Amateeka Agokubiri 25

Eiteeka erigema ku kukuba abaizi b'emisango

1Musa yaakoba Abaisiraeli ati: “Ghasobola okubaagho Abaisiraeli babiri nga bali n'enkaayana ghagati ghaibwe. Baaja y'abalamuzi baabagha ensala owundi yaasinga omusango, ate owundi gwamusinga. 2Ole ye gusinze bw'anaabanga ng'aiziiza omusango ogumugwaniza okukubwa, omulamuzi aidha kulagiranga bamulambaaze mu maiso ge, memale bamukube emikuzi egisaanira omusango gwe yaiza. 3Omulamuzi asobola okumusalira okumukuba emikuzi egighera amakumi ana, aye taidha kuswikangagho. Okumukuba egisinga agho kuba kumuswaza mu baine. #2 Kor 11:24

4“Otasibanga nte munwa bw'eba ng'emulungula engaano.” #1 Kor 9:9; 1 Tim 5:18; Mat 22:24; Mar 12:19; Luk 20:28

Omusaadha ky'ateekwa okukolera muganda we eyafa

5“Abasaadha aboluganda bwe banaabanga nga baba ghalala, owundi n'afa nga tazaire mwana wa bulenzi, namwandu taabayirenga musaadha wundi atali waluganda lwa mufu. Muganda w'omufu aidha kutwalanga namwandu oyo amubayize, amukolere ekyo muganda w'omusaadha omufu ky'ateekwa okukolera namwandu. #Mat 22:24; Mar 12:19; Luk 20:28 6Omwana omulenzi ye banaasookanga okuzaala baidhanga kumugulika eriina lya muganda we eyafa, olwo eriina eryo lirobe kusaanagho mu Isiraeli. 7Aye omusaadha oyo bw'anaabanga nga tayenda kubayiza namwandu wa muganda we, namwandu oyo anaajanga y'abakulembeze mu kifo eky'olwekobaano ku mulyango ogwingira ekibuga, yaabakoba ati, ‘Muganda wa baze ali kuloba okugulika eriina lya muganda we okwidhukirwanga mu Isiraeli. Tali kwenda kunkolera ekyo muganda w'omusaadha ky'ateekwa okukolera namwandu.’ #Ru 4:7-8 8Agho abakulembeze b'ekibuga banaamwetanga baayogera naye. Era bw'anaabanga ng'akaalobye okumubayiza, 9namwandu wa muganda we oyo aidha kwidhanga gh'ali mu maiso g'abakulembeze, amutoolemu engaito mu kigere ekindi, amufuudhe n'amatanta mu maiso ng'amukoba ati, ‘Omusaadha aloba okuzaalira muganda we omusika, atyo bw'abisibwa.’ 10Amaka ge mu Isiraeli ganaayetebwanga, ‘Amaka ag'eyatoolebwamu engaito.’ ”

Amateeka agandi

11Musa yaakoba Abaisiraeli ati: “Abasaadha bwe banaabanga nga bali kulwana beene na beene, memale omukazi ow'owundi n'aidha okuteekuluza iba ku ole ali kumukuba, olwo n'agema ebitundu eby'ekyama eby'ole ali kukuba iba, 12omukazi oyo aidha kutemwangaku omukono aghazira kusaasira naire.

13“Mutabanga bakupankupania, nga mukozesa ebipimo ebitali bituufu mu kupima obuzito, #Lev 19:35-36 14n'ebigero ebitali bituufu mu kugera obungi bw'ebintu. 15Mukozesenga ebipimo ebituufu n'ebigero ebiidhuvu, memale olwo mughange okughangaalira mu nsi Musengwa Katonda waimwe y'ali kubagha. 16Kuba Musengwa Katonda waimwe yeenhinhata kiisi akola ebibi ebiri ng'oti n'ebyo.”

Ekiragiro eky'okwita Abamaleki

17Musa yaakoba Abaisiraeli ati: “Mwidhukire Abamaleki kye baabakola, bwe mwali mu lugendo nga muva e Misiri. #Kuv 17:8-14; 1 Sam 15:2-9 18Baabalumba bwe mwali nga mukooye era nga muwoiremu amaani, baaloba kutya Katonda, baita boonaboona abaali nga basembyeyo einhuma waimwe, ng'amagulu gabazitoighe. 19Agho ni, Musengwa Katonda waimwe bw'alibagha okutyama mu nsi ni mutereera, n'atoolagho abazigu baimwe boonaboona ababeezungulwire mu nsi y'ali kubagha okuba obutaka bwaimwe, mulizikiriza Abamaleki abo mwabasaaniagho, baaloba kwidhukirwanga ku nsi. Muteerabiranga kukola ekyo.”

Currently Selected:

Amateeka Agokubiri 25: Sog

Highlight

Copy

Compare