Matiu 28
28
O Iesu i katutur melet gusun a minat
(Mk 16:1-10; Lk 24:1-12; Jn 20:1-10)
1Numur tan a Bung na Sabat, una kobot raut una mugano bung una wik, o Maria Magdalen, ma ara Maria kai der wan sur der in tama a kulam na minat. 2Ma a labino guri i wanpat, uni ara ensel anun a Labino i wan pirso tagisapat una langit sur a kulam na minat, ma i bulus gisen ru a wat, ra i kis taru netes uni. 3In masarino i talapor elar namin nememe, ma anun in namalu i kabang elar nama busu na top. 4A kum tene tamtamabat det ngaran doko i, det neneder, ra det elar mukut nama kum minat.
5A ensel i watungi tan a aru ino ra lena, “Gong mur ngara. A tasmani lena, mur sisio sur o Iesu, i ra di sak wat tari unin nanai kutus. 6#Mt 12:40; 16:21Ke kis mo nin. I sa katutur melet elar nama nun a wasiso. Mur wan urin, ma mur in tama a nubual ra i inep taru uni. 7Numur mur in nan lakit, ma mur in inanos anun a kum nat na ususer lena, ‘I sa laun melet gusun a minat. Uniri in mugu utong o Galili. Mot in tama i tong.’ Uniri a sa inanos mur nami.”
8Der wan lakit gusun a kulam na minat. Der ngara, ikut a labino gasgas kai i los der. Der kalabor sur anun a kum nat na ususer sur der in inanos det. 9Ra der wan nanan, o Iesu i wanpat kisin torom der. Ma i watungi tander lena, “Wakak na kobot torom mur.” Der wan toromi, der pam aru kikino ma der lotu toromi. 10#Mt 26:32Ma o Iesu i watungi tander lena, “Gong mur ngara. Mur in nan ma mur in inanos a kum tistising, sur det in nan utong o Galili, ma det in tama iau tong.”
A wasiso anun a kum tene tamtamabat
11Ra aru ino der sa wan taru, a ramano kum tene inaim ra det tamtamabat a kulam na minat, det wan usapat o Jerusalem. Ma det inanos a kum lamlabino tene etabor torom o God una kum utna rop ra i wanpat tong una kulam na minat. 12Ra a kum lamlabino tene etabor ma a kum mugumugu det kis tomo, ma det wasiso tomo sur tu kisapi ra det in muri. Numur det pitar tar a labino mani torom a kum tene inaim, 13ra det watungi lena, “Mot in watungi kut lenri, ‘Una mirum ra met inep dumun, anun a kum nat na ususer det wanpat, ma det wolong pas a minatino.’ 14Ra a mugumugu tagun a gapman in longoro a utna ri, ra in iting uni, met in warut mot, ma met in palos pas mot gusun a warkurai.” 15Ra a kum tene inaim det los pas a mani, ma det pami elar nami ra di sa inanos tar det uni. Ma a wasiso ri i wan sarara torom a taro Juda tuk uniri.
O Iesu i wanpat torom anun a kum nat na ususer
(Mk 16:14-18; Lk 24:36-49; Jn 20:19-23; Ap 1:6-8)
16 #
Mt 26:32
A noino ma ra nat na ususer anun o Iesu det wan utong o Galili una tangai ra o Iesu i sa inanos tar det uni. 17Det tama o Iesu, ra det lotu toromi, ikut ara taro tagun det ka det nurnur. 18#Jn 13:3; Ep 1:20-22O Iesu i wan milau det, ma i watungi tandet lena, “O God i sa pitar rop tar a warkurai tang, sur an warkurai sur a kum utna rop sapat una langit ma nin kai upiso. 19#Mk 16:15-16; Ap 1:8I mo ra mot in nan, mot in ususer a taro tagun a kum gapman rop, sur det kai anung a kum nat na ususer. Mot in baptaiso det nama risan o Tita, ma o Nutunu, ma a Tokodos na Nion. 20Ma mot in ususer det sur det in mur a kum wasiso rop ra a sa watung tari tamot. Ma i lingmulus lena iau, an kis tomo nam mot tuk una ururop ina rakrakon bual.”
Currently Selected:
Matiu 28: kqw
Highlight
Share
Copy
Want to have your highlights saved across all your devices? Sign up or sign in
© 2019 Wycliffe Bible Translators, Inc. All rights reserved.