NEHEMIA 1
1
Thapelo ya Nehemia
1Ditaba tša Nehemia morwa wa Hakalia.
Ka kgwedi ya Kisilefe ya ngwaga wa masome a mabedi ke le motseng wa mošate wa Susani, 2gwa tla Hanani ngwanaborena a na le banna ba bangwe, ba etšwa Juda; ka ba botšiša ditaba tša Bajuda ba ba phologilego, le tša mašalela a boilego bothopša, le tša Jerusalema. 3Ba mpotša ba re: Ba mašalela ba ba boilego bothopša kua nageng yela ba phela ka bohloko bjo bogolo le ka go nyatšega. Merako ya Jerusalema e phušogile le dikgoro tša gona di fišitšwe ka mollo.
4Ka re go kwa ditaba tšeo, ka dula fase ka lla ke hlomogile pelo ka fetša matšatši, ka ikona dijo ka rapela pele ga Modimo wa legodimo; 5ka re: Morena Modimo wa legodimo! Wena Modimo e mogolo e o tšhabegago! Ba ba go ratago mme ba kgomarela melao ya gago, o ba botegela kgweranong, o fela o ba gaugela. 6A tsebe ya gago e theetše, mahlo a gago a a lebelele, o kwe thapelo ya nna mohlanka wa gago ye ke e beago pele ga gago lehono mosegare le bošego ka baka la Baisiraele bahlanka ba gago, ge ke bobola dibe tša Baisiraele tše re sentšego ka tšona; le nna le ba gešo re sentše. 7Re dirile tše mpe; ga ra ka ra gomarela melao ya gago le ditaelo le ditshwanelo tše o di laetšego Moshe mohlanka wa gago. 8Hle gopola Lentšu lela le o le laetšego Moshe mohlanka wa gago, la ge o itše: Mohla le hlanogago ke tlo le gašanyetša ditšhabeng; 9mme wa re: Fela, ge le tlo boela go nna, la hlokomela ditaelo tša ka la dira ka tšona, gona balelekwa ba lena ke tlo ba kgobela le ge ba gašanyeditšwe magomong a legodimo; ke tlo ba botha ntshe ka ba iša felo mo ke ikgethetšego gona ka bea leina la ka ntshe.
10Wa realo ka ge e le bahlanka ba gago ba o ba phološitšego ka maatla a gago a magolo, le ka letsogo la gago le le tiilego.
11Morena, hle tsebe ya gago e theetše thapelo ya nna mohlanka wa gago, le thapelo tša bahlanka ba gago ba ba ratago go boifa leina la gago. Lehono o ke o kgoniše mohlanka wa gago, ke hwetše monna eo a ntira ka kgaugelo.
Ka gobane ke be ke le motšheledi wa kgoši.
Currently Selected:
NEHEMIA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.