Amateeka Agokubiri 17

Emisengo egiriku ekikyamu

1“Mutaghangayo musengo ye Musengwa Katonda waimwe, ogw'ente oba entaama eriku ekikyamu, oba eriku akantu koonakoona akatali kalungi; kuba ekyo kiba kyenhinhalwa ye Musengwa Katonda.

Okwita omuntu asinza ebitali Katonda

2“Ghasobola okubaagho, mu kindi ku bibuga byaimwe, omusaadha oba omukazi yaakola ekibi, ng'amenha endagaano ya Musengwa Katonda waimwe. 3Yaaja yaakubira amakiryaivu ebintu Musengwa Katonda bye yalobera okusinza, bino: bakatonda, oba endhuba, oba omwezi, oba edhindi ku muunienie. #Kuv 22:20 4Bwe munaawuliranga ekintu ekyo, munoonerezenga n'obwegendereza nga muli kukibuulirizaaku. Era bwe kinaabanga nga kikakasiibwa nga kituufu, nti ekyenhinhalwa ekyaga agho kikoleibwa mu Isiraeli, 5omusaadha oyo oba omukazi oyo akoze ekibi ekyo, munaamufulumyanga ku luya kw'ekibuga kyaimwe, mwamukuba amabaale yaafa. 6Aye aidha kwitibwanga nga ghaligho abadhulizi babiri oba basatu abamulumiriza. Bwe ghanaabangagho omudhulizi omulala yenka, omuntu oyo taidha kwitibwanga.#Kub 35:30; Ma 19:15; Mat 18:16; 2 Kor 13:1; 1 Tim 5:19; Heb 10:28 7Abadhulizi n'abanaasookanga okumukuba okutoolereza okumwita, memale abantu abandi boonaboona baamukuba mu nsambo eyo, mwidha kwetoolangaku ekibi ekyo.#1 Kor 5:13

Okusala emisango emikalangufu

8“Ghasobola okubaagho emisango gye mutasobola kusalira mu bibuga byaimwe: ng'egy'abakaayanira ebintu, oba egy'ebiwundu ebituusiibwa ku bantu, oba egy'okwawulagho obutemo n'okwita omuntu ng'ole tagendereire. Ekyo bwekinaabangagho, munaasitukanga mwaja mu kifo Musengwa Katonda waimwe ky'aliba ng'alonzeegho okumusinzizangamu. 9Olwo mwayandhula emisango egyo ye bakabona Abalevi, ni y'omulamuzi anaabanga nga n'aligho mu kiseera ekyo abo n'abanaabaghanga ensala y'emisango egyo. 10Olwo munaabanga nga muli n'okujiira ku nsala yaibwe, mwatuukiriza byonabyona bye balagiire aghazira kukyusaamu naire. 11Munaikirizanga ensala yaibwe, era mwatuukirizanga byonabyona bye balagiire aghazira kukyusaamu waire ekintu ekirala kiti. 12Omuntu yeenayeena aneekuluntazanga, n'atawulira mulamuzi oba kabona ali eyo mu luwalo olw'okugheereza mu maiso ga Musengwa Katonda, aidha kwitibwanga bwitibwe mu nsambo eyo mwidha kwetoolangaku ekibi ekyo mu Isiraeli. 13Agho abantu boonaboona bwe banaawuliranga ekibairegho, baidha kutyanga. Olwo ghalobe kubaagho muntu wundi airayo kwekuluntaza atyo.”

Amateeka agagema ku kulonda kyabazinga

14Musa yaakoba Abaisiraeli ati: “Bwe mulimala okutuuka mu nsi Musengwa Katonda waimwe y'aja okubagha, ni mugitwala era ni mu gityamamu, kisoboka okuba nga mulyetaaga okutaagho kyabazinga abafuge ng'oti n'amaghanga agandi goonagoona agaliba nga gabeezungulwire. #1 Sam 8:5 15Aye mumalanga kukakasa, nga ye muli kutaagho n'oyo Musengwa Katonda y'alonze. Ateekwa okuba nga wa ighanga lyaimwe. Mutagezangaku kutaagho musenze kuba kyabazinga waimwe. 16Era kyabazinga oyo atagezangaku kufuna mbalaasi kamaala, waire okwizaayo abantu e Misiri ayongere okufunayo embalaasi edhisingagho obungi. Kuba Musengwa Katonda yakoba ati timuja kwirayo eyo kabiri. #1 Bakyab 10:28; 1 Byom 1:16; 9:28 17Kyabazinga alobenga kubayiza bakazi kamaala, olwo omwoyo gwe lwe gunaalobanga okutwalirizibwa einho. Era alobenga kwebbuutaku bukombe bungi obwa feeza ni zaabu. #1 Bakyab 10:14-22, 27; 11:1-8; 2 Byom 1:15; 9:27 18Bw'alityama ku kityamo kye eky'obwakyabazinga, alyeghandiikira amateeka gano mu kitabo ng'agatoola mu ekyo ekiri ni bakabona Abalevi. 19Ekitabo ekyo kiidha kumubanga kumpi, era aidhanga kukisoma enaku dhoonadhoona edh'obulamu bwe, aghange okwega okutyanga Musengwa Katonda we n'okukuumanga byonabyona ebiragirwa mu kitabo ekyo. 20Bw'anaakolanga atyo, ekyo kinaamuwonianga okwekuluntaza n'okulowooza ati n'asinga Baisiraeli baine. Era kyamuwonia okudaaliimanga n'ava ku biragiro bino. Olwo anaaghangaaliranga ku bwakyabazinga bwe, ni baidhukulu be abalimwiririra boona baabughangaaliraku, mu Isiraeli.”

Currently Selected:

Amateeka Agokubiri 17: Sog

Highlight

Copy

Compare