Matiu 4
4
Sata'a, Jisasi revatga hu'nea naneke
(Mak 1:12-13, Luk 4:1-13)
1Anante Jisasina Avamu'mo avreno vahe omni ka'ma mopafi Sata revatga hinogu vu'ne. 2Ka'ma mopafina 40ti'a hanine zgene ne'zana oneno a'o huno mani'ne. Ana huteno Agra tusi'a aga'zanku hu'ne. 3Revatga hu ne'mo anante ehanatino Jisasinku anage hu'ne, Kagrama Anumzamofo mofavre mani'nesunka, ke nehugeno ama have'zgamo'a breti fore hino. 4Hianagi Jisasi ana ke nona'a huno, Anumzamofo avontafepi anage huno krente'ne, Vahe'mo'a bretige neneno kasefara huno omanigahie. Hianagi maka kema Anumzamofo agipinti atirami'nea nanekema amage antesu'za manigahaze. (Diu-Kas 8:3) 5Anantetira Sata'a, Jisasina avreno Jerusale ruotge ra kumate vuno, ra mono nomofo amumpare ome antege'no oti'negeno, 6anage huno Jisasina asmi'ne, Kagrama Anumzamofo Mofavrema mani'nesunka, Kagra amareti takauro, na'ankure Anumzamofo avontafepina anage hu'za krente'naze, Anumzamo'a ankero naga'a kagriku huno huzmantesige'za, zmagra zmazanteti kazeri sga hanagenka kagra haverera kagia kavavera onkahegosie. (Sam-Zga 91:11-12) 7Jisasi'a agriku hu'ne, Mago ene anage hu'za Anumzamofo avon tafepina kre'naze, Kagra Ra Anumzanka'a revatga hunka onkegahane hu'ne. (Diu-Kas 6:16) 8Ete ru'ene Sata'a avreno Jisasina mago za'za agonarega mrerino, maka mopa kagi'afina avenerino, konariri zama'a averi hu'ne. 9Hagi Sata'a anage huno Jisasina asmi'ne, Kagrama krenarenka nagiafi mono hunantesnanana ama zantamina maka Kagri kamigahue. 10Anante Jisasi'a agriku huno, Sataga manigno! Na'ankure Anumzamofo avontafepina anage hu'za krente'naze, Kagra Ra, Anumzanka'a Agrike krena renka monora huntegahane, nehunka Agri eri'za erintegahane hu'ne. (Diu-Kas 6:13) 11Anante Sata'a, Agrira atreno vige'za, ankero vahe'mo'za e'za Jisasina eme aza hu'naze.
Jisasi mono ke Galili erigafa hu'nea naneke
(Mak 1:14-15, Luk 4:14-15)
12Ana huteno Jisasi antahiama Jonima azeri'za kina nompi ante'naze kema nentahino'a, Agra atreno Galili kaziga vu'ne. 13Galilima mani'nereti Nazareti'a atreno Kapaneum nonkumate umani'naku ran tiru ankenare, Zebulunine, Nafatalikizni mopa kaziga vu'ne. 14Ama'i korapa kasnampa ne' Aisaiana Anumzamo asamigeno huama huno kre'nea kemofo nena'a efore hu'ne. 15Zebuluni mopane Nafatali mopane, hageri anke'narega, Jodani kantu kaziga, Galili megi'a vahe'ma, 16hanizampi nemniza vahe'mo'za tusi'a msaza ke'naze. Hagi ana mopafi nemni'za fri'zamofo tonapi mni'naza vahera, zamagri zmagofetura msazamo remsa hu'ne. (Aisa 9:1-2) 17Ana knareti agafa hu'neana, Jisasi mono ke huzmasmino anage hu'ne, tamagu'a rukrahe hiho, na'ankure Anumzamofo mona kumamo'a, hago tva'o nehie.
Jisasi'a amagema ante'saza disaipol naga zamagi hu'nea naneke
(Mak 1:16-20, Luk 5:1-11)
18Galili tiru ankenarega nevuno, Agra tare kogna ome znage'ne, Saimoni'e, mago agi'a Pita'e, hagi negna'a Endru'e. Znagra nozame kuko tirupi atre'na'e, na'ankure znagra nozame zante netrenki'ne ana hu'na'e. 19Agra anage huno znasmi'ne, Eta eme namage anteke'na, vahe'ma zamavazu hana'azana huranaveri ha'neno. 20Hantaka hu'ne kuko zani'a netre'ne, amage'antene vu'na'e. 21Jisasi'a ananteti'ma viana, tare kogna ome znage'ne, Jemsi, Zebeti nemofoki, negna Jonine, osi ventefi neznafa, Zebeti ene kukozmi nehati'za mani'nageno anante ome znagi hu'ne. 22Hantaka huke osi ventene neznafana atre'ne, Agri amge vu'na'e.
Jisasi kri eri amne hu'nea erizamofo naneke
(Luk 6:17-19)
23Jisasi'a, maka Galili kaziga vono nehuno, osi mono nozmifi (sinagog) mrerino knare musenke (gospol) mona kuma'mofo naneke rempi hunezmino, maka zamufa haviza hu'nea kri vahe ene krimo amu'nozmifi me'nea vahera zamazeri so'e huzmante'ne. 24Ana nehigeno Jisasi agenkemo Siriane maka kaziga vuno eno hige'za, nentahi'za zamagra maka kri vahera zamavre'za Agrite e'naze, ruzahu ruzahu krima eri'naza vahe'ene, zamufa zamatazane, kefo avamu'mo zamagu'afi mani'neane, manani kri'ne, zamufa fri'nea vahe'ene (paralais) zamare'za Agrite ageno zamazeri so'e hu'ne. 25Ana higeno rama'a vahe krerafamo Jisasima amage ante'nazana, Galiliti'ma, Dekapolis kazigati'ma, Jerusaleti'ma, Judia kazigatiki, Joda timofo asoparegati etere huza amage ante'naze.
Currently Selected:
Matiu 4: kbq
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.