaya: ng'akobera abantu ekibono kya Katonda, ng'abeegeresa, era ng'abawonia. Ekitabo kino era kyogera ku lugendo lwa Yesu nga bwe lwali okuva e Galilaaya okutuuka e Yerusalemu. Era kyogera ku ebyo ebyamutuukaku mu Sabbato eyasembayo nga bwe byaja nga biiraganwaku okutuukira irala ku kukomererwa ku musalaba, era ni ku kuzuukira.
Ekitabo kino kiraga nga Yesu n'Omwegeresa omukulu, ali n'obukumu, okuvuunula Amateeka ga Katonda, era ayegeresa ku Bwakyabazinga bwa Katonda. Ebisinga bungi ku ebyo bye yayegeresa byasolozebwa nga bwe biiraganwaku mu bikunsu, biti: (1) Okwegeresa okwali ku Lusozi: muno mulimu ebigema ku nsambo abantu ab'omu Bwakyabazinga obw'omu igulu ye bagwaine okwebisaamu, ebyo bye bagwaine okukola, ebyo bye bafuna olw'okuba mu Bwakyabazinga obwo, n'ebyo Katonda bye yabategekera (Enkenga 5—7). (2) Okugalaga kwa Yesu eri Abeegeresebwa be eikumi n'ababiri ng'aja okubatuma (Enkenga 10). (3) Enfumo edhigema ku Bwakyabazinga obw'omu igulu (Enkenga 13). (4) Okwegeresa ku makulu ag'okuba omwegeresebwa (Enkenga 18). Okwegeresa ku nkomerero y'ebiseera bino bye tulimu era n'okwidha kw'Obwakyabazinga obw'omu igulu (Enkenga 24—25).
Ebirimu nga bwe biiraganwaku
Oluzi lwa Yesu n'okuzaalibwa kwe 1:1—2:23
Okwegeresa kwa Yoanne Omubatiza 3:1-12
Okubatizibwa n'okukemebwa kwa Yesu 3:13—4:11
Okwegeresa kwa Yesu mu bantu ng'ali mu Galilaaya 4:12—18:35
Olugendo lwa Yesu okuva e Galilaaya okutuuka e Yerusalemu 19:1—20:34
Sabbato eyasembayo okumpi ni Yerusalemu, ni munda mwakyo 21:1—27:66
Okuzuukiza n'okweyoleka okwa Musengwa 28:1-20
Currently Selected:
Matayo Enhandhula: Sog
Highlight
Share
Copy
Want to have your highlights saved across all your devices? Sign up or sign in
Baibuli Ekibono kya Katonda © The Bible Society of Uganda, 2014