2 DIKGOŠI 1
1
Bolwetši bja Ahasia. Eliya o neša mollo
1Mehla yeo ya ge Ahaba a hwile, ke yona ya Bamoaba ba hlanogetšego Baisiraele ka yona.
2Ahasia morwa wa Ahaba, a le motseng wa Samaria mo ngwakong wa gagwe, o kile a wa ka lešoba la leboto; a babya, mme a roma batseta a re: Yang le botšiše Baali-Sebubu modimo wa Ekironi, le re: A ke tlo fola bolwetši bjo? 3Ya ba gona Morongwa wa Morena a boditšego Eliya wa Thisibe a re: Tsoga, o yo hlakana le batseta ba kgoši ya Samaria, o bolele le bona o re: A mo go Isiraele ga go Modimo, ge le yo botšiša Baali-Sebubu modimo wa Ekironi? 4Bjaloge Morena o re: O ka se ke wa hlwa o tsoga malaong a o robetšego go ona; sa gago ke go hwa!
Eliya a realo a tloga. 5Batseta ba goma. Ahasia a re: Le goma le reng?
6Bona ba re: Re gahlane le monna e mongwe a rotoga, a re rera a re: Yang le boele go kgoši ye e le romilego, le re: Morena o re: A mo go Isiraele ga go Modimo, ge o roma batseta wa re ba botšiše Baali-Sebubu modimo wa Ekironi? Bjaloge o ka se ke wa hlwa o tsoga malaong a o robetšego go ona; sa gago ke go hwa.
7Ahasia a re: Monna eo a rotogilego la hlakana le yena, mme a le botša taba tše, ke o mobjang?
8Ba re: Ke monna e a aperego kobo ya boya; mathekeng o itlemile ka lerala.
Ahasia a re: Ke Eliya wa Thisibe.
9A napa a roma molaodi a na le banna ba gagwe ba masome a mahlano. Monna e a rotoga a ya go Eliya; a mo hwetša a dutše nthleng ya thaba; a mo rera a re: Wena Monna wa Modimo! Kgoši e re: Fologa!
10Eliya a fetola a re: Ge ke le monna wa Modimo, gona a go tle mollo o tšwago legodimong, o go tšhume le sera sa gago seo. Ka kgonthe gwa tšwelela mollo o etšwa legodimong, wa mo tšhuma le sera sa gagwe.
11Ahasia a roma molaodi e mongwe, a ya a na le banna ba gagwe ba masome a mahlano; monna e a tla a re: Wena monna wa Modimo! Kgoši e re: Akgofa o fologe!
12Eliya a fetola a re: Ge ke le monna wa Modimo, gona a go tle mollo o tšwago legodimong, o go tšhume le sera sa gago seo. Ka kgonthe gwa tšwelela mollo o etšwa legodimong wa mo tšhuma le sera sa gagwe.
13Kgoši ya roma maloadi e mongwe wa boraro a na le banna ba gagwe ba masome a mahlano. Yena yo ge a rotogile, mme a fihlile, a khunama ka matolo, a lebana le Eliya, a mo kgopela a re: Wena monna wa Modimo! A nke o se nyatše bophelo byaka le bja bahlanka ba gago ba masome a mahlano ba. 14Ge e le balaodi bala ba babedi le dira tša bona, go tšwile mollo legodimong wa ba tšhuma; bjale gomme nna bjaka bophelo o se ke wa bo nyatša hle.
15Ke mo Morongwa wa Morena a boletšego le Eliya a re: Fologa o ye le yena; o se mmoife. Eliya a tsoga a fologa nae, a ya go kgoši; 16a fihla a re: Morena o re: O romile batseta, wa re ba yo botšiša Baali-Sebubu modimo wa Ekironi, wa dira e ke mo go Isiraele go hlokwa Modimo wa go ka botšiswa lentšu la gagwe. Ke ka baka leo o ka se kego wa tsoga malaong a o robetšego go ona; sa gago ke go hwa.
17Ka kgonthe a hwa, gwa phethega lentšu le le boletšwego ke Eliya. Legatong la gagwe gwa buša Jorama; e be e le ngwaga wa bobedi wa pušo ya Jorama morwa wa Josafate kgoši ya Juda; ka gobane Ahasia o be a se na morwa.
18Ge e le ditaba tše dingwe tša Ahasia, tše a di dirilego, naa tšona ga di a ngwalwa mo pukung ya ditaba tša kgale tša dikgoši tša Isiraele?
Currently Selected:
2 DIKGOŠI 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.