2 TIMOTHEO 1
1
Go tiiša thuto mathateng
1Paulo Moapostola wa Jesu Kriste ka thato ya Modimo, yo ke beetšwego go bolela bophelo bjo bo re holofedišitšwego bja tla bja ba gona ka Kriste Jesu,
2Ke ngwalela Timotheo ngwanaka moratwa.
Go gaugelwa le go šokelwa le go khutšišwa a di go tlele di etšwa go Modimo Tata wešo le go Jesu Kriste Mong wa rena.
3Ke leboga Modimo, yo boka borrawešo ke mo hlankelago letswalo la ka le kgodilwe, ke sa kgaotše go go gopola dithapelong tšaka bošego le mosegare. 4Ke hlologetšwe go go bona ge ke elelwa megokgo ya gago, mme ke re ke tlale lethabo, 5ke elelwe tumelo ya gago e se nago boikaketši, ye e bego e agile pelong ya Loisa makgolwago, le pelong ya Oinika mmago, ye ke kgodilwego gore le mo go wena e agile. 6Ke ka baka leo ke felago ke go eletša ke re: Goteletša neo yeo Modimo a go seditšego ka yona ye e lego go wena ka go bewa diatla ke nna. 7Gobane Modimo ga a ka a re nea Moya wa boi; o re file Moya wa maatla, le wa lerato, le wa tlhaologanyo.
8Ke gona, o se be le maseme ge o hlatsela Mong wa rena, ge o hlatsela le nna mogolegwa wa gagwe; mo Ebangedi e hloiwago o eme le yona ka maatla a Modimo. 9Ke yena a re phološitšego a re bitša ka mmiletšo o mokgethwa, e sego ka baka la mediro ya rena; o re biditše ka go ithatela le ka kgaugelo ye a re seditšego ka yona ka Jesu Kriste mola go sešo gwa thoma mehla ya mabaka. 10Ke yona kgaugelo ya go bonagatšwa mehleng yeno ka go bonagala ga Mophološi wa rena Jesu Kriste, e a fedišitšego lehu, a tšweletša bophelo le go se hwe ka seetša sa Ebangedi.
11Gomme nna ke beetšwe yona Ebangedi gore ke be segoeledi sa yona le motseta wa yona le moruti wa bantle. 12Molato ke wona woo ge ke hlokofatšwa; fela ga ke na maseme. Yo ke mo dumetšego ke a mo tseba. Ke botile maatla a gagwe a go mpolokela se ke beetšwego sona, gwa tlo ba gwa fihla letšatši leo. 13Mantšu ao a se nago senyalo, a o a kwelego go nna, o tšee ka mohlala wa ona, ka tumelo le ka lerato, le re le hwetšago go Jesu Kriste. 14Se o beetšwego sona, o ipolokele sona ka Moyamokgethwa wo o agilego mo go rena.
15O a tseba, ba ba lego Asia ba ntlhanogetše bohle; ke boFigelo le Heremogene. 16Ba lapeng la Onesiforo Morena a a ba setše ka kgaugelo, gobane ba ntapološitše gantši; mme yena ga a ka a itšimeletša go mpona ke tlemilwe, 17a re go tla mono Roma, a itapiša a nnyaka, a ba a nkhwetša. 18A Morena a mo setše ka go mo gaugela ka letšatši leo. Ke wena o tsebago ka mo a swerego modiro motseng wa Efeso.
Currently Selected:
2 TIMOTHEO 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.