DIEMA 1
1
Bohlale bo a bitša
1Diema tša Salomo morwa wa Dafida kgoši ya Isiraele.
2Ke tša go tseba bohlale le thuto, tša go hlatha dipolelo tša tlhaologanyo, 3go amogelwe thuto le tlhalefo le bothakga le molao le tše bolo, 4mohlokatsebo a fiwe maano, sogana le fiwe tsebo le kelelo. 5Yo bohlale o tlo di kwa, a atelwa ke mahlale; le wa maitse a huma dikeletšo, 6a hlaloganya puo ya diema le merero, le mmolelelo wa bahlale, le diphiri tša bona.
7Go boifa Morena ke gona go thoma tsebo. Bohlale le thuto di nyatšwa ke mašilo.
8Ngwanaka! Theetša tayo ya tatago; o se nyatše thuto ya mmago. 9Tšonatšeo e tlo ba seala se se rategago mo hlogong ya gago, le pheta molaleng wa gago.
10Ngwanaka! Ge badiradibe ba go gokeletša, o gane. 11Ge ba re: E riye, re lalele madi, re fo khukhunetša motho a se na molato, 12ba phelago re ba metše bjalo ka lebitla, ba go loka a ba etše ba go theogela mabitleng, 13re yo hwetša thoto yohle ya matsaka, mme nywako ya rena e tla tlala dithebola, 14ba re: Kwana le rena, re hlakanele khwama setee ka moka.
15Ngwanaka! Se sware ka tsela ya bona; iletša leoto la gago mebila ya bona. 16Gobane maoto a bona a kitimela bobe; ba kganyela go yo thula madi. 17Go thea molaba, nonyana tšohle di go bona, e tla ba lefela. 18Mme bona ba lakaka madi a gabobona, ba tsoma maphelo a gabo. 19Ke tšona ditsela tša bohle ballaleru; le tlo ba la amoga beng ba lona bophelo.
20Bohlale bo gowa bo le kua ntle; bo hlaboša lentšu kwa mapatlelong. 21Bo goeletša bo le gare ga mabotho; bo kwatša polelo ya bjona mo kgorong ya motse.
22Bo re: Hee lena mašilo, le tlo kgaotša neng go rata tša bošilo? Hee lena bakweri, le tlo lesa neng go kgahlwa ke dikwero? Hee lena ditlatla, le tlo lesa neng go nyatša tsebo? 23Gomang, le theeletše tsholo tša ka. A nke ke le botše tše di mpabago pelong, ke le anegele taba ya ka. 24Ka gobane ke biditše, mme la gana; ka na ka emiša letsogo la ka, ka hloka wa go šetša. 25Le nyaditše dikeletšo tša ka tšohle, la gana ge ke le sola. 26Mme nna ke tla sega ge le wetšwe ke mathata, ka le kwera ge le tletšwe ke tše di tšhošago. 27Ke tlo sega tšhogo e le wetše boka sesesedi, mme mathata a le tlela wa ledimo, mohla le welwago ke dikotsi le tlalelo. 28Gona ba tlo mpitša, ke se sa araba. Ke mo ba tlogo go ntsomage, ba se sa nkhwetša; 29ka gobane ba hloile tsebo, go boifa Morena ba sa ka ba go rata; 30ba ganne dikeletšo tša ka; ba nyaditše tsholo tšaka tšohle. 31Bjale ba ja kenyo tša mekgwa ya bona, ba khora merero ya bona. 32Ditlatla di ipolaiša go hlanoga, mašilo a senyega ka go se kgathale. 33Ge e le eo a kwago nna, o tlo dula a iketla, o ikagela a sa šie kotsi.
Currently Selected:
DIEMA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.