HAGAI 1
1
Hagai o re: Ntlokgethwa e agiwe
1Ka ngwaga wa bobedi wa kgoši Dario, ka kgwedi ya go selela, ka tšatši la pele la yona, lentšu la Morena le tletše Serubabele morwa wa Sealathiele mokgoma wa Juda, le Joshua morwa wa Jotsadaka moperisita e mogolo; le ba tletše ka moporofeta Hagai, la re:
2Morena wa mašaba o re: Setšhaba se se re: Lebaka la go aga Ntlo ya Morena ga le ešo la fihla. 3Bjale go tšweletše lentšu la Morena ka moporofeta Hagai, la re: 4Anthe go fihlile lebaka la bolena la go dula mo nywakong ya lena ya mamati a matsaka mme Ntlo ya Morena e ka fo dula e phušogile! 5Bjale Morena wa mašaba o re: Hlokomelang ditsela tša lena. 6Le bjetše peu e ntši, la buna di se kae; le lle, mme la se hore; le nwele, mme le se kgolwe; la apara, le se ruthele; wa go direla moputso, a o hweletša mokotlana wa nthoba. 7Morena wa mašaba o realo; o re: Hlokomelang ditsela tša lena. 8Namelang dithaba le boe le dikwata, le tle le age Ngwako wo. Ke sona se se tlo go nkgahla, ka kgona go ithetiša. -- O realo Morena.
9Le be le hutša go rua tše ntši gomme šefa, ke tše nyenyane; la di goroša, mme nna ka tšitlanya, molato ke eng? Ke ka gobane Ntlo ya ka e sa le lešope, mola bolena, le mang le mang, a kganyela ntlo ya gagwe. 10Molato ke wona woo ge legodimo le le tima pula, mme naga e gana go bea dienywa. 11Komelelo e biditšwe ke nna, ya wela naga le dithaba le mabele le merara le mehlware, le dimela tšohle tša mašemo, le batho le dikgomo, le mediro yohle ya diatla.
12Ba di kwele, boSerubabele morwa wa Sealathiele, le Joshua morwa wa Jotsadaka moperisita e mogolo, le mašalela ka moka a setšhaba, ba theetša lentšu la Morena Modimo wa bona, le tše a di boletšego ka moporofeta Hagai, ka mo Morena Modimo wa bona a bego a mo laetše. Gomme setšhaba sa boifa Modimo. 13Hagai motseta wa Morena a botša setšhaba malaeledi a Morena a re: Morena o re: Ke na le lena! 14Morena a phafoša pelo ya Serubabele morwa wa Sealathiele mokgoma wa Juda, le pelo ya Joshua morwa wa Jotsadaka moperisita e mogolo, le dipelo tša mašalela ka moka a setšhaba; ba tla ba swara modiro wa Ntlo ya Morena wa mašaba Modimo wa bona. 15E be e le ka letšatši la masome a mabedi a metšo e mene la kgwedi ya go selela, ka ngwaga wa bobedi wa pušo ya Dario.
Currently Selected:
HAGAI 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.