TITO 1
1
Go bea bagolo. Go lwa le baaroši
1Paulo mohlanka wa Modimo le Moapostola wa Jesu Kriste ka go ya ka tumelo ya bahlaolwa ba Modimo, le ka tsebo ya therešo ye e išago borapeding. 2Ka go holofela bophelo bjo bo sa felego, bjo Modimo yena Morereši a bo holofedišitšego batho mola mabaka a bogologolo a sešo a ba gona, 3a tla a tšweletša lentšu la gagwe ka lebaka la gona ka boseta bjo nna ke bo gafetšwego ka taelo ya Mophološi wa rena, ka taelo ya Modimo.
4Ke ngwalela wena Tito, e o lego ngwanaka wa ruri ka tumelo ye re lego batee ka yona.
Go gaugelwa le go šokelwa le go khutšišwa a di be nago di etšwa go Modimo Tata wešo le go Jesu Kriste Mophološi wa rena.
5Mola ke go šadiša Kereta e be e le gore o phethe o tlatše tše di bego di sa hlaela, o bee bagolo o eya le metse ka mo ke go laetšego ka gona. 6E be batho ba ba se nago bosodi, monna e be wa mosadi o tee, e a nago le bana ba ba dumetšego, e sego ba go tsebja bohlola le go se kwe. 7Gobane molebeledi, go swanetše ge e le motho e a se nago senyalo, gobane ke molaki wa Modimo. E se ke ya ba senganga, goba mogalefi, le ge e le monwi, goba motho wa mereba, le ge e le wa go nyaka leruo le lebe. 8A e be motho e a ratago baeng, moratabolo, wa tlhaologanyo, moloki, mokgethwa, moithswari. 9A e be motho wa go ya ka thuto ya lentšu le le tiilego le, gore a kgone go eletša batho ka thuto ye e se nago phokolo, a kgone go sola baganyetši.
10Gobane go na le ba bantši ba ba ganago go bušwa, batii ba maleme le baforaforetši, gagolo mo go ba lebollo. 11Ke bona ba ba swanetšego go thibja melomo, gobane ba ferekanya batho ka malapa ka thuto yeo e sa tsebalegego, e le go nyaka leruo le lebe. 12E mongwe wa bona, moporofeta wa gabo bona beng, o itše: Bakereta e sa le mola ke babatamaaka, dibata tše šoro, dimpa tša dibodu! 13Lefoko le le šupa se ba lego sona. Ba sole ka thata, ba fole bolwetši bjoo ka tumelo; 14ba lese go šetša dinonwane tša Bajuda le ditaelo tša batho ba ba hlanogetšego therešo. 15Basekegi ba sekegetšwe ke tšhole. Ba tšhila le ba ba sa dumelego ba tšhilafaletšwe ke tšohle, ka gobane ba tšhilafaletše kgopolo le letswalo. 16Ba ipolela ba re: Modimo re a mo tseba, mme ba mo latola ka mediro. Ke ba makgapha le ba go se kwe; ga go modiro o botse wo ba kago o botegela.
Currently Selected:
TITO 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.